Kumwekesha Wushona Mwituña Datama

I YALA wumu wakuBurundi wakatili mashika chikupu. Dichi wakeñekeleña kushika kuchipatela chakadi kuumba mpinji. Hanu dinu wukuya ñahi kuchipatela? Kwosi motoka yakumutwala kuchipatela. Amabwambu jindi ayedi amukwashili. Amwinkeli hakaluwasha nakwenda hadi maora atanu munjila yanyikolu. Amukandamishili mubasi nakumutwala kuchipatela chadiñi kwakwihi. Chimwahitili mafuku antesha, watiyiluku chiwahi.

Mwituña dikwawu, chelili mpepela yaHurricane Katrina yinakisañani dehi Muhoñi waKaluñalwiji kuUnited States muAugust 2005, izanvu dawamayala atanu aweneni itala dahumwinuwu kudi nyitondu yachañukili. Awa amayala, abulili nikwilukawu kudi mwiniitala, azatili ifuku dejima nakufumisha nyitondu yakundukilili hetala nikuyiketola. Mwiniitala wahosheli nindi: “Nasweji kusakililaku nankashi.”

Yileji yakuhayamisha yahayikuzulemba kakavulu yahoshaña hakutama nihakujahañana. Kakavulu yileji yeniyi yakañeshaña antu kubula kumwekesha wushona niluwi ifuku nifuku. Hela chochu, ichi hichahimpaña chikuma chakwila nawu antu kumaluña ejima akeñaña chikupu kuyimwekeshela kukeña niwushona. Twakeñaña kutwitiyila wushona! Mazu amuchidiwu atiyakanaña nankashi hampinji yaKilisimasi, hampinji yahoshañawu antu amavulu hela kwimba ‘hakuwunda nikuwaha hakachi kawantu.’—Luka 2:14.

Kumwekesha wushona kwatela kukala mudinu ituña mudi kuhelañana nawa mwabula chisambu. Yililu yinavuli mudi antu yidi yakwila nawu kuzuwa nikubula kwakamena amakwawu kwaleñelaña muntu kwikala wamuzañalu nikushinda. Amakwawu alondelaña mazu akwila nawu chachiwahi kwikala namuchima watama kubadika kwikala namuchima wawushona. Lwisu nikudinyamuna kwakañeshaña wushona.

Chafumañamu, amavulu akeñaña kuditiyakesha, nikudiwula yitoñojoka yawantu amakwawu. Antu atiyakana mpuhu muyisela yawamayala niyiseki kakavulu ayimwekeshaña nawu “hiyamayala aweni” (achinchika) abulaña kumwekesha luwi. Dichi chelañawu anlomboli amakwawu amumatuña nachiyulu.

Hela chochu, twatela kudihula netu: Muloñadi wutwatelela kutiyila antu wushona? Komana mukumwekesha wushona mwafumaña yuma yayiwahi? Nawa chumanyi chikutukwasha kutiyila antu wushona? Chibaba chinalondeluhu chikwakula awa malwihu.

[Chikasha chidi hefu 3]

•Komana kutiyila antu wushona hichinjikijilu chakwikala wazeya?

•Komana muntu watiyilaña antu wushona waheteshaña amakwawu?

•Munjilanyi yayiwahi mumunateli kutiyila antu wushona?