Komana Nakwilu Yenu Yinateli Kuyikwasha?

“Chinashikijili yaaka ikumi, natachikili kukama nawamayala. Twasambilileña kudikwata kumakasa nakudifufwa. Nkumininaku, tutachika nikudikwata hayiidi yikwawu yamujimba nakwila yuma yejima yatiyishaña muntu wuvumbi. Chinashikijili yaaka 15, natachikili kuzata nawa amayala hamudimu akeñeleña hohu nawu nikameña nawu. Nakeñeleña kwikala muntu wabula nsonyi nikwila yuma yejima yakoñeleñawu akwetu. Nakeñeleña nami akwetu ankeñi, dichi natachikili kukulujoka nawamayala nakwila wujila.”—SARAH,a AUSTRALIA.

MUNATELI kuhayama neyi ayileja nawu Sarah wafumini muchisaka chawakwaKristu adihana? Anvwali jindi amukwashili kulonda yalondeleña nshimbi jajiwahi jamuBayibolu. Ilaña Sarah washili muchima hachuma chacheñi.

Antu amavulu anateli kwiteja mwafuukwiliyi Sarah. Atoñojokaña nawu nsañu yahosha Bayibolu hansañu yakubulakana kweyala namumbanda hiyinateli kuzatika makonuku. Amakwawu ahoshaña nawu muntu nateli kwikala wetiya hampinji yoyimu nikwila wuvumbi.

Munateli kuhetelamu neyi mwiluka nikulondela yuma yatañishaña Bayibolu hansañu yakubulakana kweyala namumbanda tahindi nehi? Bayibolu yahoshaña nawu “ayonena dehi kudi Nzambi; yawaha kuleja nachu.” (2 Timotewu 3:16) Neyi muneluki nenu Nzambi diyi waleñeli antu nawa nenu Bayibolu Hiizu dindi donenayi, mwatela kusha muchima hansañu yahoshaña Bayibolu.

Okuhalwa, antu amavulu aluwankanaña hakutiya chatañishaña Bayibolu hansañu yakubulakana kweyala namumbanda. Akulumpi jansakililu ahoshaña nawu alemesha Bayibolu atañishaña yuma yambuka. Nsañu yakubulakana kweyala namumbanda yinaambuli yuma yamaneni yakuhwelelawu mumachechi.

Chatela mutiyilileña hohu mutunwa twawantu, komana kwila mudisandujolela enu aweni nehi? Chibaaba chinalondeluhu chikwakula malwihu ikumi avula kwihulawu antu hansañu yahosha Bayibolu kutalisha hakubulakana kweyala namumbanda. Munichi chibaaba, mukuwanamu ñakwilu yayiwahi yinashindameni hayuma yatañishaña Bayibolu. Chibaaba chakukumishaku chikuhosha hayuma yitwafuukulaña chiyinateli kutukwasha.

[Tumazu twaheshina]