Bayibolu Yahimpaña Yihandilu Yawantu
CHUMANYI chakojejeli kankaña wumu kufunta munsakililu mwafuminiyi? Ditiyilenu chikulumbululayi.
“Chayinu Mpinji Nidi Namuzañalu Nankashi.”—LISA ANDRÉ
CHAAKA CHAKUVWALIKA: 1986
ITUÑA KWAFUMAYI: LUXEMBOURG
KUHANDA KWINDI: MWANA WAJIMBELI
CHIHANDILU CHAMI CHAKUNYIMA: Nakulilili mumbaka yanyanya yaBertrange, mbaka yawunyonji, mwabula ayiluwañimbi nawa yamaheta yadikumashana namusumba waLuxembourg. Twavwalika atanu, ilaña yami kabinda. Anvwali jami hiyaYinsahu jaYehova nawa azatili nañovu kutudizisha nshimbi jawakwaKristu.
Muyaaka yami yatachi yawunkaña, natachikili kujinoka nankashi hayuma yatañishileña aYinsahu jaYehova. Hatachi, nashiluku muchima wanyi, nkumininaku chikuhwelelu chami chatachikili kuzeya chovu-chovu. Anvwali jami ankwashili mweneni hama nawu nendeña munjila yaloña, ilaña ami matu pati. Natachikili kukulujoka nawakwetu abulileña kulemesha akulumpi chakadi anvwali kwiluka. Nakeñeleña kwikala wakasunuka neyi chadiñawu akwetu. Twayileña kuyidika, twaluwileña, kuzatisha yitumbu yashetana nikunwa walwa. Hatachi, natiyileña kuwaha kwikala nawantu amwekeneña neyi anakuleña chikupu.
Kuhosha hohu chalala, hinadiña namuzañalu wawenuku. Kudikunda nanawa akwetu kwaneñesheleña; kwosi wañakameneneña. Dichi, muchima wakatileña hakumona yuma yatama chiyatandileña mwituña. Mukuhita kwampinji, natachikili kuneña nankashi.
BAYIBOLU CHIYAHIMPILI CHIHANDILU CHAMI: Ifuku dimu, henohu nidi nayaaka 17, naneñeli nankashi. Amama chelukiluwu nawu naneñi, anlejeli nawu nitachiki kudiza cheñi Bayibolu. Anlejeli kushinshika hantañishilu yachu kulonda nifuukuluhu neyi chakwila natela kulondela yumiyi hela nehi. Nsañu yinahanjikili nawamama chiwahi yankojejeli ami kubalumuka chikupu. Netejeli kudiza Bayibolu nawayaya aCaroline niamwini kwawu Akif. Eshaku Akif hiyadiña aChinsahu chaYehovaku, ilaña chakuliluwu etiyili. Chihandilu chawaAkif chakunyima, chankwashili ami kuyileja yuma yejima yinakoñeli nawa nahetelelumu.
Nelukili nami kwila nikala Chinsahu nehi muloña wayuma yinakoñeleña. Hatachi, natoñojokeli nami nadifuukwilili ami aweni yuma yinakoñeleña. Ilaña, chinadizili Bayibolu, nelukili nami yililu yami yamuneñesheleña Yehova. (Masamu 78:40, 41; Yishimu 27:11) Nelukili cheñi nami niantu amakwawu aneñeleña.
Chinatwalekeluhu kudiza Bayibolu, naweni wunsahu walala wankwashili kwiluka nami mwalala Bayibolu Hiizu daNzambi. Chakutalilahu, nelukili wuprofwetu wamuBayibolu wawuvulu wunashikijewi, chakadi kulweza. Yuma yinadizili yankwashili kubula kwikala cheñi namuchima wakujinoka.
Chimwahitili chaaka chimu kufuma hinatachikili kudiza Bayibolu, ami nianvwali jami twayili nakutala yayami weyala wazatilaña hakasanji kamutayi kawaYinsahu jaYehova muGermany. Chinamweni nami mana kwami wudi namuzañalu, natiyili kuwaha nankashi. Iwu diwu muzañalu wunakeñeleña! Nazañaleli cheñi hakumona aYinsahu amakwawu azatilileña hamutayi. Hiyadiña neyi ayipwapwoki, antu akeña kudizañalesha aweni inakulujokeleña nawuku. Chimwahitili mpinji, nalombeli chakufuma hamuchima kudi Yehova, nakumukana nami nakamuzatilaña mukuhanda kwami kwejima. Chinashikijili yaaka 19, nadiheni kudi Yehova muchipapatishu.
CHINAHETELUMU: Chayinu mpinji nidi namuzañalu nankashi. Nazañalalaña hakuleja antu nsañu yamuBayibolu nikuyikwasha kulonda amwiluki Yehova niyuma yakanayi yakamwekana kumbidi. Chisaka chami nichena chinahetelumu, ichi hiyañakamenañaku.
Neluki yiluwa yinakoñeli kunyima, ilaña hinashaña muchima hayumiyuku. Nasha muchima hadi Yehova nami yañanakeni nihakukeña kwankeñayi. Neteji namuchima wami wejima mazu adi haYishimu 10:22 ahosha nawu: “Nkisu yaYehova yaheteshaña muntu, habombelañaku kukalaku.”
[Mazu ekoku adi hefu 10]
“Twayileña kuyidika, twaluwileña, kuzatisha yitumbu yashetana nikunwa walwa”
[Mazu ekoku adi hefu 11]
“Neluki yiluwa yinakoñeli kunyima, ilaña hinashaña muchima hayumiyuku”