Spiritu Yajila Yatwinkaña Ñovu Yakuumika Kweseka niChineñi

‘Chakenza spiritu yajila hadenu, mwakatambula ñovu.’—YIL. 1:8.

1, 2. Wukwashu wamuchidinyi wayikaniniyi Yesu atumbanji twindi, nawa muloñadi chakeñelañawu iwu wukwashu?

YESU welukili nindi atumbanji twindi hiyakutwesha kuhemba nshimbi jejima jayilejeliyi muñovu jawuku. Kushinshika hakutoha kwamudimu wakushimwina wayinkeliyi, ñovu jawayilumbu jawu, kuzeya kwanyijimba yawu, yuma yejimiyi yamwekesheli nawu akeñekeleña ñovu jabadika. Dichi henohu kanda yayi mwiwulu, Yesu walejeli atumbanji twindi nindi: ‘Chakenza spiritu yajila hadenu, mwakatambula ñovu, mwakela ayinsahu jami nimuYerusalema, nimwahita Yudeya mwejima, nimuSamariya, nikwakumina maseki.’—Yil. 1:8.

² Ichi chikaninu chatachikili kushikijewa haPentekosta 33 C.E. chelili spiritu yajila yinki ñovu atumbanji twaYesu Kristu kulonda ashimwini muYerusalema mwejima. Kwosi ikañesha datwesheli kulekesha mudimu wakushimwina. (Yil. 4:20) Atumbanji twaYesu ashinshika, kushilahu ninetu twakeñaña chikupu kutambwila iyi ñovu yakufuma kudi Nzambi, ‘mafuku ejima kushika nikwakakumina nyaka.’—Mat. 28:20.

3. Indi ñovu jafumaña kudi Yehova jinateli kutukwasha ñahi?

³ Yesu wakanini atumbanji twindi nindi ‘chakenza spiritu yajila hadenu, mwakatambula ñovu.’ Ñovu yenkañayi Yehova Nzambi Wabadika ambuñindi, yatuleñela kwikala nañovu yakukolela kukudihana kwetu kwawakwaKristu, nikutondolwela yuma yatama yatumwekenaña.—Tañenu Mika 3:8; Akolose 1:29.

4. Yumanyi yitukuhanjekahu muchinu chibaaba nawa muloñadi?

⁴ Ñovu yatwinkaña spiritu yajila yamwekenaña munjilanyi? Nawa spiritu yajila yinateli kutuleñela kwiladi hampinji yitukumona yuma yamboka-mboka? Hampinji yitunakufwila kumukalakela Nzambi nakashinshi, twamonaña kukala kwamboka-mboka, kwafumaña kudi Satana, hela mukaayi kindi katama indi kwiji hamuloña wakubula kuwanina kwetu. Dichi, twatela kutondolwela iku kukala kulonda tutwalekuhu kutatakena neyi akwaKristu, kushimwina mpinji yejima mumudimu wamwiha, nikwikala nawubwambu wawuwahi naYehova. Ichi dinu tutalenu spiritu yajila chiyatukwashaña hakushinda kweseka nikumanisha kuzeya nichineñi.

Atwinka Ñovu Jakuumika Kweseka

5. Kulomba kunateli kutukwasha ñahi?

⁵ Yesu walejeli atumbanji twindi kulombaña nawu: “Bayi wututwala mukwesekaku, ilaña twamwini kukutama.” (Mat. 6:13) Yehova hanateli kudiwula ambuñindi ashinshika amulombaña muniyi njilaku. Mpinji yimu Yesu wahosheli nindi: ‘Tata wamwiwulu wukubadika kuyinka awa akumulomba spiritu yajila.’ (Luka 11:13) Tuneluki chikupu netu Yehova watukana kutwinka spiritu yindi yatukwashaña kwila yuma yaloña. Hela chochu, hichinayi mukwila nawu Yehova wukutukiñaña kukwesekaku. (1 Kor. 10:13) Dichi neyi tuholokela mukweseka, twatela kulomba nankashi.—Mat. 26:42.

6. Yesu washindameneni hachumanyi hakumwakula Satana wamwesekeleña?

⁶ Yesu wazatishileña nsona, hakumwakula Diyabolu wamwesekeleña. Yesu welukili chikupu Izu daNzambi hakwakula nindi: “Anasoneki nawu. . . Anasoneki cheñi nawu . . . Fumaku eyi Satana, muloña anasoneki nawu, Kadifukulaña kudi Yehova Nzambi yeyi, wakakalakelaña yena hohu kanka windi.” Kumukeña Yehova niIzu dindi kwamuleñeleli Yesu kukaana yuma yekoku yamwesekeluwu nachu kudi Mukwakweseka. (Mat. 4:1-10) Chelili Yesu yatwalekuhu kukaana kweseka, Satana wamushili.

