Komana Chalala Yesu Wanfwilili Ami?

MUBAYIBOLU twatañañamu nsañu yawamayala ashinshika ‘atiyileña neyi chitwatiyaña etu.’ (Yak. 5:17) Chakutalilahu, tunateli kwiluka mwatalishiliyi Pawulu chahosheliyi mazu ekala haAroma 7:21-24 nindi: “Neyi nifwila nami nikoñi chuma chaloña, chuma chatama dichenzaña mudi ami. . . . Yayo-o, ami nshona!” Mazu ahosheliyi Pawulu atukoleshaña hampinji yitunakulwisha nakubula kuwanina kwetu.

Pawulu wahosheli cheñi chaditiyileñayi. Ha Añalija 2:20, wahosheli hayuma yakuhweleleliyi nindi Yesu “[wamukeñeli] nawa wadihanini yomweni kukoola [yena] halwindi.” Komana ninetu dichi ‘twatiyaña’? Hadaha mpinji yejima wanyi.

Neyi tuchidi kudimona netu tudi amukunkulwayi muloña wanshidi yitwakoñeli kunyima, mpinji yikwawu chinateli kutukalila kwiteja netu Yehova watukeña nawa watwanakena dehi nshidi nikubula kumona neyi Yesu hahanini ifutu danyiloña kukoola etuku. Komana Yesu wakeñaña nindi tumoneña ifutu danyiloña muniyi njila? Neyi dimu, chumanyi chinateli kutukwasha kwila mwenimu? Tuhanjekenu hanawa malwihu ayedi.

YESU CHAMONAÑAYI MULAMBU WINDI

Yesu wakeñaña tumoneña mulambu windi netu hichawaana chahaniniyi kukoola etu. Tuneluki ñahi? Fwikijenu mazu ekala haLuka 23:39-43. Iyala wumu amupopeli hamutondu wakuyandishila kwakwihi naYesu. Wetejeli nindi waluwañesheli. Iwu muloña watela wadiña weneni nankashi muloña ambanji diwu ababesheleñawu chamuchidiwu. Hamuloña wakuyeña kwatiyileñayi, iwu iyala wamulembeleli Yesu nindi: “Wakañanukaña neyi wuneñili dehi muWanta weyi.”

Yesu wamwakwili nindidi? Fwikijenu iku chinakumuyeña hakushetumuna mutu windi nakumutala. Hela chakwila chamuyeñeleña, watumbili chimwemweta nakumuleja iwu iyala nindi: “Inakukuleja chalala dalelu nami, wakekala nanami muParadisa.” Yesu wadi kumuleja hohu iwu iyala nindi “Mwana kamuntu, [wenjili] . . . [nakuhana] wumi windi kwikala ifutu danyiloña dakukuula nachu antu amavulu.” (Mat. 20:28) Ilaña Yesu wamwekesheli nindi wahanini mulambu windi kukoola iwu iyala. Wazatishili izu dadovu chazatishiliyi izu dakwila nindi “wakekala” niizu dakwila nindi “nanami.” Nawa wamulejeli iwu iyala nindi wakekala muparadisa hamaseki.

Chakadi nikujina, Yesu wakeñeleña iwu iyala yeluki nindi mulambu windi wakamukwasha. Neyi Yesu watiyili muniyi njila hadi ona mbanji wabulili nimpinji yakumukalakela Nzambi, nateli kwanakena mukwaKristu wapapatishewa wamukalakelaña Nzambi. Chumanyi chinateli kuyikwasha kukuhwelela chikupu nenu mulambu waKristu wakayikwasha ninenu hichidi namuloña nanshidi yimwakoñeliku?

CHUMA CHAMUKWASHILI PAWULU

Chineli Yesu wamwinkeli Pawulu mudimu wakushimwina, chumichi chaletesheli Pawulu kwiluka nindi Yesu wamufwilili. Munjilanyi? Walumbulwili nindi: “Namusakililaña Kristu Yesu Mwanta wetu, wanyinkeli ñovu, muloña wammweni kushinshika kuhitila mukunyinka mudimu, hela chakwila kunyima nadiña mukwakusawula Nzambi nimukwakukabisha antu jindi nawa mukwakasawuntu.” (1 Tim. 1:12-14) Mudimu wamwinkeliwu Pawulu kudi Yesu wamukwashili kwiluka nindi Yesu wamutiyilili luwi, wamukeñeli nikumukuhwelela. Yesu watwinka ninetu hamuntu-hamuntu mudimu wakushimwina nsañu yayiwahi. (Mat. 28:19, 20) Komana mudimu wakushimwina watukwashaña kwiluka netu Yesu watufwilili ninetu?

Albert wafunta kudi Yehova katataka kufuma hanyima yakushakama yaaka 34 kunsa yakuloñesha walumbulwili nindi: “Nakavulamena wanyi nshidi yinakoñeli kunyima. Ilaña neyi nidi mumudimu wamwinha natiyaña neyi chatiyiliyi kapostolu Pawulu, muloña Yesu diyi wanyinka mudimu wakushimwina. Iwu mudimu wanleñela kwikala namuzañalu chikupu muchihandilu chami chayinu mpinji nikumbidi.”—Mas. 51:3.

Allan wadiña mbanji henohu kanda yadizi chalala wahosheli nindi: “Nichidi kutoñojoka yuma yatama yejima yinayikoñeleña antu. Mpinji yikwawu, naneñaña. Ilaña namusakililaña Yehova muloña wañiteja ami mukwanshidi kushimwina nsañu yayiwahi kudi antu. Neyi nimona antu anakwiteja nsañu yayiwahi, chañanukishaña chawahayi Yehova. Natiyaña neyi wanzatishaña ami kulonda nikwashi antu adi neyi chinadiña.”

Neyi tudi mumudimu wamwinha twelaña yuma yayiwahi nawa twatoñojokaña chachiwahi. Chatukwashaña kumona netu Yesu watutiyilaña luwi, watukeña nawa watukuhwelela.

YEHOVA WABADIKA NYICHIMA YETU

Nyichima yetu yikutwalekahu kutukabisha nayuma yatama yitwelili kunyima sampu nimpinji yakafumishawu yuma yatama nikumujilumuna Satana. Chumanyi chikutukwasha kushinda iyi yitoñojoka yatama?

Jean wadinkaña nyiloña muloña wayuma yatama yakoñeleñayi hadiñayi kansi wahosheli nindi: “Natiyaña kuwaha kwiluka nami ‘Nzambi wabadika nyichima yetu.’” (1 Yow. 3:19, 20) Kufwana Jean, ninetu tunateli kukundejewa neyi twiluka netu Yehova niYesu eluka nawu twawanina wanyi. Anukenu nenu, ahanini ifutu danyiloña, hadi antu akwanshidi abalumukaña munyichima bayi antu awaninaku.—1 Tim. 1:15.

Neyi tulombelahu nikutoñojoka chikupu chelileñayi Yesu nawantu abula kuwanina nawa neyi tudishaku kuzata mudimu wakushimwina watwinkayi, twelukaña chikupu netu Yesu waheni ifutu danyiloña kukoola etu. Neyi mwila mwenimu, kufwana Pawulu munateli kuhosha nenu: Yesu “wankeñeli nawa wadihanini yomweni kukoola ami.”