Adihanini Namuchima Wumu MuPhilippines
HANAHITI dehi yaaka yakushika kwikumi dimu kufuma hampinji yakalakeleñawu aGregorio naMarilou, adisumbula adi muyaaka yamuma 30, neyi apayiniya muManila hampinji yoyimu azatileña nyidimu yakumujimba. Hela chakwila chayikalilili, atwesheli kuzata mudimu wawupayiniya. Kuhiñahu, Marilou amwinkeli chifulu chahewulu kunyambawulu kwazatileñayi. Wahosheli nindi, “Nyidimu yetu yayiwahi yitwazatileña yatukwashili kudiluñisha nachihandilu chachiwahi.” Adiña namali amavulu chakwila awa adisumbula afuukwiluhu kutuña itala dawu dadiwahi kwiluña dadiwahi dadiña kumusela waManila hekala makilomita 19. Atiyañeni nakampani kulonda ayituñili itala nawa atiyañeni nawu akufwetaña hakakweji hakakweji hadi yaaka ikumi dimu.
“NATOÑOJOKELI NAMI NAMWIYILILEÑA YEHOVA”
Marilou wahosheli nindi: “Mudimu wami wawuha wunazatileña wansendeleleña mpinji yeneni nawa nazeyeleña nankashi chakwila mpwila yami yayuma yakuspiritu yamanini. Natoñojokeli nami namwiyilileña Yehova.” Walumbulwili nindi: “Hinatwesheleña kumukalakela Yehova kwesekeja nachinafuukwiluku.” Hamuloña wakutiya kutama nayuma yamwekeneña, ifuku dimu Gregorio niMarilou ashakamini hamu kulonda ahanjeki hachihandilu chawu. Gregorio wahosheli nindi: “Twakeñeleña kuhimpa ilaña hitwelukili chikupu chakwilaku. Twahanjekeli hachitunateli kukalakala chikupu mumudimu waYehova muchihandilu chetu, chineli tudana anyana. Twalombeli kudi Yehova kulonda yatukwashi.”
Hayina mpinji, atiyilili kujimpanji jajivulu jahosheleña hakukalakela kwiluña kudi kukankila kweneni kwawakwakushimwina aWanta. Gregorio wahosheli nindi: “Twatoñojokeli netu Yehova wakwili kulomba kwetu kuhitila muniji mpanji.” Awa adisumbula alombeli nawu ekali nachikuhwelelu chakola kulonda afuukuluhu chiwahi. Chuma chayikañesheleña chikupu hiitala diyatuñileña. Adiña afwetaku dehi mali ayaaka yisatu. Adi kwila ñahi? Marilou wahosheli nindi: “Neyi twayilejeli netu aleki kutuña, dikwila nawu mali ejima itwafweteli adi kuya mumenji, mali amavulu chikupu. Ilaña twamweni netu twateleli kufuukulahu kutwamijaku kwila mwaya muchima waYehova hela mwaya kufwila kwanyichima yetu.” Chanukiluwu mazu akapostolu Pawulu ahoshaña ‘hakujimbesha yuma,’ alekesheli wuna mudimu wakutuña itala, nikuleka nyidimu yazatileñawu, alandishili yuma yawu, nawa abuukilili kumukala wekala kwakulehi hachitutu chaPalawan, hekala makilomita 480 kukabeta kambwela kaManila.—Fwi. 3:8.
‘ADIZILI KAJINDILU’
Henohu kanda abuuki, Gregorio niMarilou esekeli kudiloñesha kulonda apeleshi chihandilu chawu, ilaña elukili wanyi chihandilu chawu chachiha chichadi kwikala sampu nichashikiluwu kwiluña kwayileñawu. Marilou wahosheli nindi: “Chatuhayamishili nankashi. Kwadiña kwosi malayiti niyuma yejima yapeleshaña chihandilu.” Wanukileña chihandilu chamumbaka yeneni. Hela chochu, awa adisumbula atwalekeluhu kudanukisha chuma chayileñeleli abuukili kunidi iluña, nawa hashimbwili wanyi, enjilili chihandilu chachiha. Marilou wahosheli nindi: “Ichi inakudiluñisha kutala kuwaha kwayileñaleña yahanu hamaseki kushilahu nitutumbwa nampinji yawufuku. Sweje-e dinu, chanzañaleshaña hakumona antu itwashimwinaña chiyazañalalañawu. Hamuloña wakuzatila kunu, ‘tunadizi kajindilu’ kakuzañalala nayuma yitukweti.”—Fwi. 4:12.
Gregorio washimwini nindi: “Chitwashikili kunu, kwadiña hohu aYinsahu awana. Atiyili kuwaha chikupu chinatachikili kuhana mpanji mulungu nimulungu nikwimbila hamu nawu tumina twaWanta hagita yami.” Muchaaka chimu hohu, awa adisumbula adimweneni namesu kapu aka kadizanvu chikatoheli nakwikala chipompelu chakola chawakwakushimwina akushika ku 24. Gregorio wahosheli nindi: “Kukeña kwatumwekeshelañawu munichi chipompelu kwatushikaña chikupu hanyichima.” Makonu, neyi anuka hadi yaaka yitanu nachimu yinahituhu yinakalakeluwu mudina iluña dakwakulehi, ahoshaña nawu: “Kwosi chuma chinateli kwesekana namuzañalu wutwatiyaña hakumona antu amavulu amaha anakwinza muchipompeluku. Twadiluñishaña chikupu chihandilu chetu.”