7. Bayibolu yatukwashaña ñahi kushinda kweseka?

⁷ Chineli Yesu washindameneni haNsona hakwila nawu yashindi kweseka kwaDiyabolu, anetu nawa twatela kwila mwomumu! Eñañi, hakwila nawu tumushindi Diyabolu, twatela kusambila kwiluka nshimbi jaNzambi nikukakelaku chikupu. Antu amavulu neyi adiza Nsona nawa eluka maana aNzambi nikuloña kwindi atachikaña kulondela nshimbi jamuBayibolu muchihandilu chawu. Eñañi, ‘izu daNzambi’ dikweti ñovu yakushinshika “yitoñojoka niyafuukulaña muchima.” (Heb. 4:12) Neyi muntu yatañaña nikutoñojoka chikupu haNsona, wukusweja kwiluka ‘mwaya nsañu yaYehova yalala.’ (Dan. 9:13) Chineli awa mazu alala, twatela kutoñojoka chikupu hansona yinakuhosha hakuzeyazeya kutukweti.

8. Munjilanyi mutwatela kutambwila spiritu yajila?

⁸ Yesu washindili kweseka, muloña welukili nsañu yamuNsona nawa wadiña ‘wenzala spiritu yajila.’ (Luka 4:1) Hakwila nawu twikali nañovu yakushinda kweseka, twatela kukundama kwakwihi naYehova kuhitila mukuzatisha njila jejima mutwatambwilaña spiritu yajila, chidi neyi kudiza Bayibolu, kulomba, nikudikunda nawamana kwetu niahela. (Yak. 4:7, 8) Antu amavulu ahamekaña hakuwaha kwekala mukudikita chikupu nyidimu yawakwaKristu, muloña yayikwashaña kusha maana kuyuma yakoleshaña yakuspiritu.

9, 10. (a) Kwesekanyi kwavula nankashi mwiluña dimwashakamaña? (b) Indi kutoñojoka chikupu nikulomba kunateli kuyinka ñahi ñovu yakushinda kweseka hela neyi munazeyi?

⁹ Kweseka kwamuchidinyi kumwatela kushinda? Komana mweñilahu dehi mukweseka kwakukeña kukenkama namuntu wabula kwikala mwini kwenu? Neyi kanda mwiñili mumaluwi, komana mwamonaña kukala kwakufwila kudiluka namuntu wabula kwitiya wakudisumbula nindi? Hakutala chisanji chanyivwimbimbi hela hakuzatisha Intaneti, mukukasumwisha akwaKristu anateli kwikala mukweseka kwakutala nyevulu yinakumwekesha yuma yatama. Neyi chumichi chayimwekenahu dehi, mwelili ñahi? Chikuwaha neyi mutoñojoka njila yatama chiyinateli kutulombola kujila yikwawu nikutuleñela kuvulumuna chikupu. (Yak. 1:14, 15) Toñojokenu chimwatela kumuneñesha Yehova, chipompelu, nichisaka chenu neyi muvulumuna. Dichi, neyi mutwalekahu kuhemba nshimbi jaNzambi nakashinshi, mukwikala nachilenji chachiwahi. (Tañenu Masamu 119:37; Yishimu 22:3.) Neyi mwiñila mukweseka kwamuchidiwu, mwatela kulomba hakwila ayinki ñovu yakushinda iku kweseka.

¹⁰ Kudi chuma chikwawu chitwatela kwanukaña kutalisha hakweseka kwaDiyabolu. Yesu amwesekeli kudi Satana hanyima yakujiñujoka nanzala hadi mafuku 40 mwisaña. Chakadi nikujina, Diyabolu welukili nindi iyi yadiña ‘mpinji yayiwahi yakwesekelahu’ kashinshi kaYesu. (Luka 4:13) Anetu nawa Satana wakeñaña kuwana mpinji yayiwahi yakwesekelahu kashinshi ketu. Dichi, twatela kutwalekahu kwikala akola kuspiritu. Kakavulu Satana wesekaña muntu neyi yamona nindi nazeyi. Dichi neyi tuzeya hela tuneña, twatela kufwila chikupu kulomba wukwashu waYehova nispiritu yindi yajila.—2 Kor. 12:8-10.

