Nshimbi Jakuzatisha haKupompa kwaChihandilu niMudimu Wanetu akaKristu

Yuma Yidimu

1. Nshimbi jidi munu jikukwasha antu ejima akweti mbadi muKupompa kwaChihandilu niMudimu Wanetu akaKristu. Mwani mwatela kutaña nshimbi jinesekani nambadi yimukweti neyi chinalumbululiwu muMukanda waKupompa waChihandilu niMudimu ninshimbi jidi munu henohu kanda mutachiki kuloñesha mpanji yenu. Akakushimwina ejima atela kuyinka mbadi yawakashikola. Niamakwawu apompaña nachipompelu niwena atela kuhana neyi alondelaña ntañishilu yamuBayibolu nawa neyi ovwahilaña nshimbi yawakaKristu. Nkoñi waKupompa kwaChihandilu niMudimu watela kuhanjeka namuntu wunakukeña kusonekesha kulonda ahaneña jimbadi yuma yakeñekaña hakwila muntu wabula kwikala mukakushimwina asonekeshi nawa nakukeña kusonekesha nawa mulejenu neyi nashikilimu. Mwatela kuhanjeka nindi yumiyi iku muntu wamudizishaña Bayibolu niyena wudi hohu (hela neyi anvwali jindi etiya). Dichimwatela kwila ninamuntu wunakukeña kwikala mukakushimwina wabula kupapatishewa.—od kape. 8 para. 8.

MAZU AKUTACHIKILA

2. Miniti yimu. Mulungu himulungu, hanyima yakamina nikulomba kwakwenzunwina, cheyamani waKupompa kwaChihandilu niMudimu watela kusañumuna amanakwetu kwikala neyena dakutiyilila kuprogilamu. Cheyamani watela kusha maana hansañu yinateli kukwasha chipompelu.

YUMA YALEMA YAMWIZU DANZAMBI

3. Mpanji: Maminiti 10. Mutu niawutulayini yayikuma yiyedi hela yisatu anayisoneki muMukanda waKupompa waChihandilu niMudimu. Iyi mpanji atela kuyihana kudi mukulumpi hela nkoñi wakuzatila washikahu. Neyi kutaña Bayibolu kwamulungu himulungu kunakutachika namukanda wawuha wamuBayibolu, akuvumishaña vidiyo yantachikilu. Nhoshi watela kuhosha nsañu yidi muvidiyo chiyinesekani namutu. Hela chochu, watela kuhosha nihayikuma yikwawu yidi mumukanda wakupompa. Cheñi, neyi kudi mpinji, watela kulumbulula chiwahi nyevulu ninsona yinaloñeshiwu kulonda yesekani nansañu yakudiza. Watela nikuzatisha nsañu yamunyikanda yikwawu chakala hohu yinakuhosha hachikuma chidi mumpanji.

4. Yuma Yalema yakuSpiritu: Maminiti 10. Ichi hichibalu chamalwihu niñakwilu chinabuli mazu akutachika nachu hela akukunkulula nachu. Atela kuchihana kudi mukulumpi hela nkoñi wakuzatila washikahu. Wunakuhana mpanji watela kwihula izaza malwihu ejima. Cheñi, nateli kufukulahu kutaña nsona jinatenuwu hela nehi. Amanakwetu niahela anakwakula atela kwakula mumasekondi 30 nakufunta mwishina.

5. Kutaña Bayibolu: Maminiti awana. Iyi mpanji yakadizi atela kuyihana kudi mukashikola weyala. Kadizi watela kutaña hohu nsañu yinamwinkuwu chakadi kuhosha mazu akutachika nachu nikukunkulula nachu. Cheyamani wakupompa watela kukwasha atudizi kutaña nakuhanuka, kutaña munjila yakwila antu atiyi chikuma, kutaña chakadi kudikasa, kutaña nakukonkomwena hachikuma, kunyamuna nikukulula izu, kuhudikila hatelela nikuhosha neyi chahoshañawu dikalu. Chineli mpanji jikwawu jakutaña Bayibolu jekalaña jajihi nawa jikwawu jajilehi, nkoñi waKupompa kwaChihandilu niMudimu watela kwiluka wuswa wukwetiwu atudizi hakuyinka jimpanji.

