Aeluda Akwakristu ‘Hiyakwakukalakala Hamu Nanetu Kulonda Tuzañalaleña’

‘Tuyakwakukalakala hamu nanenu kulonda muzañalaleña.’—2 KOR. 1:24.

WANENU ÑAKWILU:

Indi Pawulu wamwekesheli ñahi nindi ‘hadiña mwanta wachikuhwelelu chawana kwinduku’ ilaña ‘mukwakukalakala hamu nawu kulonda azañalaleña?

Indi aeluda akwaKristu azañaleshaña ñahi akwawu akakwitiya?

Wejima wetu tunateli kuzañalesha ñahi antu amuchipompelu?

1. Chumanyi chaleñeleli Pawulu kuzañalala kutalisha hadi akwaKristu amuKorinda?

MWADIÑA muchaaka cha 55 C.E. Kapostolu Pawulu wadiña mukachi kamusumba waTirowasi, ilaña wanukileña yuma yamwekeneña muKorinda. Kukutachika kwachina chaaka, chamukatili kumuchima hatiyiliyi nindi amana kwindi adiña nakubobola hakachi kawu. Hamuloña wakwikala namuchima neyi watata yawantu, watemesheli mukanda wakuyikwasha. (1 Kor. 1:11; 4:15) Wayitemesheleli cheñi Titusa mukwawu mwazatilileñawu nawa wamulejeli Titusa nindi yakamufuntishili mujimbu kuTirowasi. Dichi Pawulu wadiña nakumutalila Titusa kuTirowasi haniyi mpinji nawa wakeñeleña kutiya chazatilañawu aKorinda. Ilaña Pawulu waneñeli nankashi muloña Titusa wenjili wanyi. Chumanyi cheliliyi Pawulu? Wayili kuMasidoniya nawa dikwadibulakenenuwu naTitusa. Titusa wamulejeli nindi amana kwindi akuKorinda azatishili nsañu yasonekiliyi Pawulu mumukanda nawa akeñeleña nankashi kumumona. Pawulu chatiyiliyi iwu mujimbu wawuwahi ‘wazañaleli nankashi.’—2 Kor. 2:12, 13; 7:5-9.

2. (a) Indi Pawulu wayisonekeleli nindidi aKorinda kutalisha hakwikala nachikuhwelelu nimuzañalu? (b) Malwihwinyi itukuhanjekahu?

² Chimwahitili kapinji, Pawulu wayisonekeleli aKorinda mukanda wamuchiyedi. Wayilejeli nindi: ‘Hituyanyanta akukuhwelela kwenuku, tuyakwakukalakala hamu nanenu kulonda muzañalaleña; muloña mwakolelaña mukukuhwelela.’ (2 Kor. 1:24) Indi Pawulu watalishili mudihi? Nawa awa mazu anateli kukwasha ñahi aeluda akwaKristu makonu?

CHIKUHWELELU CHETU NIMUZAÑALU WETU

3. (a) Indi Pawulu watalishili mudihi hakusoneka nindi: “Muloña mwakolelaña mukukuhwelela [kwenu]”? (b) Indi aeluda makonu alondelaña ñahi chakutalilahu chaPawulu?

³ Pawulu wateneni mbadi jiyedi jalema nankashi mukudifukula kwetu, chikuhwelelu nimuzañalu. Anukenu nenu, wasonekeli kutalisha hachikuhwelelu nindi: “Hituyanyanta akukuhwelela kwenuku, . . . muloña mwakolelaña mukukuhwelela [kwenu].” Kwesekeja nanawa mazu, Pawulu welukili nindi amana kwindi muKorinda adiña nachikuhwelelu chakola bayi hamuloña wayenaku hela muntu wudi wejimaku, ilaña hamuloña wakumukuhwelela Nzambi. Dichi, Pawulu hakeñeleña kuyuula chikuhwelelu chawamana kwinduku, nawa hadiña nampwila yakwila mwenimuku. Welukili chikupu nindi adiña akwaKristu ashinshika akeñeleña kwila yuma yaloña. (2 Kor. 2:3) Makonu, aeluda alondelaña chakutalilahu chaPawulu kuhitila mukwiluka nawu amana kwawu akweti chikuhwelelu chakola nawa akweti muchima wakumuzatila Nzambi. (2 Tesa. 3:4) Chatela atuñeña nshimbi jakola jachipompelu, aeluda ashindamenaña hanshimbi jamuNsona niwunlomboli wamukuloñesha kwaYehova. Nawa aeluda makonu hiyekala anyanta hachikuhwelelu chawamana kwawuku.—1 Pet. 5:2, 3.