Atwinka Ñovu Yakuumika Kuzeya niChineñi

11, 12. (a) Muloñadi antu amavulu chinakuneñelawu makonu? (b) Chumanyi chikutwinka ñovu yakuumika chineñi?

¹¹ Hamuloña wakubula kuwanina, mpinji yikwawu twaneñaña hama. Sweje-e makonu muloña tunakushakama mumpinji yakala nankashi, yakwila muchidi wawantu kanda wumoneñahu dehi kukala kutunakumona makonu. (2 Tim. 3:1-5) Chineli njita yaAmagedoni hiyikushika kukamwihi, kukala kwamali, chineñi nikukala kukwawu kunakuswejelaku. Chumichi hichatela kutuhayamishaku, hakumona amakwawu anakukañanya kwakamena yisaka yawu nikuyinka yuma yakumujimba. Anakuzeya nankashi, nawa anakukañanya nikuzata nyidimu yawu. Neyi dikukala kumunakumona, munateli kuumika ñahi?

¹² Anukenu nenu, Yesu walejeli atumbanji twindi nindi wakayinka nkwashi, spiritu yaNzambi yajila. (Tañenu Yowanu 14:16, 17.) Iyi diyi ñovu yabadika nankashi mukuleña kwejima. Kuhitila muspiritu yajila, Yehova nateli ‘kutwilila mwabadika nankashi’ nakutwinka ñovu jakuumika kweseka kudi kwejima. (Efwes. 3:20) Kapostolu Pawulu wahosheli nindi, neyi tushindamena haspiritu yajila, tukutambwila “ñovu jabadika,” hela chakwila ‘anakutukabisha mbadi jejima.’ (2 Kor. 4:7, 8) Yehova hatukana nindi nateli kumanisha chineñuku, ilaña watuleja nindi kuhitila muspiritu yindi nateli kutwinka ñovu yakuumika iku kukala.—Fwi. 4:13.

13. (a) Indi kansi wumu amwinka ñahi ñovu yakuumika kukala? (b) Kudihu antu amakwawu imweluka anakumona kukala kwamuchidiwu?

¹³ Talenu chakutalilahu chaStephanie payiniya wampinji yejima wudi nayaaka 19 yakusemuka. Hadiñayi nayaaka 12 wakatili kalepa nawa amuwanini nachikatu chakuwoñu. Kufuma hakatiliyi, amuladikili kapampa kayedi, amuukahu dehi munjila yikwawu nawa wakatili cheñi chikatu chakalepa kapampa kayedi, chaleñeleli yiidi yakuchimunswa yileki kuzatisha chiwahi nawa hamweshañaku. Stephanie wazatishaña ñovu yikwetiyi kulonda yazatiku nyidimu yalema nankashi, yidi neyi kuya kukupompa kwawakwaKristu nikuzata mudimu wakushimwina. Hela chochu, wamonaña spiritu yaYehova chiyamukwashaña kuumika muyuma yayivulu. Nyikanda yashindamena haBayibolu mwasonekawu yuma yamwekeneni akwawu akwaKristu yamukoleshaña nankashi neyi naneñi. Amana kwetu niahela amukwashaña kuhitila mukumusonekela nyikanda hela kuhosha mazu akumukolesha henohu kupompa kanda nihanyima yakupompa. Antu amwekeshaña mpwila yakudiza niwena amuhamekaña Stephanie hayuma yayidizishañayi kuhitila mukumwendela kwitala dindi kulonda yayidizishi nshimbi yamuBayibolu. Stephanie wamuhamekaña Yehova hayuma yejimiyi. Nsona yaMasamu 41:3 diyakeñeshayi nankashi nawa wakuhwelela nindi iyi nsona yinashikijewi hadi yena.

14. Chumanyi chitwatela kutondolwela neyi tunaneñi nawa muloñadi?

¹⁴ Neyi tunazeyi hela tudi mukukala, bayi tutoñojoka netu twatela kumanisha iku kukala neyi tuleka nyidimu yakuspirituku. Neyi tuleka tukuluwañesha nankashi. Muloñadi? Muloña nyidimu yidi neyi kudiza Bayibolu nkawenu hela nachisaka, kushimwina mumudimu wamwiha, nikuya nakupompa diyi njila mutwatambwilaña spiritu yajila yatukoleshaña. Nyidimu yawakwaKristu yatunookeshaña. (Tañenu Matewu 11:28, 29.) Kakavulu amana kwetu niahela enzaña nakupompa iku anazeyi, ilaña hanyima yakupompa ñovu jawu jafuntañamu.

