Malwihu Kufuma Kudi Antañi
Muloñadi nsañu yaMatewu niyaLuka yahosha hachihandilu chaYesu chiyambukila?
Nsañu yaMatewu kutalisha hayuma yamwekeni hakusemuka kwaYesu nichatachikili chihandilu chindi yambuka chantesha nansañu yaLuka muloña ansoneki aNsañu Yayiwahi ashimwini yuma yamwekeni munjila yashiyashana.
Nsañu yaMatewu yahosha nankashi hadi Yosefu. Yashimuna cheliliyi Yosefu hampinji yadiñayi Mariya nevumu, chaloteliyi kañelu nakumulumbulwila yuma chiyadiña nichetejeliyi mwamulejeliwu. (Mat. 1:19-25) Matewu watwalekelihu kushimuna chimwenu chamweniyi Yosefu henjili kañelu nakumuleja nindi yatemukili kuEjipitu, chatemukiliyi nachisaka chindi, chilota mwamweniyi mudi kañelu nakumuleja nindi yafunti kuIsarela, chafuntiliyi, nichafuukwiliyi kushakama nachisaaka chindi kuNazareta. (Mat. 2:13, 14, 19-23) Mutupetulu twakutachikilahu twaNsañu Yayiwahi yaMatewu, Yosefu amutena kapampa 8, ilaña Mariya amutena kapampa katanu.
Munjila yikwawu, nsañu yaLuka yashimuna nankashi hadi Mariya. Mwabombela ninsañu yaMariya chamubulakeniwu kudi kañelu Gabireli, chayiliyi nakumuhempula Elizabeta, niMariya chamushimekeliyi Yehova. (Luka 1:26-56) Luka washimwini cheñi mazu ahosheliyi Simeyona kudi Mariya kutalisha chakakabakanayi Yesu kumbidi. Luka wasonekeli mazu ahosheliyi Mariya bayi aYosefu hampinji yayiliyi kutembeli hadiñayi Yesu nayaaka 12. Luka wabombelelihu nindi yuma yejimiyi yamukundamini Mariya. (Luka 2:19, 34, 35, 48, 51) Mutupetulu tuyedi twakutachikilahu mumukanda waNsañu Yayiwahi wasonekeliyi Luka, Mariya amutena kapampa 12 ilaña Yosefu amutena kapampa kasatu. Dichi, Matewu walumbulula nsañu yayivulu kutalisha hadi Yosefu niyuma yelileñayi ilaña Luka washimuna chikupu mudimu wazatiliyi Mariya niyuma yamweniyi.
Nawa, nsañu yasonekeliwu akwakusoneka Nsañu Yayiwahi ayedi hadi ankakulula jaYesu yambuka. Matewu walumbulwili hohu hadi ankakulula jaYosefu nawa wamwekesheli nindi chineli Yesu wadiña mwana kaYosefu wakuwanamu wadiña nakukoleka kwakuswana hetanda daDavidi. Muloñadi? Muloña Yosefu wadiña mwana wamuchisaka chaMwanta Davidi kuhitila mudi Solomoni mwana kaDavidi. (Mat. 1:6, 16) Hela chochu, Luka wasonekeli ankakulula jaMariya nawa wamwekesheli nindi Yesu “wavwalikili mumujimba wawuntu” kufuma muwanta waDavidi. (Rom. 1:3) Muloñadi? Muloña Mariya wadina wamuchisaka chaMwanta Davidi kuhitila mudi nkakulula Natani mwana kaDavidi. (Luka 3:31) Hanu dinu, Muloñadi Luka chabuliliyi kusoneka nsañu yamutaña kutalisha hadi Mariya kwikala mwana kaHeli? Muloña akwakusoneka nsañu yayisaka asonekeleña nyitaña kuhitila mudi muntu weyala. Dichi Luka chasonekeliyi mutaña waYosefu nakumulumbulula kwikala mwana kaHeli, chamwekesheli nawu Yosefu wadiña mukuwa Heli.—Luka 3:23
Nsañu yasonekeliyi Matewu niyaLuka kutalisha kuyisaka yamwekeshaña chikupu nawu Yesu wadiña Mesiya ashimwineñahu dehi. Nawa, walala kutalisha kuchisaka mwavwalikilili Yesu awilukili chikupu chakwila aFwalisi nawaSadusi abulili mwakuleyela. Makonu, nsañu yasonekeliwu aMatewu naLuka dihashindamena chikuhwelelu chetu nawa hiwunsahu wamwekeshaña nawu yikaninu yaNzambi yalala.