“NAMUTOMPI NAWA NATIYI CHAWAHAYI YEHOVA”
MuPhilippines, amana kwetu niahela akushika ku 3,000 anabuukili kumaluña kudi kukankila kweneni kwawakwakushimwina aWanta. Hakachi kawu, hadi ahela ajiki akushika ku 500. Talenu hachakutalilahu chaKaren.
Karen wudi nayaaka yahakachi ka 20, wakulilili muBaggao, Cagayan. Hadiñayi kansi, watoñojokeleña hakuzata chikupu mumudimu wakushimwina. Wahosheli nindi: “Chinelukili nami mpinji yinashaluku yinakehi nawa antu ejima atela kutiya nsañu yaWanta, nakeñeleña kuya nakuzatila kwadiña kukankila kweneni kwawakwakushimwina.” Hela chakwila antaña jindi amakwawu amukolesheleña nawu yatañi shikola yahewulu chatela yabuukila kwiluña dakwakulehi nakushimwina, Karen walombeli kudi Yehova kulonda yamukwashi. Wahosheli cheñi nawantu azatilaña kumaluña akwakulehi. Chashikijiliyi yaaka 18 yakusemuka, wabuukilili kwiluña dakwakulehi hadiña makilomita 64 kufuma kumbaka kwashakamineñayi.
Chipompelu chanyanya kwayiliyi Karen nakuzatilaku chashimwinaña mwiluña damapidi dekala kuMukulishu waKaluñalwiji kaPacific. Karen wanukaña nindi: “Hakwila nawu tushiki kuchipompelu chachiha kufuma kuBaggao, twendeluhu mafuku asatu, nakukandujoka mapidi nikuzambuka tuloña kubadika hamapampa 30.” Wabombeleluhu nindi: “Hakwili niyi nakuwana atudizi aBayibolu, nendaña hadi maora atanu nayimu, nakamaña kwitala dakadizi nawa ifuku dinalondeluhu nendaña cheñi maora atanu nayimu hakwila nishiki kwitala.” Komana mwafumaña yuma yayiwahi? Karen wabombeleluhu nindi: “Mpinji jikwawu, nyendu yami yakataña, ilaña nalombolaña atudizi aBayibolu akushika ku 18. Namutompi nawa natiyi chawahayi Yehova.”—Mas. 34:8.
“NADIZILI KUSHINDAMENA HADI YEHOVA”
Chumanyi chamusañumwini Sukhi, muhela mujiki wudi muyaaka yakutachika yamuma 40 washakamaña kuUnited States, yabuukili kuPhilippines? Mu 2011 wayili kukupompa kwañinza kwehujoleluwu adisumbula ayedi. Ashimwini chiyalandishiluwu yipwepu yawu yayivulu kulonda abuukili kuMexico nakuzata mudimu wakushimwina. Sukhi wahosheli nindi: “Iku kwihujola kwanleñeleli nitachiki kutoñojoka hayikonkwanyi yinabulili kutoñojokahu kunyima.” Sukhi wafuma kuIndia chatiyiliyi nindi antu ahoshaña idimi daPunjabi ashakamaña muPhilippines akeñekeleña kuyishimwina, wafuukwiluhu kuya nakuyikwasha. Komana wamweneñahu kukala kudi kwejima?
Sukhi wahosheli nindi: “Chankalilili hama kufuukulahu hayuma yinatela kuhemba niyuma yinatela kulandisha. Cheñi, hanyima yakushakama chachiwahi hadi yaaka 13 mukapeka kami, nayili nakushakama navwali jami nawa hinashakamineña chachiwahi neyi chinashakamineña hakusambilaku. Hichadiña chapelaku, ilaña yadiña hinjila yayiwahi yakudiloñeshelamu amaweni kushakama chihandilu chapela.” Kukalanyi kwamweniyi hanyima yakwila nabuukili dehi kuPhilippines? “Kukala kweneni kwadiña kwakutiya woma watububu nikwanukaña nankashi kwitala. Nadizili kushindamena hadi Yehova chikupu.” Komana mwafuma yuma yayiwahi? Sukhi wahosheli nachimwemweta nindi: “Yehova watulejaña nindi, Ñesekenu, mutali neyi nukubula kuyihuñunwina nkisu. Ichi nelukaña walala wanawa mazu neyi mwiniitala yañihula nindi, Mwakenza cheñi ifukwinyi? Nidi namalwihu amavulu. Chanzañaleshaña nankashi hakutwesha kukwasha antu anakukeña kudiza chalala!” (Mal. 3:10) Sukhi wabombeleluhu nindi: “Mwamweni, kukala kweneni kwadiña hakufuukulahu kubuuka. Ilaña hanyima yakwila neli dehi mwenimu, nadihayaminini hakumona Yehova chañakameneniyi muyuma yejima yinakeñeleña.”