SHENU MUCHIMA HAMUDIMU WAKUSHIMWINA

6. Maminiti 15. Ichi chibalu chakupompa achiloñesha kulonda antu ejima eluki nikuwahishaku njila yakuhanjeka, kushimwinamu nikutañishilamu. Neyi chinatwesheki, akulumpi niwena anateli kuyinka mpanji mushikola. Kadizi wejima watela kuzatila hachikuma chidi mubuloshuwa yaKutañisha hela Kukeña Antu yinashiwu mutubutilu kwakwihi nambadi yinayinkiwu muChihandilu niMudimu Mukanda waKupompa. Mpinji jikwawu, mpanji yinatenniwu nawu yakuhanjeka akayishañahu. Iyi mpanji atela kuyihana kudi mukulumpi hela nkoñi wakuzatila washikahu.—Talenu paragilafu 15 kutalisha hachakuhana mpanji jakuhanjeka.

7. Tachikenu Kuhanjeka: Iyi mpanji anateli kuyihana kudi muntu weyala hela wamubanda. Nkwashi yamuntu weyala watela kwikala weyala, wamubanda niyena chochu, hela watela kwikala ntaña. Kadizi ninkwashi yindi anateli kushakama hela kwimana.—Neyi munakukeña kwiluka jajivulu hansañu yidimu hela njila yakuzatisha haniyi mbadi, talenu paragilafu 12 na 13.

8. Funtilenuku: Iyi mpanji anateli kuyihana kudi muntu weyala hela wamubanda. Nkwashi yamuntu weyala watela kwikala weyala, wamubanda niyena chochu. (km 5/97 ifu 2) Kadizi ninkwashi yindi anateli kushakama hela kwimana. Kadizi watela kumwekesha chakuhosha neyi nafuntili kudi muntu ahanjikiliwu nindi.—Neyi munakukeña kwiluka jajivulu hansañu yidimu hela njila yakuzatisha haniyi mbadi, talenu paragilafu 12 na 13.

9. Kwilisha Atumbanji: Iyi mpanji anateli kuyihana kudi muntu weyala hela wamubanda. Nkwashi yamuntu weyala watela kwikala weyala, wamubanda niyena chochu. (km 5/97 ifu 2) Kadizi ninkwashi yindi anateli kushakama hela kwimana. Kadizi watela kumwekesha atachika dehi kudiza Bayibolu. Hikwatela kwikala mazu akutachika nachu hela akukunkulula nachuku, chiña hohu neyi dihanakuzatilayi kadizi. Himwatela kutaña nsañu yejima yidi munsañu munafumi mpanji yenuku, hela chakwila munateli kwila mwenimu.

10. Lumbululenu Yuma Yimwakuhwelela: Neyi yakuhana neyi mpanji, dikwila nawu akuyihana kudi muntu weyala. Neyi yakuhana neyi chimwenu, anateli kuyihana kudi kadizi weyala hela wamubanda. Nkwashi yamuntu weyala watela kwikala weyala, wamubanda niyena chochu, hela watela kwikala ntaña. Kadizi watela kwakula chahanuka nawa munjila yayiwahi lwihu lwamutu wampanji kuzatisha nsañu yinamwinkiwu kuzatisha. Kadizi neyi nakeñi nateli kutena mukanda munafumi nsañu yinakuzatishayi hela nehi.

11. Mpanji: Iyi mpanji atela kuyihana kudi kadizi weyala nawa watela kuyihana neyi mpanji kuchipompelu. Neyi mpanji yinashindameni hansañu yikwawu A yidi mubuloshuwa yaKeñenu Antu, kadizi watela kushimuna chinateli kuzatishawu oyu vasi mumudimu wakushimwina. Chakutalilahu, nateli kushimuna mpinji yinateli kuzatishawu oyu vasi, mwatalisha oyu vasi, nichakuhanjeka namuntu kuzatisha oyu vasi. Neyi mpanji yinashindameni hakudiza kudi mubuloshuwa yaKeñenu Antu, kadizi watela kusha maana hachakuzatisha ochu chikuma mumudimu wakushimwina. Nateli kushimuna chakutalilahu chinashimuniwu muchikuma 1 chanoku kudiza hela kuhosha hamavasi amakwawu anashimuniwu munoku kudiza, neyi chinatwesheki.

