“Ifuku daYehova Deneni Didi Kwakwihi”
“Ifuku daYehova deneni didi kwakwihi, didi kwakwihi, didi nakunyakala nankashi.”—ZEFWANIYA 1:14.
1, 2. (a) Ifukwinyi dadimena datalilañawu eniKristu? (b) Malwihwinyi yitwatela kwihula, nawa muloñadi?
K ANKAÑA wazañalalaña hakutalila chikupu ifuku dachawija chindi. Mumbanda walema hamujimba watalilaña namuzañalu kuvwalika kwamukeki windi. Mukwanyidimu wunazeyi watalilaña chikupu mpinji yakutachika kunooka kwindi kunahembeleliyi hampinji yayilehi. Chumanyi chadifwanaku chiyakwetuwu wejima wawu? Wejima wawu atalilaña ifuku dadimena—ifuku dalema chikupu muwumi wawu. Atoñojokañahu nankashi ilaña yitoñojoka yawu yambuka chikupu. Nkumininaku, ifuku diyatalilañawu dashikaña nawa neyi dinashiki dehi, akuhwelelaña kwikala adiloñesha hefuku denidi.
2 EniKristu alala makonu niwena atalilaña chikupu kwinza kwefuku dadimena. ‘Hiifuku daYehova’ deneni. (Isaya 13:9, Yoweli 2:1; 2 Petulu 3:12) Komana idi “ifuku daYehova” dinakwinza hichumanyi, nawa kwinza kwadu kwakayikuma ñahi antu? Cheñi nawa, tunateli kumwekesha ñahi netu tunadiloñeshi hakwinza kwadu? Chalema kuwana ñakwilu yanawa malwihu hayinu mpinji, muloña wunsahu wunakumwekesha walala wanawa mazu amuBayibolu: “Ifuku daYehova deneni didi kwakwihi, didi kwakwihi, didi nakunyakala nankashi.”—Zefwaniya 1:14.
“Ifuku daYehova Deneni”
3. Komana “ifuku daYehova deneni” hichumanyi?
3 Komana “ifuku daYehova deneni” hichumanyi? Munsona yejima yamuBayibolu, nhoshelu yakwila nawu “ifuku daYehova” yatalishaña kumpinji yadimena oyu Yehova yashikijiliyi wunsompeshi hadi ayilumbu jindi nikulemesha ijina dindi. Antu abulili chikuhwelelu amuYuda niYerusalema niantu azuwa amuBabiloni niEjipitu wejima wawu amweni ‘mafuku aYehova’ hampinji yamwenuwu kushikijewa kwawunsompeshi waYehova. (Isaya 2:1, 10-12; 13:1-6; Yeremiya 46:7-10) Hela chochu, “ifuku daYehova” deneni didi kumbidi. ‘Hiifuku’ damba kashikijayi Yehova wunsompeshi windi kudi owu atamishaña ijina dindi. Dikatachika kujilumuna “Babiloni Muneni,” wanta wakaayi wansakililu yakutwamba, nkumininaku dikajilumuna kaayi katama hanjita yaAmagedoni.—Chimwekeshu 16:14, 16; 17:5, 15-17; 19:11-21.
4. Muloñadi antu amavulu chiyatelelawu kutiya woma ifuku daYehova dinakwinza nakunyakala?
4 Hela chakwila adiluka hela nehi, antu amavulu atela kutiya woma idi ifuku dinakunyakala kuswila kwakwihi. Muloñadi? Kuhitila mudi kaprofwetu Zefwaniya, Yehova nakuli nindi: “Ifuku odu hiifuku dandombu, hiifuku dayihuñu nakukabakana, hiifuku dakukisañana nakwila kwamahembi, ifuku damwidima nakwiyila, ifuku damavu namwidima wakushishita.” Dakutiyisha woma chikupu! Kubombelahu kaprofwetu nahoshi nindi: “Nakamwesha antu kukala . . . nanochu chanamuvulumunuwu Yehova.”—Zefwaniya 1:15, 17.
