MALWIHU AMUBAYIBOLU ANAYAKULI

Muloñadi wutwatela kulombela netu Wanta waNzambi winzi?

Wanta waNzambi hinfulumendi yamwiwulu. Yesu walejeli atumbanji twindi kulomba nawu wanta winzi muloña wukaleta kuloña nikuwunda hamaseki. Kwosi nfulumendi yawantu yinateli kumanisha chikupu madombu, kuheñesha wuñaji hela yikatu, ilaña Wanta waNzambi wunateli nawa wukamanisha kukala kwejima. Nzambi watonda Mwanindi Yesu kwikala Mwanta waniwu Wanta. Yehova watonda cheñi izanvu dawatumbanji twaYesu kulonda akayuuli hamu naYesu muWanta.—Tañenu Luka 11:2; 22:28-30.

Wanta waNzambi keña wujilumuni ejima azuñañeshaña chiyuulu chaNzambi. Dichi neyi tulomba netu Wanta waNzambi winzi, tunakulomba netu nfulumendi yaNzambi yifumishuhu nfulumendi jawantu jejima.—Tañenu Danyeli 7:13, 14; Chimwekeshu 11:15, 18.

Muloñadi Wanta waNzambi chiwukakwashila antu?

Yesu hiMwanta watelela muloña wukweti luwi. Chineli hiMwana kaNzambi, wukweti ñovu yakukwasha antu ejima amulembelelaña Nzambi nawu yayikwashi.—Tañenu Masamu 72:8, 12-14.

Wanta waNzambi wukakwasha antu ejima alombaña nawu winzi nawa elaña yuma yakeñañayi Nzambi. Himwamba kaditoñesha neyi mwiluka chahosha Bayibolu haWanta waNzambiku.—Tañenu Luka 18:16, 17; Yowanu 4:23.

Neyi munakukeña nsañu yikwawu, talenu kapetulu 17 kawunu mukanda, Chumanyi Chacheni Chatañishaña Bayibolu?, wasonekawu kudi aYinsahu jaYehova

Iwu mukanda wudi cheñi ha www.jw.org

[Mwevulu wudi hefu 16]

Komana munakufwila kwiluka nsañu yayivulu yahosha haWanta waNzambi niyuma yiwukela?