Kundamenu Kwakwihi Nanzambi
“Eyi Yehova, . . . Wunañiluki”
NSONEKI Arthur H. Stainback wasonekeli nindi: “Kukala kutwekala naku wejima wetu hikwiluka netu kwosi muntu watwakamenaña hela kututiyishisha.” Komana ninenu dichimwatiyaña? Komana mwatoñojokahu dehi nenu kwosi muntu wayakamenaña hela kwiluka kukala kumwamonaña nawa heluka chimwatiyañaku? Neyi dichi mwatiyaña awa mazu anateli kuyikundeja: Yehova wakamenaña chikupu akwakudifukula indi chakwila weluka yuma yejima yamwekanaña muchihandilu chawu. Mazu aDavidi ekala haMasamu 139 atulejaña chikupu nawu Nzambi watwakamenaña.
Hamuloña wakwila Davidi wamukuhweleleli Nzambi, wahosheli nindi: “Eyi Yehova, wunantali chachiwahi, wunañiluki.” (Vasi 1) Davidi wazatishili mazu amawahi chikupu. Mazu achiHeberu akwila nawu ‘kutala chachiwahi’ atalisha mukwimba wuneñu (Yoba 28:3), kutalatala chachiwahi ituña (Ansompeshi 18:2), hela kushinshika hamuloña kulonda kwiluka wunsahu walala (Kuhituluka 13:14). Eñañi, Yehova watwiluka chiwahi chikupu, chidi neyi kwiji washinshikaña yililu yetu yejima nichitwahandaña. Davidi watudizishaña nindi Nzambi washa maana hadi ambuñindi hamuntu hamuntu. Wayitalaña chachiwahi nawa wayiluka hamuntu hamuntu.
Hakulumbulula chashinshikañayi Nzambi chikupu Davidi wahosheli nindi: ‘Eyi weluka nichinashakamaña nichinanyamukaña, washinshikaña munatoñojokaña hela hiwuchidi kwakulehi.’ (Vasi 2) Munjila yikwawu, Yehova wekala “kwakulehi,” mwiwulu mwashakamañayi. Ilaña welukaña chitwashakamaña, hadaha nampinji yamelela, hakuhinduka nantetemena nihakuzata nyidimu yetu yamafuku ejima. Weluka cheñi yuma yitwatoñojokaña niyitwakeñaña. Komana Davidi watiyileña woma muloña wakwila Yehova wamushinshikileña chikupu? Nehi, watiyileña kuwaha kumushinshika chikupu. (Vasi 23, 24) Muloñadi?
Davidi welukili nindi Yehova wafwilaña kushinshika ambuñindi munjila yayiwahi. Davidi wabombeleluhu haniyi nsañu hasonekeliyi nindi: ‘Nichinendaña nichinakamamaña eyi wantalaña, weluka ninjila jami jejima.’ (Vasi 3) Ifuku niifuku Yehova wamonaña ‘njila jetu jejima,’ yiluwa yetu ninyidimu yetu yayiwahi. Komana washinshikaña hayiluwa tahindi hayuma yayiwahi? Izu dachiHeberu dasonekawu nawu ‘watalaña’ dinateli kutalisha “mukusala” hela “kuhuña” neyi chahuñañayi ndimi muzuñu hakwila kushali mbutu yayiwahi. Nhoshelu yakwila nawu “weluka” neyi ayibalumuna mwizu dachiHeberu yinateli kulumbuluka nawu “kwakamena.” Yehova walemeshaña yuma yayiwahi neyi nakushinshika yuma yahoshañawu hela yelañawu akwakudifukula indi mafuku ejima. Muloñadi? Walemeshaña chiyazatañawu nañovu hakwila nawu amuzañalesheña.
Mukanda waMasamu 139 watudizishaña nawu Yehova wayakamenaña chikupu akwakudifukula indi. Wayishinshikaña nawa wayimonaña chahandañawu mafuku ejima. Cheñi weluka makabi amonañawu, nawa weluka chatiyañawu kutama muloña wayuma yayiyandishaña. Komana kwila yumiyi yiyisañumuna kudifukula kudi Nzambi wakamenaña muniyi njila nehi? Neyi mwila mwenimu, mwatela kwiluka chikupu nenu: Yehova hamba “kavulamena mudimu wenu hela kukeña kumwakeñeli ijina dinduku.”—Aheberu 6:10.