Kunakukeñeka Njila Yayeni Yakumanishilamu, Makabi Amukaayi Kejima

KUKABAKANA kudi mumpata yejima, nawa antu amavulu akweti wushona akwashaña anakukabakana. Chakutalilahu, antu azataña kuyipatela, achishilaña muyipatela kulonda kukwasha antu akata hela anadikatishi. Akwakujima kesi, akapokola, akwakutuña nshimbi, akwakupulwisha mawumi awantu, afwilaña kuwundisha hela kukañesha kukabakana kwawantu amakwawu. Nzatilu yamuchidiwu yakwashaña antu anakankili, ilaña muntu hela nfulumendi hiyatela kumanisha makabi mukaayi kejimaku. Kwambukaku, Nzambi nateli kumanisha makabi nawa wakaleta njila yayeni yakumanishilamu makabi.

Mumukanda wamuBayibolu wakukumishaku dimwekala kukana kweniku kwakwila nawu: “[Nzambi] wakayikombola madilu ejima kumesu awu; hikwakekala nawa cheñi kufwaku; hikwakekala nawa cheñi hela kuneña hela kudila hela kukataku. Yuma yakusambila yinahiti dehi.” (Chimwekeshu 21:4) Toñojokenu hakuvula kwawantu akatiya kuwaha nanichi chikaninu. Ichi chikaninu chamwekeshaña kufuukula kwaNzambi kwakumanisha makabi ejima. Wamba kakoña mwenimu kuhitila mukumanisha njita hamaseki, nzala, yikatu, nikutama, kushilahu niantu atama ejima. Kwosi muntu watela kukoña mwenimu.

Yuma Yikakoña Wanta waNzambi

Nzambi wakashikija kukana kwindi kuhitila mudi muntu wabadika ñovu mukuleña kwejima—Yesu Kristu wasañwiluwu. Mpinji yinakwinza yakayulayi Yesu neyi Mwanta chakadi kumukañesha mwahita iseki dejima. Antu hiyakayiyulaña kudi anyanta awantu, atujiña mpata, hela akulumpi jansañu jamatuña nachiyuluku. Ilaña, akayiyulaña kudi Mwanta wumu ninfulumendi yimu, dikwila nawu Wanta waNzambi.

Iwu Wanta wakafumishahu nfulumendi jawantu jejima. Kunyaka kwakweni, Bayibolu yashimwineñahu dehi nawu: ‘Nzambi wamwiwulu wamba kaloñesha wanta wakubula kukisika haya nyaka, wantowu hiyamba kawushiyila antu acheñuku; wakahumona mawantawa ejima puchi puchi, nakuyinoñesha, wakemana mbe haya nyaka.’ (Danyeli 2:44) Antu ejima hamaseki akanuñana hamu munfulumendi yimu yaloña—yaWanta waNzambi.

Mpinji yadiñayi hamaseki neyi muntu, Yesu wahosheleña haniwu Wanta mapampa kakavulu. Wawuteneni mukulomba kwachitalilu, nakuleja atumbanji twindi kulombaña nawu: “Wanta weyi winzi. Muchima weyi awili hamaseki neyi chawilañawu mwiwulu.” (Matewu 6:10) Talenu Yesu wahosheli nindi, Wanta awesekeja nakwila mwaya kukeña kwaNzambi hamaseki, nawa kukeña kwaNzambi kudi kwakumanisha makabi ejima heseki.

Nfulumendi yaloña yaNzambi yakaleta nkisu yinakañanyi kuleta nfulumendi yawantu. Anukenu nenu Yehova waheni Mwanindi neyi ifutu danyiloña kulonda antu akatambwili wumi wahaya nyaka. Muchiyulu chachiwahi chaWanta, antu ekekala awanina. Chumanyi chikafumamu? Yehova ‘wakaminya kufwa chahaya nyaka; Yehova wakakombola madilu mumesu awantu ejima.’—Isaya 25:8.