“NALEKELI KWAKAMA”
Sime, mana kwetu wasumbula wudi muyaaka yakukumana kwamuma 30, wafumini kuPhilippines nakuya nakutachika kuzata mudimu wamali chikupu mwituña dekala hakachi kakabeta kambwela namujika waAsia. Wukwashu wamwinkeluwu kudi nkoñi wañinza nimpanji yatiyiliyi yahanini membala waMwizanvu Dalombolaña yamusañumwini Sime kutwamijaku Yehova muchihandilu chindi. Sime wahosheli nindi, “Ilaña chinatoñojoka hakuleka mudimu wami nakamineña nankashi.” Hela chochu, walekeli mudimu windi nawa wafuntili kuPhilippines. Makonu, Sime niñodindi Haidee, anakuzatila kuDavao del Sur, kukabeta kambwela kanidi ituña kunakukeñeka akwakushimwina aWanta kulonda ashimwini mwiluña deneni. Sime wahosheli nindi: “Chinanuka chihandilu chami chakunyima, nidi namuzañalu chikupu hamuloña wakwila nalekeli kwakama hakuleka mudimu nikutwamijaku Yehova muchihandilu chami. Kwosi chuma chabadika kulema muchihandilu kubadika kumukalakela chikupu Yehovaku!”
“KUZATILA KUDI KUKANKILA KWENENI KWATUZAÑALESHAÑA NANKASHI”
Ramilo niJuliet apayiniya adisumbula adi muyaaka yakutachika yamuma 30 chelukiluwu nawu chipompelu chadiña kwiluña hadiña makilomita 30 kufuma kuyashakamineña chakeñeleña wukwashu, adihanini kuya nakukwashana. Dichi mulungu nimulungu, chili kunachi chiwahi hela nehi, Ramilo niJuliet ayaña kukupompa nakatukutuku kawu kapampa kakavulu nikuzataku mudimu wakushimwina. Hela chakwila chayikalilaña kuhita munjila yatama chikupu, adi namuzañalu chikupu hamuloña wakwila adikitili nankashi mumudimu wakushimwina. Ramilo wahosheli nindi: “Ami niñodami twalombolaña atudizi aBayibolu 11! Kuzatila kudi kukankila kweneni chakeñekaña kudihana, ilaña kwatuzañaleshaña nankashi!”—1 Kor. 15:58.
Komana mukukeña kwilukilahu nsañu jajivulu kutalisha hakuzatila kudi kukankila kweneni kwawakwakushimwina aWanta mwituña denu hela kwituña dacheñi? Neyi mukukeña, hoshenu nankoñi wenu wañinza, nawa tañenu chibaaba chinakwila nawu “Komana Munateli ‘Kuzambukila KuMasidoniya’?” muMudimu Wetu waWanta waAugust 2011.
[Mazu ekoku adi hefu 3]
“Kwosi chuma chinateli kwesekana namuzañalu wutwatiyaña hakumona antu amavulu amaha anakwinza muchipompeluku. Twadiluñishaña chikupu chihandilu chetu.”—Gregorio niMarilou
[Chikasha chidi hefu 4]
CHADIKWASHAÑAWU ANTU AMAKWAWU MUNSAÑU JAMALI
Amana kwetu niahela akushika ku 70 amavulu adi nayaaka hakachi ka 18 ni 50 kufuma kumatuña acheñi aya kuPhilippines nakuzatila kudi kukankila kweneni. Robert niMirjam, adisumbula adi muyaaka yahakachi kamuma 40 afumini kuGermany, ahosheli nawu abuukilili kwituña dacheñi nakuzataku hohu hadi chaaka chimu. Chayinu mpinji hanahiti dehi yaaka 14, ilaña achidi kuzatila kuPhilippines. Hanu dinu adikwashaña ñahi munsañu jamali? Robert walumbulwili nindi: “Chineli chakala nankashi kuwana mudimu kunu, twayaña kuGermany kamu hachaaka nakuzataku hadi tukweji tusatu. Mali itwawanaña atukwashaña kushakama chihandilu chapela nikutwalekahu kuzata muPhilippines.” Mwamweni, kushakama kwituña dacheñi hichapelaku, ilaña Mirjam wahosheli nindi, “Nikweti kuwunda nawa Yehova wankwashaña.” Robert niyena wetejeli nawa wahosheli nindi, “Kuzatila kunu kunakoleshi chikuhwelelu chetu.”
[Mwevulu wudi hefu 5]
(Mwevulu wudi kuchimunswa) Karen
[Mwevulu wudi hefu 5]
(Mwevulu wudi kuchidilu) Sukhi
[Mwevulu wudi hefu 6]
(Mwevulu wudi kuchimunswa) Sime niHaidee
[Mwevulu wudi hefu 6]
(Mwevulu wudi kuchidilu) Juliet niRamilo