Chimwatela Kwiluka Chikupu Bayibolu
1. Lombenu Kudi Nzambi Kulonda Yayikwashi
Ninfa wakwituña daItaly wahosheli nindi: “Mpinji yikwawu natañileña Bayibolu henohu kanda ninati mafwaha hakadidi. Nelileña mwenimu muloña nelukili nami Bayibolu hiIzu daNzambi hela chakwila hinakeñeleña kuyitañaku, nafwilileña kwiluka nsañu yasonekayi Nzambi muBayibolu. Nemikili chikonkwanyi chakumanisha kutaña Bayibolu. Hakutachika nadiñi nampwila akuyitaña, kutwala muna, natachikili kuwana nsañu yakala kutiya nawa yaleñeleli kuleka kuyitaña.”
MWATIYAHU dehi neyi chatiyili Ninfa? Antu amavulu dichatiyañawu. Neyi chashimunawu muchibaba chinafumuhu, Nsoneki yaBayibolu, Yehova Nzambi, wakeñaña nindi mwiluki chikupu Izu dindi. Hanu dinu, munateli kwiluka ñahi nsañu yamuBayibolu? Chuma chatachi, mwatela kumulomba Nsoneki yaBayibolu kulonda yayikwashi.
Apostolu aYesu ayimweneña neyi hiyantu “akadi kwiluka nyikanda” muloña hiyayili kumashikola awaYudeya kulonda kudiza jansakililuku. (Yililu 4:13) Hela chochu, Yesu wayilejeli nindi anateli kwiluka Izu daNzambi. Mujilanyi? Yesu walumbulwili nindi: ‘Nkwashi, diyi spiritu yajila, yakatemeshawu kudi Tata mwijina dami, diyi yakayileja yuma yejima.’ (Yowanu 14:26) Nzambi wazatishili spiritu yajila yeniyi hela ñovu yindi yazatikaña, hakuleña nachu iseki niyuma yejima yonaña. (Kutachika 1:2) Cheñi wayizatishili kulonda konena ansoneki akushika ku 40 kusoneka mazu indi muBayibolu. (2 Petulu 1:20, 21) Iyi spiritu yinateli cheñi kukwasha antu anakukeña kwiluka chikupu Bayibolu.
Munateli kutambwila ñahi spiritu yajila? Mwatela kwikala nachikuhwelelu hakulomba spiritu yajila. Nawa, mwatela kulomba chakadi kuleka. Yesu wahosheli nindi: ‘Lombenu akuyinka; neyi enu . . . muneluki kwinka anyanenu yamukunkulu yayiwahi, Tata yenu wamwiwulu wukubadika kuyinka awa akumulomba spiritu yajila.’ (Luka 11:9, 13) Yehova wahanaña spiritu yajila kudi antu ayilombaña namuchima wumu. Iyi ñovu yaNzambi yazatikaña yinateli kumukwasha muntu kwiluka nsañu yonenewa yasonekeluwu dehi muBayibolu. Spiritu yaNzambi yinateli cheñi kuyikwasha kwiluka chakuzatisha nsañu yayiwahi yamuBayibolu muchihandilu chenu.—Aheberu 4:12; Yakoba 1:5, 6.
Neyi himukutaña Bayibolu, mwatela kusambila kulomba kudi Nzambi, kulonda yayinki spiritu yajila yikuyikwasha kwiluka Izu dindi.