Kwakama Muloña Wawubanji

Alona nindi, “Chinatiya sayilini yinavumi, muchima wetaña mwivumu nawa nabatamaña. Hela nabatami nadakamenaña. Natiyaña woma nankashi neyi nidi hanji muloña kwakubatama kwosi. Ifuku dimu, chinayilaña mumukwakwa, natachikili kudila chakwila nakañenyeña nikwona. Hashimbwili hakwila nileki kudila. Sayilini yavumini cheñi.”

Njita hinjila yimu mwenjilaña wubanji. Chakutalilahu, neyi enu hela muntu wudi wejima imwakeña anamuwani nachikatu chafwana, mukutiya neyi anayishimwini kufwa. Antu amakwawu, akamaña muloña wayuma yikamwekana kumbidi. Atoñojokaña nawu, ‘Anyanetu hela anyanawu akashakamaña mwituña danjita, wubanji, ituña dikweti mpepela yatama ninyisoñu?’ Tunateli kuumika ñahi nakwakama kwamuchidiwu?

Muloña wakwiluka nawu yuma yatama yamwekanaña, ‘muntu wamaana wamonaña wubanji nawa wabatamaña.’ (Yishimu 27:12) Chochitwafwilaña kudikiña kumujimba, twatela kuwana njila yakudikiñilamu kuyitoñojoka nimuyililu yetu. Yisela yamadombu ninsañu yahayikuzulemba yikweti nyevulu yatama yaleteshaña etu nianyanetu kwakama. Kutondolwela nyevulu yamadombu hichaya mukwila nawu tunakukaana netu hikwekala madombuku. Nzambi hatuleñeli nindi tutoñojokeña hayuma yatamaku. Ilaña twatela kuyinzesha ‘nayuma yejima yalumbwa, . . . yaloña, . . . yitooka, . . yasweja, kuwaha.’ Neyi twila mwenimu, “Nzambi wakuwunda” wukutwinka kuwunda kwamuyitoñojoka nimumuchima.—Afwilipi 4:8, 9.

KULOMBA CHIKWALEMENA

Chikuhwelelu chalala chatukwashaña kuumika yuma yatwakameshaña. Bayibolu yatulejaña nawu ‘babalenu kulonda mulombeña.’ (1 Petulu 4:7) Twatela kulomba kudi Nzambi kulonda yatukwashi yatwinki maana nawa tuhamuki nikushinda kukala kutunakumona nakwiluka netu “watiyaña mutukulomba mwejima.”—1 Yowanu 5:15.

Bayibolu yalumbulula nawu Satana, diyi “wayuulaña mpata yamunu mwishina” bayi Nzambuku nawa yahosha cheñi nawu “mpata yamunu mwishina yashakamaña mudi owu watama.” (Yowanu 12:31; 1 Yowanu 5:19) Dichi Yesu hazatishili nhoshelu yankiji hakutuleja nindi lombenuña nenu: ‘Twamwini kudi owu watamaku.’ (Matewu 6:13) Alona nindi, “Neyi sayilini yinatachiki kuvuma, nalombaña kudi Yehova kulonda niwundishi muchima. Cheñi nfumwami watambikaña kulonda tulombeli hamu. Kulomba kwankwashaña chikupu.” Chochahosha Bayibolu nawu, “Yehova wudi kwakwihi nawantu ejima akumutambika, chalala chakubula kutwamba.”—Masamu 145:18.

YUMA YITWACHIÑEJAÑA

Mumpanji yindi yahaMpidi, Yesu walejeli atumbanji twindi kulomba nawu: “Wanta weyi winzi.” (Matewu 6:10) Wanta waNzambi wukafumishahu yuma yejima yatama yatwakameshaña. Nzambi ‘wakafumisha majita mwakumina iseki dejima’ kuhitila mudi Yesu, “Kalamba waKuwunda.” (Isaya 9:6; Masamu 46:9) “Yena [Nzambi] wakekala hakachi kanyuza yayivulu nakuyisompesha . . . Munza hiwakanyamwina munza wukwawu mpoku yakabaluku, hiyakadiza nawa cheñi njitaku. . . Kwosi wakayitiyisha woma.” (Mika 4:3, 4) Yisaka yamuzañalu ‘yakatuña matala, nakushakamamu. Akadima matempa anyivinyu, akadya nyikabu yayu.’ (Isaya 65:21) “Mwenimbu hakahosha nindi, ‘Ami nakataku.’”—Isaya 33:24.

Makonu, hela tunakweseka kudikiña, mpinji yikwawu “kukululakana kwayilulakenu” kwatushintakeshaña hela netu twekalaña heluña datama hampinji yatama. (Mukwakutañisha 9:11) Kufuma kunyima njita, wubaji ninyisoñu yinatwalekuhu kuhondesha antu amawahi. Kuchiñejanyi kutukweti kutalisha hadi awantu abula nyiloña anakuhondeka?

Antu akadi kutwesha kuchinda kudi muntu chiña Nzambi hohu, afwa dehi, akahanda cheñi. Chayinu mpinji, akama tulu nawa Nzambi wayanukaña chikupu sampu nimpinji yakela ‘antu ejima adi mumajamu . . . anedikumu.’ (Yowanu 5:28, 29) Kutalisha hansañu yakusañuka, Bayibolu yatukana nawu: ‘Tudi nakuchiñeja kudi neyi chikuñu chakwimika nachu watu chawumi, chalala nawa chakola.’ (Aheberu 6:19) Nawa Nzambi “nakoleshumu dehi kudi antu ejima nanochu chanamusañuliyi [Yesu] mudi afu.”—Yililu 17:31.

Ichi, antu anakukeña kumutiyisha Nzambi kuwaha niwena anakwakama. Kuhitila mukwila yuma yatela kuyikwasha yidi neyi kukundama kwakwihi naNzambi mukulomba nikukuhwelela yuma yashimunawu muBayibolu nawu yakamwekana yinakwashi Paul, Janet niAlona kuumika kwakama. Neyi chochayikwashiluwu awantu, ninenu “Nzambi wakuchiñeja ayinki muzañalu nikuwunda kwejima mukukuhwelela kwenu.”—Aroma 15:13.