5. Muloñadi yihita yawantu chiyachiñililañawu chikupu ifuku daYehova?
5 Hela chochu, yihita yawantu amakwawu, achiñililaña chikupu kwinza kwefuku daYehova. Muloñadi? Eluka nawu himpinji yawamwinu nikupuluka kwawantu aloña, hiifuku dakamuhamekawu Yehova yomweni chikupu nikujilika ijina dindi dalema. (Yoweli 3;16, 17; Zefwaniya 3:12-17) Hela chakwila antu akuditiya woma hela akudichiñilila ifuku denidi chikushindamena chikupu hayuma yinakukoñawu munshakaminu yawu makonu. Watoñojokañahu ñahi hakwiza kwefuku denidi? Wunadiloñeshi kutalila ifuku denidi? Komana walala wakwila nawu ifuku daYehova didi kwakwihi wunakumi nshakaminu yeyi yamafuku ejima makonu?
“Kwakenza Akwakuseha Nakuseha”
6. Antu amavulu amonaña ñahi “ifuku daYehova,” nawa muloñadi eniKristu alala chiyabulilañawu kuhayama hachumichi?
6 Hela chakwila kunyakala kunakukeñeka, antu amavulu hiyakamenaña “ifuku daYehova” nawu dinakuswila kwakwihuku. Akabishaña nikuseha ana ayisoñamishaña hakunyakala kwakwinza kwefuku denidi. EniKristu alala hiyahayamaña hachumichuku. Anukaña kusoñamisha kwasonekeliyi kapostolu Petulu: “Sambilenu kwiluka nenu hamafuku akukuminina kwakenza akwakuseha nakuseha, nakwila mwaya kufwila kwawu aweni kwatama; nawu, Indi kwinza kwindi kwakaniniyi kwokudihi? Muloña chochakaminuwu ankakulula tulu [twakufwa], yuma yejima chochiyekala, neyi chiyadiñi hatachi haleñeluwu yuma.”—2 Petulu 3:3, 4.
7. Chumanyi chinateli kutukwasha kutwalekahu nayitoñojoka yakunyakashana?
7 Chumanyi chinateli kutukwashaku kutondolwela yitoñojoka yakujinoka kulonda kutwalekahu nayitoñojoka yakunyakashana? Petulu natwileji nindi: ‘Nalondi kuhizumwisha nachu wuswa wakutoñojoka kwenu kwakuwahi nakuyanukisha; kulonda mwanuki mazu ahosheluwu dehi atuprofwetu ajila, nikuleja kwaMwanta yowu Chamwinu, kwahosheliyi mudi apostolu jenu.’ (2 Petulu 3:1, 2) Kusha kashinshi kukusoñamisha kwawuprofwetu chikutukwashaku ‘kuhizumwisha nachu wuswa wakutoñojoka kwetu kwakuwahi.’ Hekwawu twatiyahu dehi yanukishu yeniyi kapampa kakavulu, ilaña hayinu mpinji chidi chalema, kutwalekahu kusha kashinshi kukusoñamisha kweniku, kubadika chichadiñi kunyima.—Isaya 34:1-4; Luka 21:34-36.
8. Muloñadi antu amavulu chiyadiwilañawu yanukishu yamuBayibolu?
8 Muloñadi antu amakwawu chiyadiwilañawu iyi yanukishu? Petulu natwalekuhu nindi: ‘Kwesekeja nayitoñojoka yawu, kwonti kwawu kwanuka nawu mawulu adiñi kwoku chachikulu, niiseki datuñilewi namenji mukachi kamenji, nezu daNzambi. Mpata yamunu mwishina yadiñuku yajiminini mumenji, yanoñeli.’ (2 Petulu 3:5, 6) Dimu, kudi owu abulaña kukeña ifuku daYehova kwinza. Hiyakeñaña chuma chidi chejima kuluwañesha chihandilu chawu champinji yejimaku. Hiyakeñaña kulumbulula kudi Yehova hamuloña wanshakaminu yawu yalwisuku! Neyi chinashimuni Petulu, ashakamaña “nakwila mwaya kufwila kwawu aweni kwatama.”
9. Yililwinyi yamwekesheluwu antu amumafuku aNowa niLoti?
9 Hamuloña ‘wayitoñojoka yawu,’ akwakuseha wenawa, adiwulaña nawu Yehova hadiñijili munsañu yamuchidi wamuntu kumpinji yakunyimaku. Yesu Kristu nikapostolu Petulu wejima wawu ahosha hansañu jeniji jiyedi—“hamafuku aNowa” ‘nihamafuku aLoti.’ (Luka 17:26-30; 2 Petulu 2:5-9) Henohu dibaji kanda, antu hiyashili kashinshi kukusoñamisha kwahaniniyi Nowaku. Chochimu, henohu kujilumuka kwaSodoma naGomora kanda kushiki, kumesu awakuwindi awamayala, Loti ‘wamwekeni neyi kwiji wayidimbileña.’—Kutachika 19:14.
