Malwihu Ikumi Ehulañawu Hansañu Yakubulakana Kweyala Namumbanda

Anayakuli 1 Komana aAdama naEvu elili nshidi yawuvumbi mwitempa daEdeni?

▪ Ñakwilu: Antu amavulu atoñojokaña nawu mutondu wakaanishiluwu mwitempa daEdeni wemenañaku kukama namumbanda. Ilaña, Bayibolu hidimu yatañishañaku.

Toñojokenu: Henohu Evu kanda amuleñi, Nzambi wamulejeli Adama nindi bayi wakadya ‘kumutondu wakwiluka nachu yayiwahi nayatamaku.’ (Kutachika 2:15-18) Chineli Adama wadiña nkawindi, dikwila nawu ilu lushimbi hilwahosheleña hakukama namumbandaku. Cheñi nawa, Nzambi wayinkeli aAdama naEvu lushimbi lwaluwahi nindi ‘semununenu, muvuli, muwanini heseki.’ (Kutachika 1:28) Komana Nzambi wukweti kukeña wadi kuleja adisumbula atachi ‘kuwanisha iseki,’ chuma chabombelelumu kubulakana, kufumahu yayinka muloña wakufwa hamuloña wakwovwahila mwayilejeliyi?—1 Yowanu 4:8.

Kubombelahu, Evu watachikili “kukumuna nyikabu [yakaanishiluwu] nakudya” henohu nfumwindi hosiyi. “Nkumininaku yomwinkahu ninfumwindi adiñayi nindi niyena hakudya.”—Kutachika 3:6, NW.

Nawa, aAdama naEvu hiyayihosholeli hakubulakana nakutachika kusema nyanaku. (Kutachika 4:1, 2) Dichi, mukabu wadiiluwu aAdama naEvu bayi neyi wemeneneñaku kwila wuvumbuku ilaña wadiña mukabu woweniwu wamenaña kumutondu.

2 Komana Bayibolu yakaanisha kukaama namumbanda hela iyala?

▪ Ñakwilu: Mukanda watachi wamuBayibolu washimuna nawu Nzambi diyi waleñeli antu “niiyala nimumbanda.” Nzambi yohosha nikuhosha nindi yuma yaleñeliyi “yinawahi nankashi.” (Kutachika 1:27, 31) Nkumininaku, Nzambi woneneni nsoneki waBayibolu wumu kuleja amayala iji nshimbi nindi: “Luñaku nañodeyi wakuwukwenzi weyi. . . . Mayeli indi akutiyishaña kuwaha mafuku ejima.” (Yishimu 5:18, 19) Komana awa mazu anakumwekesha nawu Bayibolu yakaanishaña antu kubulakana?

Kudi chuma chikwawu chitukubombela hakuvwala nyana, Nzambi waleñeli yiidi yalusemu kulonda eyala namumbanda amwekesheleñamu kukeña kudi mwinikwawu nakudizañalesha wonsu wawu. Kudikunda kwamuchidiwu kwazañaleshaña kumujimba nimuyitoñojoka yeyala namumbanda adikeña nankashi.

3 Komana Bayibolu yeteja eyala namumbanda abula kudisumbula kwesekeja nanshimbi kushakama hamu?

▪ Ñakwilu: Bayibolu yalumbulula hatooka nawu “Nzambi wakasompesha akwakubajama.” (Aheberu 13:4) Izu dachiGiriki dakubajama, por·neiʹa, dahosha hayuma yayivulu yakundama kukuzatisha chatama yiidi yalusemu hakachi kawantu abula kudisumbula.a Dichi, akumuvulumuna Nzambi neyi eyala namumbanda atachika kushakama hamu hela chakwila akakeña kudisumbula kumbidi.