4. (a) Indi Pawulu watalishili mudihi hakusoneka nindi: ‘Tuyakwakukalakala hamu nanenu kulonda muzañalaleña’? (b) Indi aeluda makonu embujolaña ñahi yililu yaPawulu?

⁴ Pawulu wahosheli cheñi nindi: ‘Tuyakwakukalakala hamu nanenu kulonda muzañalaleña.’ Awa mazu anakumwekesha nawu waditeneneña yamweni niakwawu adikundileñayi nawu. Muloñadi chitunahosheli muniyi njila? Mumukanda wowumu, Pawulu wanukishili aKorinda kutalisha hadi awa antu ayedi adikundiliyi nawu hampinji yasonekeliyi nindi: ‘Yesu ashimwinuwu mukachi kenu kudetu, dikwila nawu kudami niSilasi naTimotewu.’ (2 Kor. 1:19) Kubombelahu, mpinji yejima yazatishileñayi Pawulu mazu akwila nawu ‘tuyakwakukalakala hamu nanenu’ munyikanda yindi, wateneneña antu adikundileñayi nawu adi neyi Apolosi, Akwila, Pirisila, Timotewu, Titusa niantu amakwawu. (Rom. 16:3, 21; 1 Kor. 3:6-9; 2 Kor. 8:23) Dichi hakuhosha nindi: ‘Tuyakwakukalakala hamu nanenu kulonda muzañalaleña,’ Pawulu wakolesheleña aKorinda nindi yena niamabwambu jindi azatileña nañovu kulonda antu amuchipompelu ejima ekali namuzañalu. Makonu, aeluda akwaKristu niwena dichakeñañawu. Azataña hakumina ñovu jawu jejima kulonda akwashi amana kwawu ‘amukalakeleña Yehova namuzañalu.’—Mas. 100:2; Fwi. 1:25.

5. Tukuhanjeka hañakwilu yalwihwinyi, nawa twatela kutoñojoka hayumanyi?

⁵ Katataka, izanvu dawamana kwetu niahela adikitaña ashakamaña mumatuña amboka-mboka mukaayi kejima ayilejeli nawu akuli ilu lwihu lwakwila nawu, “Mazwinyi ninzatilu yawaeluda yayileñela musweji kuzañalala?” Chitukushinshikaña hamazu ahosheli idi izanvu dawakwetu akakwitiya, talenu mazu ahosheluwu chikwesekanawu namazu imwadikuhosha. Kubombelahu, wejima wetu tushinshikenu hachitwatela kuleta muzañalu muchipompelu chetu.a

“ÑIMUSHILI NIPERISA WAKEÑEWA”

6, 7. (a) Njilanyi yimu aeluda mwatela kwimbujolelawu Yesu, Pawulu niambuña aNzambi amakwawu? (b) Muloñadi amana kwetu chatiyilañawu kuwaha neyi twanuka majina awu?

⁶ Amana kwetu niahela amavulu ahoshaña nawu aswejaña kwikala namuzañalu neyi aeluda ayimwekeshela kukeña. Njila yimu mwamwekeshelañawu aeluda kukeña yidi yakulondela chakutalilahu chaDavidi, Elihu niYesu. (Tañenu 2 Samweli 9:6; Yoba 33:1; Luka 19:5.) Awa ambuña aYehova ejima amwekesheli kukeña kudi akwawu kuhitila mukuzatisha majina awu. Pawulu niyena wamweni nindi chalema kwanuka majina awakwetu akakwitiya nikuyizatisha. Wakunkulwili nyikanda yindi kuhitila mukwimusha amana kwetu niahela akubadika ha 25 hejina hejina, kushilahu niPerisa, muhela mukwaKristu wateneneyi Pawulu nindi: “Ñimushili niPerisa wakeñewa.”—Rom. 16:3-15.

