Mumbanda Wantuluwa wakuZarefwati Amukiswilili Muloña waChikuhwelelu Chindi
MUMBANDA wantuluwa kazweñi hakumukumbata mwanindi weyala, wumu hohu. Wahayamini chikupu hayuma yamweniyi. Mwahitili hohu kampinji kantesha kufuma hamukumbatiliyi mwanindi wafwili. Haniyi mpinji mumbanda hakumwemweta iku nakumushinshika mwanindi anasañuluwu. Mwenyi wenjili mwitala dindi hakuhosha nindi, “Tala mwaneyi iwu nahandi dehi.”
Iwu mwana amusañwili muchihayamisha kwakwihi nayaaka 3,000 yinahituhu. Munateli kutaña iyi nsañu hamukanda wa 1 Anyanta kapetulu 17. Mwenyi wenjili mwitala hikaprofwetu kaNzambi Elija. Indi mama yamwana wadiñanyi? Hintuluwa abula kutenawu ijina washakamineña mumusumba wakuZarefwati. Kusañuka kwamwanindi dichuma chakolesheli chikuhwelelu chindi chikupu mukuhanda kwindi. Hampinji yitukudizaña hansañu yahosha hadi iwu mumbanda, tukudiza yuma yalema nankashi.
ELIJA HAKUWANA MUMBANDA WANTULUWA WUDI NACHIKUHWELELU
Yehova washimwini nindi mwituña damwanta wawaIsarela watama Ahabi, mwakekala chaaña hadi mpinji yayilehi. Elija chabidikiliyi nindi kukaholoka chaaña, Nzambi wamuswekeli kulonda Ahabi yabuli kumumona nawa wamudiishileña kaprofwetu muchihayamisha kuhitila mukumuletela mbiji nimankendi kudi makololu. Kuhiñahu Yehova wamulejeli Elija nindi: “Nyamukaku, wuyi kuZarefwati wakuZidoni, wakashakamuku. Naleji dehi mumbanda wantuluwa wakwenoku nami akakudiishaña.”—1 Anya. 17:1-9.
Elija chashikiliyi kuZarefwati, wamweni mumbanda wantuluwa kazweñi nakukuñujola nsonsu. Komana diyi mumbanda wateleleli kumwinka kaprofwetu yakudya? Indi yakudya wadi kuyiwana kudihi, chineli wadiña kazweñi? Hela chakwila Elija wadiña nakujinooka, watachikili kuhanjeka naniwu mumbanda. Wamubidikili nindi, ‘Anleteluhu mwani tumenji mulupasa ninwi.’ Mumbanda chayiliyi nakumuletelayi menji, Elija wabidikili cheñi nindi: ‘Munsendeluhu nawa mwani kachibalu kadinkendi muchikasa chenu.’ (1 Anya. 17:10, 11) Mumbanda ntuluwa hatiyili kukala kumwinka muntu wabulili kwilukayi menjuku, ilaña chamukalilili hakwila yamwinki dinkendi.
Mumbanda ntuluwa wakwili nindi: “Chahandayi Yehova Nzambi yeyi kwaamu, hinikweti dinkenduku, kwiji twotu tuwuña twakukwata muchikasa tudi muchitayi, nitumanji twanti tudi muchipunda. Tala, tusonsu tuyedi tunidi nakukuñula itu, niyi nakochi yami namwanami, twakadyi, twakadifwili kwetu.” (1 Anya. 17:12) Tuhanjekenu hayuma yitunateli kudizila kuyuma yahanjekeluwu.
Mumbanda ntuluwa welukili nindi Elija wadiña kaIsarela wamwakamineña Nzambi. Tuneluki chumichi hamuloña wamazu ahosheliyi nindi “chahandayi Yehova Nzambi yeyi kwaamu.” Chidi neyi kudi yuma yantesha yelukiliyi hadi Nzambi yawaIsarela, ilaña helukili nindi wateleli kumutena Yehova nindi ‘Nzambi yamuku.’ Washakamineña muZarefwati, mbaka yashindameneni hamusumba waKenani wakuZidoni. MuZarefwati mwatela mwadiña antu adifukwileña kudi Bayali. Hela chochu, Yehova wamweni chuma chachiwahi mudi iwu mumbanda ntuluwa.
Hela chakwila mumbanda ntuluwa kazweñi wakuZarefwati washakamineña nawantu apesheleña, wadiña nachikuhwelelu. Yehova watemesheli Elija kudi ona mumbanda ntuluwa kulonda ayikwashi wonsu wawu ayedi mumbanda nikaprofwetu. Tunateli kudizilaku chuma chalema chikupu kuniyi nsañu.