Hela chakwila eyala namumbanda anadikeñi nankashi, Nzambi wakeñaña nindi atela kudisumbula henohu kanda atachiki kubulakana. Nzambi watuleñeli nawuswa wakumwekesha kukeña. Nawa Nzambi wukweti chililu chabadika chakukeña. Kudi chuma chachiwahi chaleñelaña yakoleluhu nindi eyala namumbanda adisumbula hohu diwu atela kubulakana, neyi chinalumbululi chibaaba chinalondeluhu.

4 Komana wuhadi wawuwahi?

▪ Ñakwilu: Kunyima, Nzambi wetejeli iyala kusumbula ambanda amavulu. (Kutachika 4:19; 16:1-4; 29:18–30:24) Ilaña Nzambi hidiyi waleteli isambu dawuhanduku. Wamwinkeli Adama mumbanda wumu hohu.

Nzambi wamwitejeli Yesu Kristu kufuntisha lushimbi Lwindi lwatachi lwakusumbula mumbanda wumu hohu. (Yowanu 8:28) Chamwihwiluwu hansañu yamaluwi, Yesu wahosheli nindi: “Himunatañi nsañu yakwila nawu, wayileñeli hatachi, wayileñeli niiyala nimumbandaku, tahindi? nindi, Dichi muntu ashiyi tata yindi nimama yindi, akakeli iñodindi, niwena ayedi akekali mujimba wumu.”—Matewu 19:4, 5.

Chimwahitili yaaka, kambanji kaYesu wumu amoneneni kudi Nzambi hakusoneka nindi: “Amayala ejima adi kwikala nawañodi jawu, niambanda ejima adi kwikala nawanfumu jawu iwu nawindi, iwu nawindi.” (1 Akorinda 7:2) Bayibolu yashimuna cheñi nawu iyala wejima wasumbula wudi muchipompelu chawakwaKristu wukwinkawu kukooleka watela kwikala ‘iyala wukweti mumbanda wumu.’—1 Timotewu 3:2, 12.

5 Adisumbula akuvulumuna neyi afuukulahu kuzatisha yitumbu yakukañesha lusemu?

▪ Ñakwilu: Yesu halejeli atumbanji twindi kuvwala nyanaku. Niatumbanji twaYesu hiyalejeleña antu nsañu yakukañesha lusemuku. Nawa kwosi halumbululawu jiika muBayibolu nsañu yakukañesha lusemu.

Adisumbula atela kudifuukwila neyi anakukeña kuvwala nyana hela nehi. Atela kwiluka cheñi naambala yanyana yakavwalawu nimpinji yikatachikawu kukwata kuñoji. Neyi eyala namumbanda akuzatisha njila yakubula kusulumuna yakukañeshelamu lusemu kulonda mumbanda yabuli kwimana mumukala, awenawu akudifuukwila.b Kwosi watela kuyinka muloñaku.—Aroma 14:4, 10-13.

6 Komana kufumisha ivumu hinshidi?

▪ Ñakwilu: Wumi wajila kumesu aNzambi, nikafuña wakamonaña nindi himuntu yomweni. (Masamu 139:16) Nzambi washimwini nindi muntu wakakatisha mwana wuchidi kanda yavwaliki akamwinka muloña. Kumesu aNzambi, muntu wukukisañana mwana wuchidi kanda yavwaliki najahañani.—Kwidika 20:13; 21:22, 23.

Indi neyi kunamwekani kukala kweneni hampinji yakusampuluka kunakojeji adisumbula kutondahu kupulwisha wumi wamama yawantu kulonda mwana yafwi hela kupulwishaku mwana kulonda mama yawantu yofwi? Neyi chikala mwenimu, adisumbula atela kutondahu watela kupulwishawu.c

7 Komana Bayibolu yeteja kudiseña?

▪ Ñakwilu: Bayibolu yeteja adisumbula kudiseña. Hela chochu, Yesu wateneni chuma chimu hohu chakumanishilahu maluwi, nindi: ‘Yowu muntu wukuseña iñodindi, chiña namuloña wawuvumbi hohu [kukama namuntu wacheñi], nakusumbula wacheñi, neli wuvumbi.’—Matewu 19:9.