⁷ Aeluda amakwawu chayikalilaña kwanuka majina. Ilaña neyi azata nañovu kulonda anukeña majina awamana kwawu, dikwila nawu anakuleja akwawu akakwitiya nawu, ‘Enu mwalema nankashi kudami.’ (Kwid. 33:17) Aeluda akuzañaleshaña amana kwawu neyi anuka majinawu hampinji yinakwakulawu haKaposhi Kakutalila Kakudizamu hela hakupompa kukwawu.—Esekejenu Yowanu 10:3.

‘WAKALAKELI NYIDIMU YAYIVULU MUDI MWANTA’

8. Njilanyi yalema yalondeleliyi Pawulu hakwimbujola chakutalilahu chaYehova niYesu?

⁸ Pawulu wamwekesheli cheñi kukeña kudi akwawu kuhitila mukuyihameka nawa diyi njila yikwawu yakuzañaleshelamu akwetu akakwitiya. Mumukanda wowumu mwashimwiniyi mpwila yindi yakukwasha amana kwindi kulonda azañalaleña, Pawulu wasonekeli nindi: “Nadisambaña nankashi hansañu yenu.” (2 Kor. 7:4) Awa mazu akuhameka atela azañalesheli nankashi amana kwetu muKorinda. Pawulu wahamekeli niyipompelu yikwawu. (Rom. 1:8; Fwi. 1:3-5; 1 Tesa. 1:8) Hanyima yakumutena Perisa mumukanda windi wasonekeleliyi chipompelu chamuRoma, Pawulu wabombeleluhu nindi: ‘Wakalakeli nyidimu yayivulu mudi Mwanta.’ (Rom. 16:12) Awa mazu amawahi chikupu akuhameka atela amukolesheli iwu muhela washinshika. Hakuhameka amakwawu, Pawulu walondeleli chakutalilahu chaYehova nichaYesu.—Tañenu Maku 1:9-11; Yowanu 1:47; Chim. 2:2, 13, 19.

9. Muloñadi antu ejima amuchipompelu chazañalelañawu neyi adihamekaña wumu namukwawu?

⁹ Aeluda makonu niwena eluka nawu chachiwahi nankashi kuhameka amana kwawu. (Yish. 3:27; 15:23) Mpinji yejima eluda yikukoñayi muniyi njila dikwila nawu nakuleja amana kwindi nindi: ‘Namona chuma chiwakoña. Nakwakamenaña nankashi.’ Nawa akwetu akakwitiya akeñaña nankashi kutiya mazu akukolesha afumaña kudi aeluda. Muhela wudi nayaaka yamuma 50 wahosheli kapampa kakavulu nindi: “Kwosi muntu wanhamekaña kumudimuku. Antu hiyadakamenaña wumu namukwawuku nawa ekalaña hohu nachaaku chakudibecha. Dichi neyi eluda yanhameka hachuma chinnakoñi muchipompelu nazañalalaña nankashi, nekalaña nañovu. Natiyaña nami Tata wamwiwulu wankeña nankashi.” Mana kwetu mujiki wukweti anyana ayedi niyena dichatiyañayi. Katataka eluda wamuhamekeli nankashi. Indi mana kwetu watiyili ñahi? Wahosheli nindi: “Mazu ahosheluwu aeluda ankolesheli nankashi!” Eñañi, neyi eluda yahamekaña akwawu akakwitiya, wakolesha amana kwindi nikuyiletela muzañalu. Chumichi chikuyileñela kwikala nañovu jakutwalekahu kwenda munjila yawumi “chakubula kuzeya.”—Isa. 40:31.

‘BIÑENU CHIPOMPELU CHANZAMBI’

10, 11. (a) Indi aeluda anateli kulondela ñahi chakutalilahu chaNehemiya? (b) Chumanyi chikumukwasha eluda kushimuna chamukunkulu chakuspiritu hampinji yinayi nakuhempulayi amana kwindi?