Bayi neyi antu ejima adiña muZarefwati apesheleña Bayali adiña atama chikupuku. Yehova chamutemesheliyi Elija kudi ntuluwa, wamwekesheli nindi wakamenaña antu akweti nyichima yayiwahi achidi kanda atachiki Kumuzatila. Eñañi, ‘munyunza yejima, muntu wamwakamaña yena, welaña mwaloña, amutiyaña kudi Nzambi kuwaha.’—Yil. 10:35.
Antu añahi ashakama mwiluña denu adi neyi ntuluwa wakuZarefwati? Hela chakwila ashakamaña nawantu ayaña mukwitiya kwakutwamba, hadaha afwilaña kwila yuma yayiwahi. Hadaha eluka yuma yantesha hadi Yehova indi kwiji hiyamwilukaku nawa anakukeñeka kuyikwasha kulonda ekali mukudifukula kwalala. Komana mwakeñakeñaña antu amuchidawa kulonda muyikwashi?
“SAMBILAKU NTAHI KUNTUÑILA KADINKENDI KAMI”
Toñojokenu chikupu hachuma chamulejeliyi Elija ona ntuluwa nindi yeli. Mumbanda wafumini tuhu hakumuleja nindi chochayi dinkendi dakukumishaku, namwanindi akadyi adifwili kwawu. Indi Elija wamwilili nindidi? ‘Bayi wutiya womaku, yaku wakeli muwunahoshi. Sambilaku ntahi kuntuñila kadinkendi kami, wunleteli kunu, nkumininaku hiwakatuña keyi namwaneyi. Muloña Yehova, Nzambi yaIsarela, nahoshi dehi nindi, Muchitayi chawuña himwakamanaku, nimuchipunda chamanji himwakanoñaku, ndo-o nikwifuku damba kanokeshayi Yehova nvula hamaseki.’—1 Anya. 17:11-14.
Antu amakwawu adi kuhosha nawu, ‘Tukwinki yakudya yetu yakukumishaku. Wunakutwamba.’ Ilaña ona mumbanda wantuluwa dicheliliyi wanyi. Hela chakwila hamwilukili Yehova chikupuku, wamukuhweleleli Elija nawa welili mwamulejeliyi. Chikuhwelelu chindi achesekeli nankashi nawa wafuukwiluhu yuma yayiwahi!
Nzambi hamushili ona ntuluwa kazweñuku. Neyi chamukaniniyi Elija, Yehova wamuvulishilili ntuluwa chakwila muchitayi chawuña nimuchipunda chamanji mwamanini wanyi, wayihandishili aElija, ntuluwa nimwanindi weyala kushika nimpinji yamanini chaaña. Eñañi, ‘chitayi chawuña nichipunda chamanji hichamaninuku mwomwizu daYehova dahosheliyi kukanwa kaElija.’ (1 Anya. 17:16; 18:1) Neyi iwu mumbanda wakaanini kwila mwamulejeluwu, mutenowu dinkendi datuñiliyi natuwuña twashalili muchitayi nichipunda chamanji chiña chamanini. Ilaña wadiña nachikuhwelelu, wamukuhweleleli Yehova nawa wasambilili kumudiisha Elija.
Ichi chatudizishaña nawu Nzambi wakiswilaña antu amukuhwelelaña. Neyi mumona chuma chikweseka kashinshi kenu nawa mumwekesha chikuhwelelu, Yehova nateli kuyikwasha. Nateli kwikala Mukwakuhana, Mukwakuyikiña, hela Ibwambu denu kulonda yayikwashi muumiki kweseka kumunamoni.—Kwid. 3:13-15.
Muchaaka cha 1898, Zion’s Watch Tower yashimwini chuma chitwadizilañaku kunsañu yaniwu ntuluwa nawu: “Neyi ona ntuluwa wamwekesheli chikuhwelelu chikupu hakwovwahila mwamulejeluwu, dichi Mwanta wateleleli kumukwasha kuhitila mudi Kaprofwetu; neyi hamwekesheli chikuhweleluku, adi kuzatisha ntuluwa mukwawu. Chochimu ninetu, chitunakwenda munjila yaya kuwumi mpinji yikwawu Mwanta nateli kweseka chikuhwelelu chetu. Neyi tumwekesha chikuhwelelu akatukiswila; neyi tukañanya kumwekesha chikuhwelelu, hiyakatukiswilaku.”