Nzambi wahela antu avubaña nsañu kulonda adiseñi. Nzambi wakababesha ejima ashiyaña enikwawu hayuma yamukunkulwayi, sweje-e neyi anakukeña kusumbula hela kusumbuka namuntu wacheñi.—Malaki 2:13-16; Maku 10:9.

8 Komana Nzambi weteja wutumwa?

▪ Ñakwilu: Bayibolu yakaanisha wujila, kushilahu tuhu nikukama namukwenu iyala hela mumbanda. (Aroma 1:26, 27; Aŋalija 5:19-21) Hela chakwila Bayibolu yalumbulula chikupu nawu Nzambi wahela yililu yamuchidiwu, tweluka cheñi netu ‘Nzambi wakeñeli mpata yamunu mwishina, chakwila waheni Mwanindi wumu hohu, kulonda muntu wukumukuhwelela akaheti wumi wahaya nyaka, akabuli kunoña.’—Yowanu 3:16.

Hela chakwila wutumwa awuhela, akwaKristu alala akeña antu ejima. (Matewu 7:12) Nzambi nakukeña nindi ‘tulemeshi antu ejima.’ Dichi, akwaKristu alala hiyahela chikupu antu akamaña nawakwawu amayala hela ambandaku.—1 Petulu 2:17.

9 Komana wuvumbi wahanshiña, kutemesha nyevulu yanzekesi hanshiña nikuhanjeka nsañu jawuvumbi haIntaneti kwatama?

▪ Ñakwilu: Wuvumbi wahanshiña hikuhanjeka nsañu yabula kutelela yawuvumbi hela kutiyilila hanshiña kumazu atiyishaña wuvumbi. Kutemesha nyevulu yanzekesi himazu anakundami kukuzatisha jiselufoni nakutemesha nyevulu yatama nikutemesha mazu awuvumbi kudi akwenu. Nawa chinabombelumu nikuhanjeka nsañu jawuvumbi haIntaneti.

Bayibolu hiyashimuna jiika yuma yinakwilawu antu makonu neyi iyi yinashimunuwuku. Ilaña yahoshaña nawu: “Hakwila wuvumbi, nawuzondu wamumuchima wejima, hela lwisu, bayi muyitenaña mukachi kenuku, dimu mwatelela akwakujila; hela wuzondu, hela kuhosha kwawuhewu, hela kuseñula; yumoyu hiyatelaku.” (Aefwesesa 5:3, 4) Yuma yidi neyi wuvumbi wahanshiña, kutemesha nyevulu yanzekesi nikuhanjeka nsañu yawuvumbi haIntaneti yakojejaña antu kwikala nayitoñojoka yaluwa hansañu yakubulakana kweyala namumbanda nawa yakojejaña antu kwila wuvumbi nawantu abula kwikala enikwawu. Chatela yikwasheña antu kubula kwila wuvumbi, iyi yaaku yelishaña antu kwikala namuchima wakudizañalesha aweni.

10 Indi Bayibolu yahosha nawudi hansañu yakudichuka?

▪ Ñakwilu: Bayibolu hiyatena izu dakudichukaku, dikwila nawu, kuhemesha mumushikila yiidi yalusemu nakuditiyisha wuvumbi. Ilaña, Izu daNzambi dalejaña akwaKristu nawu: ‘Jahenu yidi yenu yamujimba yamwekenaña muyililu yahamaseki yidi neyi wujila, wuzondu, [nikusweja] kukeña wuvumbi.’—Akolose 3:5.

Kudichuka kwakojejaña muntu kwikala nayitoñojoka yaluwa yakudishindamena kutalisha hansañu yakubulakana kweyala namumbanda. Bayibolu yatulejaña nawu Nzambi nateli kuyinka antu afwilaña kuleka chaaku chamuchidiwu “ñovu jabadika nankashi.”—2 Akorinda 4:7; Afwilipi 4:13.

[Tumazu twaheshina]