10. Chumanyi chelañayi Yehova kudi antu abulaña kwiluka?
10 Hosi chambu namakonu. Hela chochu, talenu chelañayi Yehova kudi antu abulaña kwiluka: “Nakababesha antu anatentami hanchiba jawu, elaña munyichima yawu nawu, Yehova hakela hela yayiwahuku, hakela hela yatamaku. Mahetawu akekala yuma yakupupapupa, matalawu akekala mahembi. Matala akatuña, ilaña hiyakashakama mwoku; matempa anyivinyu kutumba akatumba, ilaña hiyakanwamu vinyuku.” (Zefwaniya 1:12,13) Antu atela kutwalekahu nanyidimu yawu yelañawu ‘mpinji yejima,’ ilaña kwosi nkisu yahaya nyaka yiyakawana munyidimu yawuku. Muloñadi? Muloña ifuku daYehova dakenza chakubajimwisha, nawa maheta ejima akahetawu hiyakayipulwishaku.—Zefwaniya 1:18.
‘Dichiñililenuña’
11. Kubabeshanyi kutwatela kwanukaña?
11 Kwabukaku netuña datama ditwashakamamu, twatela kwanuka kubabesha kwasonekeliyi kaprofwetu Habakuki: “Muloña chimwenu ichi chichidi kanda chakumwaka wakutoñola dehi, chidi nakunyakala chishiki kunsa, hichakatwambaku. Hela chikulabajala, chichiñilili, muloña chakenza chalala, hichakalabaku.” (Habakuki 2:3) Hela chakwila ifuku denidi dikumwekana neyi dinakulabajala hamuloña wakumwena yuma mukubula kuloña, twatela kwanukaña netu Yehova halabañaku. Ifuku dindi dakenza hampinji yashikila chikupu, hampinji yakabula kukuhwelela muchidi wamuntu.—Maku 13:33; 2 Petulu 3:9, 10.
12. Yumanyi yasoñamishiliyi Yesu, nawa yinambukiku ñahi nayililu yawatumbanji twaYesu ashinshika?
12 Kukonkomwena hakulema kwakutwalekahu kuchiñilila ifuku daYehova, Yesu wasoñamishili nindi niatumbanji twindi amakwawu akajimbesha yitoñojoka yakunyakashana. Washimweneñahu dehi hadi wena nindi: “Ilaña neyi kudi nduñu watama wakela mumuchima windi nindi nkaka yami hakulaba, hakutachika kweta akwawu anduñu nindi, hakudya nakunwa nawakwakusheta; nkaka yayenowu nduñu hakwinza hefuku dakubula kutalilayi, nihampinji yakubula kwilukayi; wakamuvupola chacheni.” (Matewu 24:48-51) Kwambukaku, izanvu danduñu wamaana nikashinshi dahembaña yitoñojoka yakunyakashana nakashinshi. Izanvu danduñu dinatwalekuhu kwikala datona nikumona kwila nawu adiloñesha. Yesu wadinka “mudimu wakuhemba yuma yindi yahetayi yejima” hanu heseki.—Matewu 24:42-47.
Chinakukeñekela Kunyakashana
13. Munjilanyi mwamwekesheleliyi Yesu chakeñekeleleña kwikala nayitoñojoka yakunyakashana?
13 Chadiñi chalema kudi eniKristu amunkulakaji yakusambila kuhemba yitoñojoka yawu yakunyakashana. Akeñekeleña kukoñahu chuma chimu chakutemuka muYerusalema hampinji yamwenuwu musumba yeniwu ‘anamukuchiki dehi namajita kwi-ndo.’ (Luka 21:20, 21) Chumichi chamwekeni muchaaka cha 66 C.E. Talenu Yesu chamwekesheliyi kunyakashana kwakeñekeleña kumbadi yaweniKristu akunyima: “Muntu wakekala hewulu detala bayi akasuluka nakwidisha yuma yamwitala dinduku; nimuntu wakekala mwiha bayi akafunta nakunona kahuma kinduku.” (Matewu 24:17, 18) Kwesekeja nansañu yanyaka yamwekeshaña nawu Yerusalema watwalekeluhu kushakama cheñi yaaka yiwana, hanu dinu, muloñadi eniKristu chiyakeñekeleleña kutiyilila kumazu aYesu mukunyakashana nankashi mu 66 C.E.?
