“Twayenu Kudi Ami, . . . Nukuyihizumwisha”

1. Kwesekeja na Matewu 11:28-30, chikaninwinyi chakaniniyi Yesu?

YESU wakanini izaza dawantu dadiña nakumutiyilila. Wahosheli nindi: “Twayenu kudi ami, nukuyihizumwisha.” (Tañenu Matewu 11:28-30.) Awa mazu hiyadiña amukunkulwayiku. Chakutalilahu, toñojokenu Yesu chamwililiyi ona mumbanda wakatili chikatu chafwana.

2. Yesu wamwililidi ona mumbanda wakatileña?

² Iwu mumbanda wakeñeleña wukwashu chikupu. Wayili kudi ayimbuki amavulu nindi hekwawu akumuuka. Wakabakeni nanichi chikatu hadi yaaka 12, ilaña kwosi wamukili. Kwesekeja naNshimbi wadiña wamajilu. (Lev. 15:25) Watiyili nawu Yesu nakuuka akata, dichi wayili nakumuwana. Chashikiliyi wakwatili kunzombu yakwihina dindi dahewulu nawa washikeneni dakukola. Bayi neyi Yesu wamukili hohuku, ilaña wamuletesheli yaditiyi nindi wadiña walema nawa wakeñewa. Chakutalilahu, hampinji yahanjekeleñayi nindi, wamwekesheli nindi wamukeña nawa wamulemesha chamuteneniyi nindi “mwanami.” Chalala iwu mumbanda wahizumukili nawa wakoleli!—Luka 8:43-48.

3. Malwihwinyi itukuhanjekahu?

³ Ilukenu nenu ona mumbanda wayili kudi Yesu. Wazatili nañovu hakwila nawu yayi kudi yena. Chochimu ninetu makonu, twatela kuzata nañovu hakwila nawu ‘tuyi kudi’ Yesu. Chayinu mpinji Yesu hanateli kuuka muchihayamisha yikatu yawantu ejima ‘ayaña kudi’ yenaku. Ilaña wuchidi kututambika nindi: “Twayenu kudi ami, . . . nukuyihizumwisha.” Muchinu chibaaba, tukuhanjeka malwihu 5: Tunateli ‘kuya’ ñahi kudi Yesu? Yesu watalishili mudihi chahosheliyi nindi: “Sendenu mpaanda yami”? Yumanyi yitwatela kudizila kudi Yesu? Muloñadi mudimu watwinkayi kuzata chiwatuhizumwishilaña? Nawa tunateli kutwalekahu ñahi kuhizumuka mumpaanda yaYesu?

“TWAYENU KUDI AMI”

4-5. Njilanyi jikwawu mutunateli ‘kuyila kudi’ Yesu?

⁴ Njila yimu yitwatela ‘kuyilamu kudi’ Yesu hikudiza yuma yahosheleñayi niyelileñayi. (Luka 1:1-4) Kwosi muntu wunateli kutwilila iyi yumaku, ilaña twatela kudiza etu aweni. Cheñi, tunateli ‘kuya kudi’ Yesu kuhitila mukupapatishewa nakwikala kambanji kaKristu.

⁵ Njila yikwawu ‘yakuyilamu kudi’ Yesu hikuya kudi akulumpi neyi tunakukeña wukwashu. Yesu wazatishaña awa “amayala kwikala yawaana” hakwakamena nyikoku yindi. (Efwe. 4:7, 8, 11; Yow. 21:16; 1 Pet. 5:1-3) Twatela kuzata nañovu hakwila atukwashi kudi akulumpi. Hitwatela kukuhwelela netu akwiluka yuma yitunakutoñojoka niyuma yitunakukeñaku. Toñojokenu chahosheliyi Manakwetu Julian, wahosheli nindi: “Nafumini haBeteli muloña wayikatu nawa mukwetu wumu wanlejeli nindi niyi nikaleji akulumpi kulonda enzi nakunkolesha. Hakusambila nakeñeleña wanyi. Ilaña chimwahitili mpinji nalombeli wukwashu, chenjiliwu nakunkwasha natiyili muzañalu chikupu.” Akulumpi adi neyi amwendeleli Julian, anateli kutukwasha kwiluka “yitoñojoka yaKristu” dikwila nawu, kwiluka nikwimbujola yitoñojoka niyilwilu yindi. (1 Kor. 2:16; 1 Pet. 2:21) Ichi dichawaana chabadika chatela kutwinkawu.

“SENDENU MPAANDA YAMI”

6. Yesu watalishili mudihi chahosheliyi nindi: “Sendenu mpaanda yami”?

⁶ Yesu chahosheliyi nindi: “Sendenu mpaanda yami” hadaha watalishili mukwila nindi “itejenu wuswa wami.” Watela watalishili cheñi mukwila nindi “Inzaku twiñili mumpaanda yami, nawa wejima wetu tukumuzatilaña Yehova.” Awa mazu ejima anakumwekesha nawu twatela kwilahu chuma chimu.

