“Chadiña Chawaana, Chinabulahu Dehi Kutambwila”

Ichi dichatiyili kansi wamumbanda wayaaka 13 hampinji yamwinkeliwu kakawa. Mumbanda wakuluka yitembi mujakulandisha wahosheli nindi kompyuta yamwinkeliwu kudi atata yindi hadiña kushikola yadiña chawaana chahimpili chihandilu chindi. Iyala wafumini tuhu hakusumbula, chamwikeliwu kaadi yakwanakana nachu chaaka chatachi muwulu kudi ñodindi wahosheli nindi, ichi chadiña chawaana chachiwahi chabulahu dehi kutambwilayi.

Chaaka nichaaka, antu amavulu akeñakeñaña chawaana chachiwahi chakwinka ibwambu dawu hela ntaña yawu hamafuku alemeshawu. Nawa antu amavulu akeñaña kutiya ñakwilu yidi neyi iyi yitunashimuni hewulu. Indi enu? Komana mwakeñaña kuhana hela kutambwila yawaana yayiwahi chikupu?

Dichitwakeñaña wejima wetu, bayi neyi chawaana chinateli kuzañalesha hohu muntu wunatambwiliku, ilaña nimuntu wunahani. Kubombelahu, Bayibolu yahosha nawu: “Mukuhana mwekala muzañalu chikupu kubadika wekala mukutambwila.” (Yilwilu 20:35) Dichi, tukwikala namuzañalu wekala mukuhana neyi chawaana chetu achikeña kudi muntu itunenki.

Hanu dinu, chawaana chenu chimunahani chinateli kuyizañalesha ñahi enu nimuntu imunenki? Indi neyi chadiña chakala kuhana chawaana “chachiwahi,” chumanyi chimwatela kwila hakwila nawu chawaana chenu achitambwili namuzañalu?