14, 15. Muloñadi chichadiñileña chalema kudi eniKristu amunkulakaji yakusambila kwilahu chuma chimu chakadi kulaba, hampinji yamweniwu Yerusalema anamunyeñumuki dehi kudi amashidika atuñili chilombu?
14 Hela chakwila dimu amashidika aweniRoma hiyakisañeni Yerusalemaku, nakushika tuhu nimu 70 C.E., hayaaka yiwana yeniyi hikwadiñi kuwundaku. Kwakulehi! Yaaka yeniyi yenzeli namadombu nikupwekesha mashi. Mukwakushimuna nsañu yanyaka wumu walumbulwili hayuma yazatikileña muYerusalema hayina mpinji nindi, “yadiña njita yamwituña yakuchinisha nikupwekesha mashi, nawa yabombelelimu yililu yawukatu watama.” Anyana awamayala ayisendeli kulonda kuya nakukolesha anakulwa njita, nikusenda yitwa nikukalakala muwushidika. Adiñi nakuyidizisha jawushidika mafuku ejima. Owu abulileña kukwashana chikupu ayimweneña neyi anfukeji. Neyi chakwila eniKristu ashimbwili mumusumba, adi kwikala mukukala kweneni chikupu.—Matewu 26:52; Maku 12:17.
15 Twatela kwiluka netu Yesu wahosheli nindi owu “adi muYudeya,” bayi muYerusalema hohuku ateleleli kutachika kutemuka. Chumichi chadiñi chalema muloña hahitili hohu tukweji twanti hanyima yakwila anafumi dehi muYerusalema, amashidika aweniRoma afuntishiluhu cheñi njita yawu. Chatachi, Ñaliliya amushindili mu 67 C.E., chaaka chahiñilihu Yudeya amushindili chikupu. Chumichi chaleteli chineñi cheneni kunyikala yadiñi kwakulehi namusumba. Cheñi nawa chayikalililili aYuda ejima hakwila nawu atemuki muYerusalema. Yenzelu yamumusumba ayihembeleña, antu ejima akeñeleña kutemuka ayimweneña neyi hiyakeñeleña kuyikwasha aYudeyaku ilaña akeñeleña kukwasha eniRoma.
16. Yililwinyi yateleleli kwikala naweniKristu amuyaaka nkulakaji yakusambila hakwila nawu apuluki hayina mpinji yakala?
16 Nayuma yejimiyi muyitoñojoka, twatela kwiluka muloña wakonkomweneni Yesu hakunyakashana kwayina yuma. EniKristu akeñekeleña kudihana, nikubula kuditeja kukuluwañeshewa namaheta akumujimba. Ateleleli kudihana hakushiya, ‘yuma yadiñawu nayu yejima’ kulonda kwovwahila kusoñamisha kwaYesu. (Luka 14:33) Owu ovwahilili mukunyakashana nikutemukila kukabadi kekwawu kaYodana apulukili.
Tutwalekuhu Kwikala Nayitoñojoka yaKunyakashana
17. Muloñadi wutwatelela kukoleshela yitoñojoka yakunyakashana?
17 Wuprofwetu wamuBayibolu wamwekeshaña hatooka to-o nawu tunakushakama kukamwihi nampinji yakukumishaku. Twatela kwikala nayitoñojoka yakunyakashana, yakadi kwikalañahu dehi nayu. Mumpinji yakuwunda mushidika hatiyaña woma niwubanji wanjitaku. Hela chochu, chafumañamu neyi hakutwesha kwikala wasoñamaku nawa neyi amutambika kunjita chakumubajimwisha, hanatweshi kwikala wadiloñesha kuyuma yatama yinateli kwidikamuku. Hohamu nanjita yakuspiritu yitunakwasa. Neyi tujimbesha yitoñojoka yetu yakunyakashana, tunateli kukañanya kudamwina kulukukewa kunateli kutushikena nawa hitunateli kwiluka mpinji yakenza ifuku daYehovaku. (Luka 21:36; 1 Atesalonika 5:4) Neyi chakwila wumu ‘naleki kumulondela Yehova,’ ayinu diyi mpinji yakumukeña cheñi.—Zefwaniya 1:3-6; 2 Atesalonika 1:8, 9.