Neyi tuholokela mukweseka, twatela kulomba wunlomboli waNzambi wekala muNsona nimunyikanda yetu yashindamena haBayibolu. Kuhiñahu twatela kulondela wunlomboli waYehova hela chakwila chinateli kutukalila hakwila tuwulondeli. Mwalala akatukiswila neyi tulondela chahosha ichi chishimu chamaana nawu: “Mukuhweleli Yehova namuchima weyi wejima, bayi wushindamena kukashinshi keyeyi awenuku. Mwitijaña Yehova mwejima muwukwilaña, niyena wakakwolwelaña njila jeyi.”—Yish. 3:5, 6.
‘KOMANA WUNENZI KULONDA WUJAHI MWANAMI TAHINDI?’
Chikuhwelelu chaniwu ntuluwa chekalili cheñi mukweseka. Bayibolu yahosha nawu, “Hakulondela hayumiyi mwana kayenowu mumbanda mwiniitala hakukata, yikatu yindi yaswejeli nankashi, nijakwona nehi.” Hakukeña kwiluka chuma chaleteli iku kukala, mama yawantu wamudilili Elija nindi: “Eyi muntu waNzambi, ami nikweti nsañwinyi naneyi? Komana wunenzi kunu kudami kulonda wanukishi kuluwa kwami, wujahi nimwanami, tahindi?” (1 Anya. 17:17, 18) Indi awa mazu akuhila atalisha mudihi?
Komana mumbanda wanukili nshidi yaleñeleli chinleji chindi chitachi kumukabisha? Komana watoñojokeli nindi Nzambi wamubabesheli kuhitila mukumujahila mwana nawa Elija wadiña ntemesha yaNzambi wakujahana? Bayibolu hiyatuleja mwenimuku, ilaña tweluka chikupu netu: Ntuluwa hamutwikili Nzambi muloña nindi diyi wakoñeli chuma chatamaku.
Elija watela wahayamini chafwili mwana kantuluwa weyala nichahosheliyi nindi kaprofwetu diyi waleñeleli mwanindi yafwi. Chasendeliyi mujimba wamwana nakumutwala mwiitala dahewulu, Elija hakubilela nindi: “Eyi Yehova Nzambi yami, komana iwu mumbanda wantuluwa inashakama nindi wunamuleteli yatama yakujaha mwanindi?” Kaprofwetu wakameneni nindi ijina daNzambi akudisawula neyi yeteja nindi iwu mumbanda wachisambu yamoni yuma yomisha mbaña. Dichi Elija wabileleli kudi Yehova nindi: “Eyi Yehova Nzambi yami, amufuntishili cheñi mwani iwu mwana wumi windi muntulu yindi.”—1 Anya. 17:20, 21.
“TALA MWANEYI IWU NAHANDI DEHI”
Yehova watiyili kulomba kwaElija. Mumbanda wantuluwa wamwakameneni ona kaprofwetu kaNzambi nawa wamwekesheli chikuhwelelu. Chimwahitili mpinji, Nzambi wamwitejeli ona mwana yofwi, muloña welukili nindi wakamusañula, kusañula kwatachi kwasonekawu muNsona nawa kukaleñela makiñu awantu akumbidi akekali nakuchiñeja. Dichi Elija Chamulembeleliyi, Yehova wamusañwili ona mwana. Toñojokenu muzañalu wadiña nanona mumbanda ntuluwa hampinji yahosheliyi Elija nindi: “Tala, mwaneyi iwu nahandi dehi.” Kuhiñahu mumbanda hakumwila Elija nindi: “Ichi dinu neluki dehi komana eyi wumuntu waNzambi, niizu daYehova didi mukanwa keyi dalala.”—1 Anya. 17:22-24.
Nsañu yekala ha 1 Anyanta kapetulu 17 hiyahoshahu cheñi hadi iwu mumbandaku. Hela chochu, kwesekeja namazu amawahi ahosheliyi Yesu hadi iwu mumbanda, watela wekalili kambuña aYehova washinshika. (Luka 4:25, 26) Nsañu yaniwu mumbanda yatudizishaña nawu Nzambi wakiswilaña antu elaña yuma yayiwahi kudi ambuñindi. (Mat. 25:34-40) Yamwekeshaña nawu Nzambi wenkaña antu jindi ashinshika, nihampinji yakukaankila. (Mat. 6:25-34) Iyi nsañu yamwekeshaña cheñi nawu Yehova wafwilaña nawa wukweti wuswa wakusañula afu. (Yil. 24:15) Eñañi iyi hiyuma yayiwahi yitwatela kumwanukilahu mumbanda ntuluwa wakuZarefwati.
[Mwevulu wudi hefu 14]
Hamuloña wakwila ntuluwa wamukuhweleleli Nzambi yaElija, Yehova, wamukiñili hamu nimwanindi