MALWIHU KUFUMA KUDI ANTAÑI
Komana chachiwahi anvwali akwaKristu kushakama hamu namwanawu wahañewa hakupompa kwachipompelu?
▪ Hitwatela kusweja kwakama kutalisha kwatela kushakamayi muntu wahañewa Mwitala daWantaku. Yinu magazini yakoleshaña chikupu anvwali akwaKristu nawu atela kumukwasha kuspiritu mwanawu wahañewa wuchidi kushakama nawu hetala neyi chinatwesheki kwila mwenimu. Kwesekeja nachalumbulwiluwu muKaposhi Kakutalila kaChizungu kaNovember 15, 1988, hamafu 19 ni 20, anvwali atela kudiza Bayibolu namwanawu wanyanya wahañewa wuchidi kushakama nawu hetala. Twakuhwelelaña netu mwana anateli kumukolesha chachiwahi kulonda yaleki kwenda munjila yatama.
Hakushakama Mwitala daWanta, chachiwahi neyi mwana wanyanya wahañewa yashakamaña nawanvwali jindi wumweneni. Chineli hichakeñekaña nawu muntu wahañewa watela kushakama kuyitwamu yakunyimaku, neyi mwana wahañewa yashakama nawanvwali jindi hadi hejima hanashakamuwu, himwatela kumukaanishaku. Anvwali chiyakumukwashaña mwanawu kuspiritu, atela kwiluka chikupu nawu nakuhetelamu mukupompa. Chatela kuwaha neyi anvwali ashakamaña hamu namwanawu wanyanya kubadika amulekeña yadishakamineña hakankawindi.
Indi neyi mwana wahañewa hashakamaña nawanvwali jinduku? Dikwila nawu hanateli kushakama hamu nawanvwali jinduku? Kunyima, yinu magazini yalumbulwili chachiwahi yililu yatela kufwila kumwekeshayi mukwaKristu kutalisha hakudikunda nantaña yindi wahañewa wadishakaminaña. Hela chochu, neyi muntu wahañewa yashakama wumweneni nawantaña jindi hakupompa chinambuki chikupu nampinji yeleña antaña jindi akeñeña nawu adikundeña nindi munjila yabula kutelela. Neyi antu amuchisaka ashinshika anakumwekesha yililu yayiwahi kutalisha hadi ntaña yawu wahañewa nawa anakufwila kulemesha kufumba kwamuNsona kwahoshaña hakudikunda nawahañewa, himwatela kwakamaku.—1 Kor. 5:11, 13; 2 Yow. 11.
Neyi muntu wahañewa nashakami hamu nawantaña jindi Mwitala daWanta hela nashakami hachitwamu chimu namuntu wudi wejima wamuchipompelu, himwatela kwakamaku sweje-e neyi wadiwunjika. Kwesekeja nayuma chiyidi, neyi muntu wahañewa mumukeñela hatela kushakamañayi, chinateli kuleta kukala kwashiyashana. Neyi antu ejima anapompi, kushilahu niantaña jindi ashinshika anakufwila kulemesha nshimbi jamuBayibolu jahoshaña hadi muntu wahañewa, nawa hiyanakutuntwisha amana kwetuku, himwatela kwakama kutalisha hatela kushakama antu anenzi kukupompa kwawakwaKristuku.