18, 19. Chumanyi chinateli kutukwasha kwanukaña chikupu ‘kwinza kwefuku daYehova’?
18 Dimuloña wunatukonkomweniyi kapostolu Petulu kwanukaña chikupu ‘chakenza ifuku daYehova’! Munjilanyi mutunateleli kwila mwenimu? Njila yimu hikwikala ‘ajila nakwakama Nzambi.’ (2 Petulu 3:11, 12) Kukalakala mpinji yejima nyidimu yamuchidiwu kunateli kutukwashaku kuchiñilila chikupu kwinza ‘kwefuku daYehova.’ Izu dachiGreek diyabalumunawu ‘kwanuka chikupu’ mwalala dalumbululaña nawu ‘kunyakala.’ Ilaña hitunateli kunyakesha mpinji yinashaliku nakushika tuhu nichakenza ifuku daYehovaku. Dichi, hampinji yitunakuhembelela ifuku denidi, neyi tunakukalakala chikupu nyidimu yaNzambi, mpinji yeniyi yikamwekana neyi yinamani swayi.—1 Akorinda 15:58.
19 Kutoñojoka Hezu daNzambi nikushinshikisha hayanukishu yekalamu chikatuleñela kukoña mwenimu—‘kuchiñilila chikupu (kutalila nikunyakashana) kwinza kwefuku’ denidi, mwalala twatela ‘kutwalekahu kudichiñilila.’ (2 Petulu 3:12) Muyanukishu yeniyi abombelamu wuprofwetu wawuvulu washimwineñahu dehi bayi neyi hakwinza kwefuku daYehova hohuku, ilaña nihankisu yayivulu yakakiswilawu owu ‘amuchiñililaña Yehova.’—Zefwaniya 3:8.
20. Kukonkomwenanyi kutwatela kwovwahila?
20 Mwalala ayinu diyi mpinji yakwovwahila kukonkomwena kwahanewa kuhitila mudi kaprofwetu Zefwaniya nawu: “[Hachidi] kuzuwa kwaYehova kwasweja kanda kuyiwani, niifuku dandombu yaYehova dichidi kanda diyiwani. Enu antu ahanu heseki mwadizoza, enu mwakoñaña mwaya wuñaji windi, keñakeñenu Yehova. Keñakeñenu kuloña, keñakeñenu kudizoza, wamba kela akayibatamisha mwifuku dakazuwayi Yehova.”—Zefwaniya 2:2, 3.
21. Antu jaNzambi akafwila kwila chumanyi muchaaka cha 2007?
21 Nsona yachaaka yinasakuluwu mukalenda kachaaka cha 2007, yatelela nankashi: “Ifuku daYehova deneni didi kwakwihi.” Antu jaNzambi aneluki chikupu nawu “didi kwakwihi, didi nakunyakala nankashi.” (Zefwaniya 1:14) ‘Hidakalabaku.’ (Habakuki 2:3) Dichi hampinji yitunakuhembelela ifuku denidi, lekenu twikali asoñama mpinji yejima mumpinji yitunakushakamamu, nakwanukaña nawu kushikijewa kwakukumishaku kwawuprofwetu weniwu kudi mukamwihi!
Munateli Kwakula?
• Komana “ifuku daYehova deneni” hichumanyi?
• Muloñadi antu amavulu chiyadiwilañawu kunyakashana kwampinji?
• Muloñadi eniKristu amunkulakaji yayaaka yakusambila chiyakeñekeleña kukalakala nayitoñojoka yakunyakashana?
• Munjilanyi mutunateleli kuswejeshelaku yitoñojoka yetu yakunyakashana?
[Mazu ekoku adi hefu 12]
Nsona yachaaka cha 2007 yikahoshaña nawu: “Ifuku daYehova deneni didi kwakwihi.”—Zefwaniya 1:14.
[Nyevulu yidi hefu 16, 17]
Neyi chichadiña mumafuku aNowa, akwakuseha akayishintakesha chakubajimwisha hampinji yakakoñahu Yehova chuma chimu
[Mwevulu wudi hefu 10]
EniKristu akoñeluhu chuma chimu chakadi kulaba hampinji yamwenuwu nawu Yerusalema “anayikuchiki dehi namajita kwi-ndo”