12. Nsañu Yidimu: Nsañu yidi muyinu paragilafu niyinalondelihu yinakundami kumpanji ‘yaTachikenu Kuhanjeka’ ‘niyaFuntilenuku.’ Chiña hohu neyi hadi kuhimpika, ilaña kadizi watela kuzata nañovu kulonda ahanjeki chalala chamuBayibolu namuntu anakuhoshayi nindi hela ali chikuku chakuhanjekelahu kumbidi. Kadizi nateli kutonda mutu wansañu wunateleli hanoyu mpinji nawa kwesekeja neluña denu. Neyi nakeñi nateli kuzatisha mukanda hela vidiyo yidi muChikasha Chetu Chakutañisha hela nehi. Chatela azatisheña mazu akuhembela kumutu, atudizi atela kuzata nañovu kulonda ahosheña neyi anakuhanjeka hohu, chidi neyi kumwekesha nawu ayikeña owu antu hela kuzatisha mazu azatishañawu antu ejima.

13. Njila Yakuzatisha: Kadizi watela kuzatisha njila yinamulejiwu kuzatisha kwesekeja neluña dawu. Chakutalilahu:

(1) Kwitala Niitala: Iyi njila munabombeli kushimwina kwitala niitala—mesu namesu, hafoni, hela kusoneka nyikanda—nikufuntila kudi muntu imwahanjekeli nindi hampinji yimwashimwinineña kwitala niitala.

(2) Kushimwina Wunsahu wamuMpanji: Iyi njila yinalumbululi chimunateli kubalumuna nsañu yimunakuhanjeka hohu yikali wunsahu. Munabombeli kuzatisha mazu amuNsona kudi antu imunadiwani nawu kumudimu, kushikola, muchituñilu hela neyi munakandami mumutoka hela kudi kwejima kumudi kumunakwila yuma yidi yejima.

(3) Kushimwina Kudi Antu Amavulu: Iyi njila munabombeli kushimwina kuzatisha ngolofwana, kuya kumaluña kwazatilañawu antu, kushimwina mumukwakwa, hela kushimwina mumaluña akunookela, kwatentekelañawu nyotoka hela kwejima kudi antu amavulu.

14. Kuzatisha Mavidiyo niNyikanda: Kwesekeja nachidi yuma, kadizi nateli kumwekesha vidiyo hela kuhana mukanda. Neyi mumpanji yakadizi mudi vidiyo hela kadizi nakukeña kuzatisha vidiyo, watela kuyitena oyu vidiyo nikuhanjekahu ilaña kanda ayivumishaku.

CHATELA KUSHAKAMAWU AKAKRISTU

15. Hanyima yakwimba kamina, jiminiti 15 jikulondelañahu janichi chibalu mukwikalaña mpanji yimu hela jiyedi jikukwashaña izaza kulonda dizatisheña Izu daNzambi. Chiña hohu neyi anahani lushimbi, ilaña iyi mpanji yakuhana kudi akulumpi hela ankoñi akuzatila ashikahu, kufumishaku hohu mpanji yakukaankila kwahenu, iyi mpanji atela kuyihana hohu kudi akulumpi. Neyi anashimuni nawu kuhanjeka nhoshi watela kwihula malwihu mumpanji yejima kubombela hamalwihu analoñeshiwu. Watela kuhosha mazu antesha kulonda kushali mpinji yakuhosha hayikuma yamaneni niyakwakulahu izaza. Neyi mudi kwihujola, muntu anakiwhulawu watela kuhosha iku wudi kupulatifomu bayi iku washakama mwizazaku.