7. Kwesekeja na Matewu 28:18-20, mudimwinyi watwinkawu kuzata, nawa chumanyi chitwatela kwiluka?

⁷ Twetejaña mutambi waYesu neyi tudihana kudi Yehova nawa tupapatishewa. Yesu watambikileña antu ejima kwinza kudi yena nawa hamba kakaanahu muntu hela wumu kumukalakela Nzambiku. (Yow. 6:37, 38) Akwakumulonda Kristu ejima ayinka mudimu wamwinkeliwu Yesu kuzata kudi Yehova. Twatela kwiluka chikupu netu Yesu wukutukwashaña mafuku ejima hampinji yitukuzataña mudimu wetu.—Tañenu Matewu 28:18-20.

“DIZILENU KUDI AMI”

8-9. Muloñadi antu adizoza chenjilileñawu kudi Yesu, nawa malwihwinyi itwatela kudihula?

⁸ Antu adiña adizoza enjileña kudi Yesu. (Mat. 19:13, 14; Luka 7:37, 38) Muloñadi? Toñojokenu hachaambu chadiña hakachi kaYesu nawaFwarisi. Ana anlomboli amunsakililu adiña atama nyichima nawa adinka wanta. (Mat. 12:9-14) Yesu wadiña wakeña antu nawa wadikehesha. Afwarisi akeñeleña kwikala atiyakana nawa alema muloña wayifulu yadiñawu nayu muchituñilu. Yesu waheleli yilwilu yakudinka wanta, nawa wadizishili atumbanji twindi kwikala adikehesha nikukalakela akwawu. (Mat. 23:2, 6-11) Afwarisi adiña nawuswa hadi antu nawa adiña nakuyichinisha. (Yow. 9:13, 22) Yesu wahizumwishileña antu kuhitila mukuyimwekeshela kukeña niluwi.

⁹ Yumanyi yimunadizili kudi Yesu? Dihulenu nenu: ‘Komana antu añiluka nawu nadikehesha nikudizoza? Komana nafwilaña kuzata nyidimu yakehelamu hakwila nawu nikwashi amakwawu? Komana natiyilaña antu luwi?’

10. Yesu wazatileña ñahi nawantu?

¹⁰ Yesu wadiña wakasunuka chakwila antu ejima atiyileña kuwaha kwinza kudi yena nawa watiyileña kuwaha kuyidizisha. (Luka 10:1, 19-21) Wakolesheli atumbanji twindi kwihula malwihu nawa wakeñeleña kwiluka chatoñojokeleñawu. (Mat. 16:13-16) Muloña wachumichi atumbanji twaYesu ayilileñaku hambidi neyi chochakiñañawu nkenu kumpepela yatama kulonda yikuli chiwahi. Adizili yuma yejima yayidizishiliyi Yesu nawa asoñeli nyikabu kuhitila mukwila nyidimu yayiwahi.

11. Malwihwinyi itwatela kudihula?

¹¹ Komana mukweti wuswa hadi akwenu? Neyi mukweti, dihulenu nenu: ‘Nazataña ñahi nawantu kumudimu nawa nashakamaña ñahi nawantu kwitala? Komana naletaña kuwunda? Komana nakoleshaña akwetu kwihula malwihu? Komana natiyililaña chidi yitoñojoka yawu?’ Bayi tuhileña neyi Afwarisi ahilileña neyi antu ayihula nawa akabishileña antu ahosheleña yitoñojoka yambukaku nayawuku.—Maku 3:1-6; Yow. 9:29-34.

“MUKUHIZUMUKA”

12-14. Muloñadi mudimu watwinkayi Yesu chiwatuhizumwishilaña?

¹² Muloñadi chichawahila kuzata mudimu watwinkayi Yesu? Kudi yuma yayivulu, ilaña tukuhanjekahu hohu yantesha.

¹³ Tukweti ankoñi amawahi. Hela chakwila Yehova wabadika chikupu, wakalisha wanyi nawa hakweti lukambuku. Wasakililaña hanyidimu yitwamukalakelaña. (Heb. 6:10) Nawa watwinkaña ñovu yakuzata mudimu watwinkayi. (2 Kor. 4:7; Ñal. 6:5 tth.) Yesu watuleja chakuzata nawakwetu. Akulumpi atubiñaña amwimbujolaña Yesu, “kabiña muneni.” (Heb. 13:20; 1 Pet. 5:2) Azataña kwesekeja nahakumina ñovu jawu, kututiyila luwi, kutukolesha hampinji yinakutulombolawu.

¹⁴ Tukweti amabwambu amawahi nankashi. Kwosi antu akweti amabwambu adi neyi itukweti nimudimu wawuwahi neyi wutukwetiku. Toñojokenu hachumichi: Twazataña nawantu adi nayilwilu yayiwahi nawa adizoza. Eluka yuma yayivulu ilaña adizoza, nawa hiyadimonaña kulema kubadika akwawuku. Atumonaña nawu tudi akwakukalakala hamu nawu nawa amabwambu jawu. Atukeña nankashi chakwila afwilaña nikuhana wumi wawu kukoola etu.