15. (a) Komana Yehova wakana nindi akwaKristu yuma yejima yikuyipelelaña? Lumbululenu kwesekeja nachahosha Nsona. (b) Chumanyi chatukanayi Nzambi, nawa lwihwinyi lutwatela kudihula?

¹⁵ Hela chochu, bayi neyi mudimu wawakwaKristu wakwilisha atumbanji wapelaku. Chakeñekaña kuzata nañovu hakwikala akwaKristu ashinshika. (Mat. 16:24-26; Luka 13:24) Dichi, kuhitila muspiritu yajila Yehova nateli kukolesha antu azeya. Kaprofwetu Isaya wasonekeli nindi: “Hakwinza awa achiñililaña Yehova, ñovu jawu jakabalumuka jajiha; akajindama nampuula hewulu jinda-a neyi ambuulu; akenda lufuchi chakubula kuyihwa, akenda chakubula kuzeya.” (Isa. 40:29-31) Twatela kudihula netu, chumanyi chaleñelaña tutiyeña netu nyidimu yawakwaKristu yatuzeyeshaña?

16. Chumanyi chitwatela kwila kulonda tukehesheñaku yuma yatuzeyeshaña hela yatuneñeshaña?

¹⁶ Izu daYehova datukonkomwena ‘kushinshika yuma yabadika kulema.’ (Fwi. 1:10) Pawulu wesekejeli chihandilu chawakwaKristu nalwendu lwalulehi lwahamaseki, hamonenenuwu kusoneka nindi: “Tutentekenu yuma yikutulemenaña yejima . . . , tutatakenenu nakutemuka njila yanatupiminuwu.” (Heb. 12:1) Dichi wahosheli nindi twatela kutondolwela kufwila yuma yamukunkulu, niyuma yikutulemena, yinateli kutuzeyesha. Hadaha etu amakwawu tunakusweja kudilumbikila nyidimu yayivulu yinabadiki hañovu yetu. Dichi neyi munakusweja kuzeya nikudakamena, mwatela kushinshika chimwazataña nyidimu yakumujimba, kwendujoka munyidimu yachiseki, nikusweja kufwila yisela yakudibecha hela yisela yikwawu. Maana nikwovwaha kukutuleñela kwiluka hanakumini ñovu jetu nikukeheshaku nyidimu yabula kulema.

17. Muloñadi antu amakwawu chaneñelañawu, nawa Yehova watukana nindidi?

¹⁷ Hadaha antu amakwawu hakachi ketu anakuneña muloña kukuma kwakaayi kamakonu kanda kushiki kwesekeja nachitwakuhweleleli. (Yish. 13:12) Dichi, antu anakuneña, atela kukoleshewa namazu ekala hamukanda waHabakuki 2:3 akwila nawu: “Chimwenu ichi chichidi kanda, chakumwaka wakutoñola dehi, chidi nakunyakala chishiki kunsa, hichakatwambaku. Hela chikulabajala, chichiñilili, muloña chakenza chalala, hichakalabaku.” Yehova watukana nindi kukuma kwakanu kaayi kwakenza hampinji yindi yatoñolayi!

18. (a) Yikaninwinyi yayikoleshaña? (b) Indi chibaaba chinahiñuhu chikatukwasha ñahi?

¹⁸ Chakadi nikujina, ambuña aYehova ejima ashinshika atalilaña ifuku dakamana kuzeya nichineñi, nawa antu ejima ‘akafunta cheñi muwukwenzi.’ (Yoba 33:25) Hela tuhu makonu, wuntu wetu wamukachi wunateli kukola kuhitila muñovu yaspiritu yajila chitukukalakalaña chikupu munyidimu yakuspiritu. (2 Kor. 4:16; Efwes. 3:16) Bayi kuzeya kuyileñeli mukakañanyi kutambwila nkisu jahaya nyakaku. Kweseka kwejima, chili kunakwinza hamuloña wakuzeya, hela chineñi, kunateli kumana hayinu mpinji hela mwituña daNzambi dadiha. Muchibaaba chinahiñuhu, tukadiza spiritu yajila chiyakwashaña akwaKristu kuumika makabisha, kutondolwela ikakeja datama, nikuumika yihuñu yamboka-mboka.

Mukwakula Nenudi?

• Kutaña Bayibolu kwatukoleshaña ñahi?

• Indi kulomba nikutoñojokahu chikupu kwatukoleshaña ñahi?

• Munateli kutondolwela ñahi yuma yaletaña chineñi?

[Mwevulu wudi hefu 24]

Kupompa kwawakwaKristu kunateli kutukolesha kuspiritu