16. Kudiza Bayibolu haChipompelu: Maminiti 30. Mukulumpi washikahu diyi watela kulombola ichi chibalu. (Muyipompelu mwekala akulumpi antesha, atela kuzatisha ankoñi akuzatila ashikahu kulonda alomboli.) Izanvu dawakulumpi datela kutonda wunashikihu kulombola Kudiza Bayibolu haChipompelu. Ana anatonduwu kulombola atela kulombola chachiwahi kulonda ahembi mpinji, kukonkomwena hansona mudi yikuma nawa atela kukwasha ejima kuhetelamu muyikuma yimunadizi. Owu anatondiwu chikuwaha neyi ahitulukuka munsañu yashimunawu kutalisha hachakulombola yibalu yamalwihu niñakwilu. (w23.04 ifu 24, chikasha) Neyi munahanjeki dehi hansañu yakudiza munowu mulungu bayi mutachika kuletamu nsañu yikwawuku. Neyi chinatwesheki, mwatela kuzatisha akakulombola niantañi ashiyashana mulungu himulungu. Neyi Cheyamani waKupompa kwaChihandilu niMudimu ahosha nindi kudiza atela kukwihihisha, mukakulombola watela kwiluka chatela kwihihishayi kudiza. Nateli kutondahu kubula kutaña maparagilafu amakwawu.

MAZU AKUKUNKULULA NACHU

17. Maminiti asatu. Cheyamani waKupompa kwaChihandilu niMudimu watela kuhituluka muyikuma yamaneni yinadiziwu. Watela kuhosha hayuma yitwakadiza mulungu wunakwinza. Watela kubidika majina awatudizi akahana mpanji mulungu wunakwinza, ilaña watela kwila mwenimu chiña neyi kudi mpinji. Neyi kudi nsañu yatela kubidikawu ninyikanda yakutaña kuchipompelu atela kubidika hela kuyitaña kudi cheyamani muchibalu chindi chakukunkulula, ilaña chiña hohu neyi anamuleji. Nsañu jamudimu wamwiha nijakuwahisha itala daWanta hiyatela kujibidika hachinañamuku, ilaña atela kujilamika habodi yansañu. Neyi himukutwesha kubidika hela kutaña nyikanda mumpinji yinapimiwu yamazu akukunkulula acheyamaniku, cheyamani watela kuleja amanakwetu adi najimpanji muchibalu chakupompa chaChatela Kushakamawu akaKristu kulonda ehihishiku mpanji jawu. (Talenu paragilafu 16 ni 19.) Kupompa kwatela kumana nakamina nikulomba.

KUHAMEKA NIKUFUMBA

18. Hakachi kaniji mpanji jawatudizi, cheyamani waKupompa kwaChihandilu niMudimu wudi naminiti yimu yakuhamekelamu nikufumba kuzatisha chikuma chakudiza. Neyi cheyamani nashimuni mutu wampanji yakadizi, hatela kuleja izaza chikuma chakumufumbilahu kadiziku. Hanyima yakwila kadizi nahani dehi mpanji nawa anamuhameki nankashi, cheyamani watela kushimuna hanakuzatilayi kadizi nawa watela kushimuna chuma chinaleteshi kadizi ahoshi chiwahi hela kushimuna chikuma hatela kuzatilayi kadizi. Cheyamani watela cheñi kuhosha hayuma yikwawu yakeñekaña hakuhanjeka nawantu neyi amona nindi kadizi hela izaza dikudizilaku nsañu yikwawu. Mwatela cheñi kumufumba kadizi chachiwahi kumbadi hanyima yakupompa hela mpinji yikwawu kuzatisha buloshuwa yaKukeña Antu, yaKutañisha hela Mukanda washikola hachikuma chamwinkeliwu hela hachuma chikwawu.—Talenu maparagilafu 19, 24 ni 25 kulonda mwiluki nsañu jikwawu jinakuhosha hamudimu watela kuzatayi nkoñi nimukakufumba wahambadi waKupompa kwaChihandilu niMudimu.

KUHEMBA MPINJI

19. Kwosi mpanji yatela kubadika mumpinji, hela mazu akutachikila niakukunkulula acheyamani waKupompa kwaChihandilu niMudimu hiyatela kuhita mumpinjiku. Hela chakwila Mukanda waChihandilu niMudimu wunashimuni mpinji yachibalu chejima, neyi chibalu chinamani, bayi mushaku nsañu yacheñi kulonda muzatishi mpinji yinashimuniwuku. Neyi mbadi jinahiti mumpinji, cheyamani waKupompa kwaChihandilu niMudimu nimukakufumba wahambadi watela kuyifumba kwakankawawu. (Talenu paragilafu 24 ni 25.) Kupompa kwejima kushilahu nitumina nikulomba kwatela kumana mudi ora yimu namaminiti 45.