¹⁰ Njilanyi yalema nankashi mwamwekeshelañawu aeluda kukeña kudi amana kwawu nikuleta muzañalu muchipompelu? Kuhitila mukutachikilahu kuya kudi antu anakukeña wakuyikolesha. (Tañenu Yililu 20:28.) Neyi aeluda ela mwenimu dikwila nawu anakwimbujola atubiña akuspiritu akunyima. Chakutalilahu, talenu chuma cheliliyi nkoñi washinshika Nehemiya chamweniyi nindi amana kwindi aYudeya anazeyi kuspiritu. Twatañaña nawu hohenohu wanyamukili nakutachika kuyikolesha. (Nehe. 4:14) Nikulelu aeluda akeñaña kwila mwomumu. ‘Anyamukaña,’ dikwila nawu atachikilañahu kukwasha akwawu akakwitiya kulonda ekali nachikuhwelelu chakola. Hakwila nawu ayikoleshi, ahempulaña amana kwawu niahela hanyikala yawu neyi chinatwesheki. Neyi anayi nakuhempula, afwilaña ‘kuyinka amana kwawu chamukunkulu chakuspiritu.’ (Rom. 1:11) Chumanyi chikuyikwasha aeluda kwila mwenimu?

¹¹ Henohu kanda yayi nakuhempula, eluda watela kwikala nampinji yakutoñojoka hadi muntu wunakuya nakutalayi. Kukalanyi kunakumonayi? Mazu amuchidinyi atela kumukolesha? Nsonanyi hela chakutalilahwinyi chamuBayibolu chikumukwasha? Neyi eluda yatoñojokela chadimu, chikumukwasha kuhosha yuma yikukolesha muntu, bayi kuhosha hohu yuma yamwekanaña mpinji yejimaku. Neyi eluda nayi nakuhempula, watiyililaña nakanañachima hampinji yinakulumbululawu amana kwindi niahela kuhosha nsañu yidi kunyichima yawu. (Yak. 1:19) Muhela wumu wahosheli nindi: “Nakundejewaña nankashi neyi eluda yantiyilila nakanañachima.”—Luka 8:18.

12. Antu amuchidinyi muchipompelu atela kukoleshewa, nawa muloñadi?

¹² Anyi ahetelaña mukuhempula kwawaeluda? Pawulu wakonkomweneni akwawu aeluda akwaKristu nindi ‘ashi maana kudi anyikoku ejima.’ Eñañi, antu ejima amuchipompelu atela kukoleshewa kushilahu niakwakushimwina niapayiniya anakalakali mudimu wakushimwina nakashinshi hadi yaaka yayivulu. Muloñadi chakeñelañawu wukwashu wawatumbiña akuspiritu? Muloña mpinji yikwawu antu amuchidiwu akola kuspiritu niwena azeyaña hamuloña wekakeja dasweja damukanu kaayi katama. Hakwila twiluka netu nikambuña aNzambi wukweti chikuhwelelu chakola mpinji jikwawu wakeñaña muntu wakumukolesha, tutalenu chuma chamumwekeneni Mwanta Davidi muchihandilu chindi.

“ABISHAYI WAMUKWASHILUKU”

13. (a) Mpinjinyi yakeñeleñayi Ishibenobi kumujaha Davidi? (b) Indi Abishayi wamupulwishili ñahi Davidi?

¹³ Hanyima yakumuwayisha Davidi kwikala mwanta, wayili nakudibulakana naGoliyata, kaRefwa muchidi wawantu ataluka nankashi. Davidi wadiña nawulombu wamujahili iwu chikelamu cheyala. (1 Sam. 17:4, 48-51; 1 Kush. 20:5, 8) Chimwahitili yaaka, hampinji yazuñileñawu nawaFwilistinu, Davidi wayili cheña nakuzuña nachikelamu cheyala mukwawu. Ijina dindi diyi Ishibenobi niyena wafumini kumuchidi wawaRefwa. (2 Sam. 21:16) Haniyi mpinji, iwu chikelamu weyala kwashalili kwanti nakumujaha Davidi. Muloñadi? Bayi neyi wulombu diwamumanini Daviduku, ilaña ñovu dijamumanini. Twatañaña nawu: ‘Davidi wazeyeli.’ Ishibenobi chamweniyi nindi Davidi nazeyi dehi, ‘watoñojokeli kujaha Davidi.’ Ilaña chelili iwu chikelamu cheyala nindi yaseña mpoku hadi Davidi, “mwana kaZeruwiya Abishayi wamukwashiluku [Davidi] hakumutapa kaFwilistinu hakumujaha.” (2 Sam. 21:15-17) Kwashalili kwanti chiña Davidi wasumini kumwemba! Davidi watela wazañaleli nankashi hakwiluka nindi Abishayi washili maana kwadiñayi nawa wanyakeli kumupulwisha hampinji yadiña wumi windi hakatoña. Yumanyi yitukudizila kuniyi nsañu?