Antu amakwawu anateli kwihula nawu: ‘Muloñadi Nzambi chinabuliliyi kumanisha makabi? Chumanyi chahembelelañayi?’ Kafwampi Yehova chiña wafumishahu dehi makabi hela kukañesha makabi ejima. Ilaña, weteja makabi kutwalekahu, bayi neyi hamuloña walwisuku, ilaña kulonda anyanindi ahamaseki akahetelumu haya nyaka. Anvwali akweti kukeña anateli kwiteja anyanawu kuhita mukukala neyi eluka nawu mukafuma yuma yayiwahi yikayikwasha. Chochimu, kudi nyiloña yaleñelaña Yehova yeteji antu akabakaneña hakapinji kantesha, nawa nyiloña yeniyi ayilumbulula muBayibolu. Yabombelamu yuma yidi neyi wuswa wakufuukulahu, nshidi, ninsañu yahoshaña hakuloña kwachiyulu chaYehova. Bayibolu yalumbululaña cheñi nawu, chileñaleña wakuspiritu watama amwiteja kuyula kaayi hadi kapinji kantesha.a

Hela chakwila hitukutwesha kulumbulula nyiloña yejima hananu mafu anteshaku, kudi yikuma yiyedi yinateli kutwinka kuchiñeja nikutukolesha. Chatachi chinakuhosha nawu: Yehova wakatukiswila chikupu kubadika nimakabi itwamonaña. Hela chochu, Nzambi watukonkomwenaña nindi: “Yuma yakusambila hiyakayanuka nawaku, hiyakenza nikumuchimaku.” (Isaya 65:17) Nzambi wakafumishahu chikupu makabi haya nyaka, nikukabakana kwenzaña hamuloña wakwiteja yuma yatama yitwalekeñahu hakampinji kantesha.

Chikuma chamuchiyedi chidi chakwila nawu: Nzambi wafuukula mpinji yakadi kuhimpa yakamanishayi makabi. Anukenu nenu kaprofwetu Habakuki wamwinhwili Yehova kuleha kwampinji yaketejayi kuzuñazuña niyikonkojola yitwalekeñahu. Yehova wakwili nindi: “Chakumwaka wakutoñola dehi, . . . hichakalabaku.” (Habakuki 2:3) Neyi chitukudiza muchibaaba chinalondeluhu, iwu ‘mwaka wakutoñola dehi’ wudi mukamwihi.

[Tumazu twaheshina]

[Chikasha chidi hefu 7]

Nsona Jashimunaña Mpinji Yayiwahi Yakumbidi

HIKWAKELA CHEÑI MAJITAKU:

“Inzenu mutali nyidimu yakoñañayi Yehova; o mahembi anavulishiyi hanu hamaseki. Diyi wakumishaña majita mwakumina iseki dejima.”—Masamu 46:8, 9.

ANTAÑA JETU AKASAÑUKA:

“Kwamba kekala kusañuka kwawaloña nikwawabula kuloña.”—Yililu 24:15.

ANTU EJIMA AKEKALA NAYAKUDYA:

“Hanu hamaseki hansa jampidi jamaneni hakavula kabaka.”—Masamu 72:16.

HIKWAKEKALA CHEÑI KUKATAKU:

“Mwenimbu hakahosha nindi, Ami nakataku.”—Isaya 33:24.

ANTU ATAMA AKAYIFUMISHAMU:

“Hakwila antu atama akayifumisha mwituña, antu akwatilaña akwawu makasu akayibwitamu.”—Yishimu 2:22.

WUÑAJI WUKAWANINA KWEJIMA:

“Tiyenu, mwanta [Kristu Yesu] wakashakama muwanta chaloña, atulamba akayula mwawuñaji.”—Isaya 32:1.

[Nyevulu yidi hefu 7]

Wanta waNzambi wakamanisha makabi ejima itunakumona