NEYI ANAYENDELI KUDI NKOÑI WAÑINZA

20. Neyi chipompelu anachendeli kudi nkoñi wañinza, progilamu yakupompa yatela kwenda neyi chinashimunuwu muMukanda waKupompa waChihandilu niMudimu nawa iyi diyuma yimukuhimpa: Mpanji yamudimu yikuhanayi nkoñi wañinza yajiminiti 30 akuyisinsishaña hachibalu chaKudiza Bayibolu haChipompelu muchibalu chaChatela Kushakamawu akaKristu. Henohu mpanji yamudimu kanda yitachiki, cheyamani waKupompa kwaChihandilu niMudimu wukuhituluka muprogilamu yakupompa kumunapompi, wukushimuna yuma yimwakadiza mulungu wukalondelahu, nateli kubidika nsañu yinakukeñeka, kutaña nyikanda yinakukeñeka nawa wukumutambika nkoñi wañinza kwinza nakuhana mpanji. Neyi nakumishi mpanji, nkoñi wañinza wukukunkulula kupompa nakamina kanatondiyi. Nateli kutambika manakwetu kwinza nakulomba. Kwosi atela kupompela mutupeka twanyanya neyi chipompelu chenu anachendeli kudi nkoñi wañinzaku. Neyi kudi izanvu dahoshaña idimi dacheñi, datela kupompa nkawadu mumulungu wankoñi wañinza. Hela chochu, idi izanvu datela kudibomba nachipompelu chinendeliwu hampinji yampanji yamudimu yankoñi wañinza.

MULUNGU WAKUPOMPA KWAÑINZA HELA KWELUÑA

21. Neyi munowu mulungu mudi nakupompa kwañinza hela kweluña, kukwikala wanyi kupompa kwachipompelu. Chipompela atela kuchanukisha nawu nsañu yimwatela kudiza munowu mulungu akayidizi hakudiza kwahalwawu hela nachisaka.

MULUNGU WACHANUKISHU

22. Neyi Ifuku daChanukishu didi mukachi kamulungu, kupompa kwaChihandilu niMudimu kwatela kwikalaku wanyi.

NKOÑI WAKUPOMPA KWACHIHANDILU NIMUDIMU

23. Mukulumpi akutondawu kudi izanvu dawakulumpi diyi watela kwikala nkoñi waKupompa kwaChihandilu niMudimu. Diyi wukwikalaña namudimu wakumona nindi kupompa kunakwenda chiwahi nawa anakukulombola kwesekeja nanshimbi yinashimunuwu. Watela kuzatila hamu namukakufumba wahambadi. Neyi Mukanda waKupompa waChihandilu niMudimu wanowu kakweji wunenzi, nkoñi waKupompa kwaChihandilu niMudimu wukwinka ejima jamukachi kamulungu mutukweji tuyedi. Munabombeli nijimpanji jabula kwikala jawatudizi nimacheyamani amukupompa kwamukachi kamulungu atondawu kudi izanvu dawakulumpi kushilahu nimpanji jawatudizi. (Talenu paragilafu 3-16 ni 24.) Neyi nakutonda atudizi, watala kushinshika hayaaka, kushimbula, nikukasunuka kwakuhosha hansañu yinakumwinkawu. Watela kuzatisha kashinshi kwokamu neyi nakuhana mpanji jikwawu jamukupompa. Mpanji jejima mwatela kujihana henohu kunashali nyilungu yisatu nakuhana. Fomu yambadi yaChihandilu niMudimu Wanetu akaKristu (S-89) mwatela kuyizatisha hakwinka atudizi jimbadi. Nkoñi waKupompa kwaChihandilu niMudimu, watela kushaña ndandanda yakupompa kwejima habodi yansañu. Inzavu dawakulumpi datela kutonda mukulumpi mukwawu hela nkoñi wakuzatila kulonda amukwasheñaku. Hela chochu, akulumpi hohu diwu atela kuzatishawu hakutonda akakuhana jimpanji jabula kwikala jawatudizi.

