Yesu Anamukwati

Yesu nawapostolu ahitili muchinekineki chaKidironi nakuya kuMpidi yaNyiolivi. Iyi mpinji yadiña hanyima yakachi kawufuku, nawa kakweji kadiña mwiwulu. Chashikiliwu kwitempa daÑesemani, Yesu wayilejeli nindi: “Shalenu hanu nawa tonenuña.” Kuhiñahu Yesu wendeliku chantesha nakuya mwitempa, wafukamini. Iku naneñi nankashi, walombeli kudi Yehova nindi: “Itejaku nkeñelu yeyi yishikijewi.” Kufumahu Yehova watemesheli kañelu nakumukolesha. Yesu chafuntiliyi kudi apostolu, wayiwanini wejima wawu asatu anakaami. Wayilili nindi: ‘Hindukenu! Ayinu himpinji yakukaama wanyi! Ora yakunhana kudi ayilumbu jami yinashiki dehi.’

Haleheli wanyi, Yudasi washikili nezaza deneni dawantu iku anasendi mpoku jatubali nitubama. Welukili kwatela kumuwanawu Yesu muloña avulileña kwinza kunidi itempa. Yudasi wayilejeli amashidika nindi wukuyikwasha kumwiluka Yesu. Wayili kudi Yesu nawa wamwilili nindi: ‘Ntañishi, kolaku,’ kuhiñahu wamufufwili. Yesu wahosheli nindi: ‘Yudasi, wunakunfukejela kuhitila mukunfufwa?’

Waswinini kwakwihi nezaza dawantu nawa wayihwili nindi: “Munakukeñanyi?” Amwakwili nawu: “Yesu wakuNazareta.” Kuhiñahu wayilejeli nindi: “Diyi ami,” awa amayala afuntili hanyima nawa adimbukili heseki. Yesu wayihwili cheñi nindi: “Munakukeñanyi?” Amwakwili cheñi nawu: “Yesu wakuNazareta.” Yesu wahosheli nindi: ‘Nayileja dehi nami yami. Yilekenu awa amayala ayeña.’

Petulu chelukiliyi chuma chamwekeneña, waholeli mpoku yakabali nakuketula itu daMalikusa, nduñu yakapristu muneni. Ilaña Yesu wakwatili itu daniwu iyala nakumuuka. Kufumahu wamulejeli Petulu nindi: ‘Tentekaku mpoku yeyi yakabali. Neyi wukuzuña nampoku yakabali, wakafwa kumpoku yakabali.’ Amashidika amukwatili Yesu nakumukasa kumakasa nawa apostolu atemukili. Kuhiñahu izaza dawantu damutwalili kudi Anasi, mukulumpi wawatupristu. Anasi wamwihujoleli Yesu nawa wamutemesheli kwitala daKapristu Muneni Kayafwasi. Hanu dinu chumanyi chamwekeni kudi apostolu?