14. (a) Twomikaña ñahi kukala kudi neyi Goliyata? (b) Indi aeluda anateli kukwasha ñahi amakwawu kwikala cheñi nañovu nimuzañalu? Shimunenu chakutalilahu.

¹⁴ Etu antu jaYehova tunakuzata mudimu wakushimwina mwahita kaayi kejima hela chakwila Satana niantu jindi anakutuletela yinzeñeli yayivulu nankashi. Amakwawu ahita mukukala kweneni nankashi, ilaña hamuloña wakushindamena hadi Yehova, anetu nawa twashindaña kukala kudi neyi “Goliyata.” Ilaña mpinji jikwawu, kukala kwasweja kwadinu ituña kwatuzeyeshaña nikutuneñesha. Dichi neyi tuzeya, twadanyikana hatooka nawa twekalaña muwubanji ‘wakutujaha’ nayuma yitunateli kuumika chikupu. Hampinji yamuchidiwu, wukwashu wawaeluda wunateli kutukwasha kwikala cheñi namuzañalu nikukola neyi chakolañawu antu amakwawu. Muhela payiniya wudi nayaaka yamuma 60 wahosheli nindi: “Mpinji yakunyima natiyileña chiwahi wanyi nawa mudimu wakushimwina wazeyesheleña nankashi. Eluda wammweni nindi nazeyeli nawa wenjili nakuwana. Twahanjekeli nsañu yakukolesha yamuBayibolu. Nazatishili nsañu yanlejeliyi nawa yankwashili nankashi.” Wabombeleluhu nindi: “Iwu eluda welili chuma chachiwahi hakumona nindi nazeyeli nawa wankwashili nankashi.” Eñañi, twazañalalaña nankashi hakwiluka netu tukweti aeluda atwisha maana nawa kufwana Abishayi wakushankulu ‘atukwashaña’ mpinji yejima.

‘ILUKENU KUKEÑA KUNASWEJA KUYIKEÑA’

15, 16. (a) Muloñadi Pawulu chamukeñeleluwu nankashi kudi akwawu akakwitiya? (b) Muloñadi chitwayikeñela aeluda amuchipompelu atwisha maana?

¹⁵ Atubiña azataña nañovu nankashi. Mpinji jikwawu, aeluda achishaña wufuku wejima nakutoñojoka hanjila yakukwashilamu nyikoku yaNzambi nikukwasha akwawu akakwitiya kuspiritu. (2 Kor. 11:27, 28) Hela chochu, aeluda azataña mudimu wawu namuchima wumu nawa namuzañalu neyi cheliliyi Pawulu. Wayisonekeleli aKorinda nindi: “Nukutiya kuwaha nankashi kudikisañana, hela kudihana ami aweni kukoola wumi wenu.” (2 Kor. 12:15) Eñañi, hamuloña wakukeña amana kwindi, Pawulu wazatili nañovu hakuyikolesha. (Tañenu 2 Akorinda 2:4; Fwi. 2:17; 1 Tesa. 2:8) Dihafumini amana kwindi amukeñi nankashi Pawulu.—Yil. 20:31-38.

¹⁶ Etu ambuña aNzambi makonu ninetu twayikeña aeluda akwaKristu nawa twamusakililaña Yehova mukulomba hakutwinka aeluda. Twazañalalaña nankashi neyi atumwekeshela kukeña. Twakoleshewaña nankashi neyi atuhempula. Kubombelahu, twasakililaña nankashi muloña ekala adiloñesha kutukwasha neyi tuzeya nekakeja damunu mukaayi. Eñañi, awa aeluda akwaKristu atwishaña maana nawa ‘hiyakwakukalakala hamu nanetu kulonda tuzañalaleña.’

[Tumazu twaheshina]

[Nyevulu yidi hefu 30]

Kuloñeshela chadimu kwakwashaña eluda ‘kwinka antu chamukunkulu chakuspiritu’ neyi nayi nakuhempula