Malwihu Ehulañawu Antañi . . .

Muloñadi aYinsahu jaYehova chashimwinañawu kwitala nikwitala

▪ MuBayibolu mwekala ilu lushimbi lwahaniniyi Yesu kudi atumbanji twindi nindi: ‘Dichi yenu mwakelishi atumbanji munyuza yejima, . . . mwakayitañishi.’ (Matewu 28:19, 20) Komana lwakundama nikudi akwaKristu ejima? Atumbanji twaYesu akusambila elukili nawu ilu lushimbi lwayikundama. Chakutalilahu, kapostolu Petulu wahosheli nindi: ‘Yena [Yesu] hakutuleja nindi tushimwini antu, nikushimuna wunsahu chikupu.’ (Yililu 10:42) Nawa kapostolu Pawulu wasonekeli nindi: “Anankunjiki mudimu wakushimuna. O yihuñu yinukumonami neyi nukubula kushimuna nsañu yayiwahi!”—1 Akorinda 9:16.

Bayi neyi Pawulu niPetulu diwu ovwahililili lushimbi lwaYesu hohuku, ilaña niakwaKristu ejima amuyaaka nkulakaji yakusambila. Alemesheli chikupu mudimu wakushimwina. (Yililu 5:28-32, 41, 42) A Yinsahu jaYehova makonu afwilaña kuyimbujola. Ashimwinaña nsañu yoyimu yashimwinineñayi Yesu, “wanta wamwiwulu.”—Matewu 10:7.

Twatela kushimwina nsañu yaWanta kudi anyi? Yesu wahosheli nindi yatela kushimwinewa kudi antu ejima kumaluña ejima. Walejeli atumbanji twindi nindi: “Mwakela ayinsahu jami . . . nikwakumina maseki.” (Yililu 1:8) Washimwineñahu dehi nindi henohu kukuma kwanyaka yinu kanda kushiki, “Nsañu iyi yawanta yayiwahi akayishimwañena mwahita matuña ejima mwashakamawu antu, kulonda yakayilili nyuza yejima wunsahu.” (Matewu 24:14) AkwaKristu amuyaaka nkulakaji yakusambila afwilileña kuhosha nawantu ejima, bayi neyi kudi akwawu hohu hela antu abulileña kuya kunsakililuku. (Akolose 1:23; 1 Timotewu 2:3, 4) Chochimu, aYinsahu jaYehova makonu afwilaña kushimwina antu ejima.a

Njilanyi yayiwahi nankashi yakushimwinamu nsañu yaWanta? Yesu welukili chakushimwina antu amavulu, watemesheli atumbanji twindi munyisumba, munyikala nikumatala awantu. (Matewu 10:7, 11, 12) Chafwiliyi Yesu nihampinji yamusañwiluwu, atumbanji twindi atwalekeluhu kushimwina ‘kwitala nikwitala.’ (Yililu 5:42) Neyi chocheliliyi Yesu, niwena ashimwinineña kwejima kwawanineñawu antu. (Yowanu 4:7-26; 18:20; Yililu 17:17) Makonu, aYinsahu jaYehova azatishaña njila yoyimu hakushimwina kudi antu ejima.

Yesu wahosheli nindi bayi neyi antu ejima akatiyililaku. (Matewu 10:14; 24:37-39) Komana chumichi chatela kukañesha akwaKristu kushimwina? Shinshikenu chumichi: Neyi mudi hakachi kezanvu dinakupulwisha antu hanyima yamutentanshi weneni, komana munateli kuleka kukeñakeña antu muloña wakwila hanyima yakukeñakeña hakapinji kantesha munakuwana hohu antu antesha amomi? Inehi, munateli kutwalekahu neyi chakwila munakuhweleli nenu mukupulwisha muntu wumu. Yesu walejeli atumbanji twindi kutwalekahu chakadi kuleka hamuloña wakukuhwelela nawu akuwana antu akutiyilila nsañu yayiwahi yaWanta waNzambi. (Matewu 10:23; 1 Timotewu 4:16) Kuhitila mukukeñakeña antu amuchidiwu kwitala nikwitala, aYinsahu jaYehova amwekeshaña nawu amukeña Nzambi niantuñinawu, antu atela kupuluka neyi atiyilila nsañu yaWanta nikuzatisha yuma yinakudizawu.—Matewu 22:37-39; 2 Atesalonika 1:8.

Iyi magazini yimunakutaña yahoshaña hansañu yamuBayibolu. Neyi munakukeña nsañu yikwawu, hoshenu nawaYinsahu jaYehova ifuku dakayendelawu, hela sonekelenu ansoneki ayinu magazini.

[Tumazu twaheshina]