Chitwatela Kudiluñisha niKuhetelamu Nankashi Hampinji Yakudiza
Tunateli kudiluñisha ñahi chikupu hakudiza Bayibolu? Tunateli kuhetelamu ñahi hampinji yakudiza? Tutalenu hanjila jisatu jalema jikutukwasha kuhetelamu chikupu neyi tunakudiza Bayibolu nkawetu.
1 LOMBENU: Chatachi, mwatela kulomba. (Mas. 42:8) Muloñadi? Twatela kwiluka netu kudiza Izu daNzambi himbadi yakudifukula kwetu. Dichi twatela kulomba kudi Yehova kulonda yatukwashi twikali namuchima wakutiyilila nawa yatwinki spiritu yindi yajila. (Luka 11:13) Barbara wunakalakali mudimu wawumishonali hadi mpinji yeneni wahosheli nindi: “Nasambilaña kulomba henohu kanda nitachiki kutaña hela kudiza Bayibolu. Chinalomba natiyaña neyi Yehova wudi nanami nawa wetejaña yuma yinakwila.” Neyi tulomba henohu kanda tutachiki kudiza chikutukwasha kwikala nayitoñojoka nimuchima wakwiteja chikupu yakudya yakuspiritu yitukweti.
2 TOÑOJOKENU CHIKUPU: Hamuloña wakubula mpinji, antu amakwawu akuminaña dakutaña hohu Izu daNzambi. Dichi akañanyaña kutambwila nkisu jafumaña mukudiza Bayibolu. Carlos, wunamukalakeli Yehova hadi yaaka yakubadika ha 50, wahosheli nindi kwikala nampinji yakutoñojoka chikupu kwamukwashaña nankashi kuhetelamu hampinji yinakudizayi. Wahosheli nindi: “Chayinu mpinji natañaña mafu antesha amuBayibolu, dikwila nawu mafu ayedi hefuku. Kuhiñahu nazatishaña mpinji yeneni nakutoñojoka chikupu hayuma yinatañi kulonda niluki yuma yinatela kudiza.” (Mas. 77:12) Neyi twikala nampinji yakutoñojoka chikupu hayuma yitunatañi, tukwiluka nankashi yuma yakeñañayi Nzambi.—Kol. 1:9-11.
3 ZATISHENU YUMA YIMUNADIZI: Neyi twiluka netu chuma chituneli chikutukwasha nankashi, tukuhetelamu chikupu. Nikudiza Bayibolu dichakwatukwashaña. Gabriel, mana kwetu wakansi wukweti chaaku chakudiza Bayibolu wahosheli nindi: “Kudiza kwankwashaña kushinda kukala kwamwekanaña muchihandilu nawa kwanleñelaña nikali namuchima wakukwasha antu.” Wabombeleluhu nindi: “Nafwilaña kuzatisha nsañu yejima yinadizaña muchihandilu chami.” (Kuhit. 11:18; Yosh. 1:8) Eñañi, yuma yatudizishañayi Nzambi yalema chikupu nawa twatela kuyizatisha.—Yish. 2:1-5.
HITULUKENUMU: Kwenoku kukooleka kutukweti kwakwiluka nsañu yatuloñeshelañayi Yehova, Nsulu yamaana ejima! (Rom. 11:33) Dichi ifuku dikwawu dimwakadizaña, mwakasambili kulomba kudi Yehova kulonda yakayinki yitoñojoka yayiwahi nispiritu yindi yajila. Kufumahu, hudikilenu nakutoñojoka chikupu hayuma yimunatañi. Cheñi, zatishenu yuma yimunakudiza muchihandilu chenu. Neyi muzatishaña iji njila, mukudiluñisha nikuhetelamu mukudiza Bayibolu.