MUTU WUDI HAKAVA | MULOÑADI YESU CHAKABAKENENIYI NIKUFWA?
Yumiyi Komana Yamwekeni?
Muchaaka cha 33 C.E., Yesu wakuNazareta amujahili. Amutwikili nyiloña nawu nakuzuñisha nfulumendi, amuhumpwili chikupu nikumupopela hamutondu. Wafwili namabinjila chikupu. Ilaña Nzambi wamusañwili nawa chimwahitili mafuku 40, Yesu wayili mwiwulu.
Iyi nsañu yayiwahi twayiluka kuhitila muNyikanda yiwana yaNsañu Yayiwahi yawakwaKristu yachiGriki, yatenañawu nawu Chitiyañenu Chachiha. Komana yumiyi chalala yamwekeni? Ilu lwihu lwalema chikupu. Neyi yumiyi hiyamwekeniku, dikwila nawu yuma yakuhwelelawu akwaKristu yamukunkulwayi nikuchiñeja kwachiñejañawu kwakwikala nawumi wahaya nyaka muParadisa kwakekala hohu neyi hichilota chakabula kumwekana. (1 Akorinda 15:14) Munjila yikwawu, neyi yumiyi chalala yamwekeni, dikwila nawu antu akahandaña chiwahi kumbidi, chimunateli kulejaku akwenu. Komana nsañu yamuNyikanda yaNsañu Yayiwahi yalala tahindi yakulumbisha?
WUNSAHU WAMWEKESHAÑADI?
Kwambukaku nansañu yanyaka yakutwamba, ansoneki aNsañu Yayiwahi asonekeli nsañu yalala nawa nakashinshi. Chakutalilahu, mwekala majina alala amaluña nawa tunateli kuya kunawa maluña nimakonu. Ashimuna hadi antu adiñaku, chakwila niantu asonekaña nsañu yanyaka niwena ayitena.—Luka 3:1, 2, 23.
Yesu amuteneni kudi ansoneki ansañu amuyaaka nkulakaji yakusambila niyamuchiyedi.a Njila yafwililumu yashimunawu muNyikanda yaNsañu Yayiwahi, yesekana nanjila yajahilileñamu aRoma antu hayina mpinji. Kubombelahu, yuma yamwekeni ayishimuna neyi chochiyadiña nawa yamwekeshaña chayikabishiliwu atumbanji twaYesu. (Matewu 26:56; Luka 22:24-26; Yowanu 18:10, 11) Iyi nsañu yejimiyi yinakumwekesha chikupu nawu ansoneki aNsañu Yayiwahi adiña nakashinshi nawa asonekeli nsañu yaYesu kwesekeja nachiyadiña.
INDOCHU KUSAÑUKA KWAYESU?
Hela chakwila antu eluka nawu Yesu wadiñaku nawa wafwili, amakwawu ajinookaña nsañu yakusañuka kwindi. Niapostolu indi hiyashikeneni dakwiteja nsañu yayilejeluwu yakusañuka kwindiku. (Luka 24:11) Kujinooka kwawu kwejima kwamanini chelili wena niakwawu amumoni Yesu asañwiluwu hampinji yamboka-mboka. Mpinji yimu izaza dawantu akubadika ha 500 amumweni namesu kapu.—1 Akorinda 15:6.
Atumbanji ashimwinini nsañu yakusañuka kwaYesu kudi antu ejima nakuhamuka, chakadi kutiya woma nawu akuyikasa hela kuyijaha, kushilahu tuhu niantu amujahili Yesu. (Yililu 4:1-3, 10, 19, 20; 5:27-32) Komana atumbanji amavulu adi kumwekesha kuhamuka neyi elukili wanyi nawu Yesu amusañwili? Kusañuka kwaYesu dikwayikoleshaña akwaKristu kwikala neyena makonu neyi chichadiña kunyima.
Nsañu Yayiwahi yahosha hakufwa nikusañuka kwaYesu yamwekeshaña chikupu nawu iyi nsañu yamwekeni. Neyi mukutañaña iyi nsañu nakanañachima mukwiluka chikupu nenu iyi yuma yamwekeni. Munateli kwikala nachikuhwelelu chakola neyi mwiluka muloña waleñeleli yumiyi yimwekani. Chibaaba chinalondeluhu chikulumbulula.
a Tacitus, wasemukili mu 55 C.E., wasonekeli nindi “Christus, kwafuma ijina [dawakwaKristu], amukabishili chikupu kudi nguvulu yetu wumu wahakachi kawanguvulu, Pontusi Pilatu muchiyuulu chaTiberusi.” Yesu amushimwini cheñi kudi Suetonius (wamuyaaka nkulakaji yakusambila); kaYudeya mukwakushimuna nsañu wejina daJosephus (wamuyaaka nkulakaji yakusambila); niPliny wakansi, ñuvulu wamuBithynia (wamuyaaka nkulakaji yamuchiyedi yakusambila).