CHEYAMANI WAKUPOMPA KWACHIHANDILU NIMUDIMU

24. Mulungu himulungu, mukulumpi wumu watela kwikala cheyamani waKupompa kwaChihandilu niMudimu. (Muyipompelu mwekala akulumpi antesha, atela kuzatisha ankoñi akuzatila ashikahu.) Diyi wukuloñeshaña mazu akutachika nachu. Diyi wukushimunaña jimpanji jejima nawa kwesekeja nakuvula kwezanvu dawakulumpi, nateli kuhana jimpanji jikwawu hakupompa, sweje-e mbadi jinakumwekesha kutalisha vidiyo chakadi kuhanjekahu. Cheyamani watala kuhosha mazu antesha hakutachika chibalu hichibalu. Izanvu dawakulumpi datela kutonda akulumpi ashikahu anateli kuhana iji mpanji. Akulumpi anashikuhu diwu akwikalaña acheyamani mumpinji-mumpinji. Kwesekeja nakukaankila kumukweti, nkoñi waKupompa kwaChihandilu niMudimu kakavulu anateli kumuzatisha neyi cheyamani kubadika akulumpi amakwawu anashikuhu. Dichi neyi mukulumpi nashikuhu kulombola Kudiza Bayibolu haChipompelu, hadaha nashikihu cheñi kwikala cheyamani waniku kupompa. Mwatela kwanuka cheñi nenu, mukulumpi wukwikala cheyamani watela kwikala namuchima wakuhameka hampinji yinakukwashayi atudizi chiwahi nakukeña neyi chinatwesheki nikuyifumba. Cheyamani watela kwiluka nindi kupompa kunamani mumpinji. (Talenu maparagilafu 17 ni 19.) Neyi cheyamani nakukeña nawa kudi iluña deneni, hachinañamu anateli kushahu mayikolofoni yakwimika kulonda cheyamani ayizatisheña hakutambika manakwetu wudi nampanji yinalondeluhu nawa iwu manakwetu wukwimana kuchihoshelu chanhoshi. Munjila yoyimu, cheyamani watela kushakama kumbidi hampinji yinakuhanayi kadizi mpanji yakutaña Bayibolu nihachibalu chaShenu Muchima haMudimu waKushimwina. Muniyi njila, mpinji yikumanaña wanyi.

MUKAKUFUMBA WAHAMBADI

25. Neyi chinatwesheki, mukulumpi wahanaña jimpanji chiwahi diyi mwatela kwinka iwu mudimu. Mukakufumba wahambadi wukweti mudimu wakufumba akulumpi hela ankoñi akuzatila neyi analuwañeshi, kutalisha hampanji yinahanuwu, kushilahu nimpanji yamuKupompa kwaChihandilu niMudimu, mpanji yawantu amavulu nikutaña hela kulombola Kaposhi Kakutalila niKudiza Bayibolu haChipompelu. (Talenu paragilafu 19.) Neyi muchipompelu mudi akulumpi amavulu ahoshaña nikudizisha chiwahi, mukulumpi mukwawu washikahu watela kwikala mukakufumba wahambadi chaaka chimu. Ichi hichinayi mukwila nawu mukakufumba wahambadi wukuyifumbaña akulumpi hela ankoñi akuzatila mpinji yejima neyi anahani mpanjiku.

MASHIKOLA ANYANYA

26. Kwesekeja nakuvula kwawatudizi, yipompelu yinateli kwikala natupeka twanyanya. Kapeka hikapeka katela kwikala namukakufumba washikahu, nawa chikuwaha neyi wukwikala mukulumpi. Neyi chinatwesheki, nkoñi wakuzatila washikahu nateli kuzata iwu mudimu. Izanvu dawakulumpi datela kutonda watela kuzata iwu mudimu nawa atela kutondahu neyi kukwikalaña kudihimpa. Mukakufumba watela kulondela njila yinashimunuwu muparagilafu 18. Neyi kudi tupeka twanyanya, atudizi atela kuya munitu tupeka neyi mpanji yaYuma Yalema yakuSpiritu yidi muchibalu chaYuma Yalema yaMwizu daNzambi yinamani. Atela kudibomba cheñi nachipompelu neyi chibalu chakadizi wakukumishaku chinamani.

MAVIDIYO

27. Twakazatishaña mavidiyo antesha hakupompa. Mavidiyo akuzatisha hakupompa kwamukachi kamulungu akekalaña ha JW Library® apu nawa munateli kuyiwana kuzatisha yozelu.

S-38-LD 11/23