15. Twatiyaña ñahi namudimu wutwazataña?

¹⁵ Tukweti mudimu wawuwahi chikupu. Twadizishaña antu chalala hadi Yehova nawa twasololaña makudi aSatana. (Yow. 8:44) Satana wasendeshaña antu yiteli yalema yikukañanyawu kusenda. Chakutalilahu, wakeñaña nindi etu tukuhweleli netu Yehova wukutwanakena wanyi nshidi yetu nawa nindi watukeña wanyi. Awa himakudi chikupu azeyeshaña antu. Neyi ‘tuya kudi’ Kristu, nshidi yetu ayanakenaña. Nawa walala wudi wakwila nawu Yehova watukeña nankashi wejima wetu. (Rom. 8:32, 38, 39) Neyi tukwasha antu kulonda amushindameneña Yehova nikumona chinakuhimpawu yihandilu yawu chatuzañaleshaña hama.

TWALEKENUHU KUHIZUMUKA MUMPAANDA YAYESU

16. Chiteli chatwinkayi Yesu nindi tusendi chinambukiku ñahi nayiteli yikwawu?

¹⁶ Chiteli chatwinkayi Yesu nindi tusendi chambuka chikupu nayiteli yikwawu yitwasendaña. Chakutalilahu, neyi antu anafumi kumudimu wakumujimba, amavulu azeyaña nawa ekalaña namuzañalu wanyi. Ilaña, etu neyi tufuma nakumukalakela Yehova niKristu, twekalaña namuzañalu. Twazeyaña neyi tunafumi nakuzata hela chochu, twadinkañaku kulonda tuyi nakupompa namelela. Ilaña kakavulu neyi tunafumi nakupompa twekalaña nañovu nawa twahizumukaña. Dichuma chamwekanaña neyi tunayi nakushimwina nikudiza Bayibolu nkawetu. Neyi tuzata nañovu kwila yumiyi, twahizumukaña nawa twekalaña nañovu chikupu.

17. Chumanyi chitwatela kwiluka, nawa twatela kusoñama nachumanyi?

¹⁷ Twatela kwiluka netu wonsu wetu hamuntu-hamuntu tukweti ñovu yashikilamu. Dichi twatela kwikala asoñama nayuma yitwafwilaña kwila. Chakutalilahu, tunateli kukisila ñovu yetu kukufwila maheta. Talenu Yesu chamwakwiliyi ona mukwenzi wadiña namaheta chamwihwiliyi nindi: “Chumanyi chinatela kwila kulonda nakekali nawumi wahaya nyaaka?” Iwu mukwenzi wadiña nakwovwahila Nshimbi. Watela wadiña nayilwilu yayiwahi muloña mukanda waMaku waNsañu Yayiwahi walumbulula nawu Yesu ‘wamukeñeli.’ Yesu wamulejeli iwu iyala nindi: “Yaku wakalandishi yuma yiwukweti, kuhiñahu dinu winzi wiikali mukwakunlondela.” Iwu iyala waneñeli, dichi wakañenyi kushiya mahetindi nakumulondela Yesu muloña wadiña “namaheta amavulu.” (Maku 10:17-22) Chafuminimu, wakaanini mpaanda yamwinkeliwu kudi Yesu nawa watwalekelihu kukalakela ‘Maheta.’ (Mat. 6:24) Chumanyi chimwadi kwila neyi mwadiña enu?

18. Chumanyi chitwatela kwila mpinji yikwawu, nawa muloñadi?

¹⁸ Chachiwahi kutoñojoka mpinji yejima hayuma yitwatwamijañaku muchihandilu chetu. Muloñadi? Kulonda tuzatisheña ñovu yetu chiwahi. Talenu chahosheliyi Mark, wahosheli nindi: ‘Hadi yaaka yayivulu, natoñojokeleña nami napeleshaku chihandilu chami. Nazatileña wupayiniya, ilaña natoñojokeleña mpinji yejima hamali nikuwahishaku chihandilu chami. Nadihwileña chuma chaletesheli chihandilu chami chikoli. Nkumininaku nelukili nami nashileña nankashi maana kukufwila yuma yakumujimba chatela nizatishi mpinji niñovu yami kumudimu waYehova.” Mark walekeli kutoñojoka chatoñojokeleñayi nawa wahimpili chihandilu chindi nakutachika kumukalakela Yehova. Wahosheli nindi: “Mpinji yikwawu natoñojokaña hamali ilaña Yehova niYesu anankwashi.”

19. Kumona yuma munjila yayiwahi kwalemenadi?

¹⁹ Tukutwalekahu kuhizumuka mumpaanda yaYesu neyi twila iyi yuma yisatu. Chatachi, monenuña yuma munjila yayiwahi. Chineli tunakuzata mudimu waYehova, twatela kuwizata kwesekeja nankeñelu Yindi. Etu tudi akwakukalakala nawa Yehova diyi Mwanta. (Luka 17:10) Neyi tukuzataña kwesekeja nachitunakukeña etu aweni, yuma yikutukalilaña. Dichekala niñombi wunakasiliwu mumpaanda hamu namukwawu, neyi yatachika kukaana munakumulombolayi nkaka yindi nawa yatachika kulwisha wadikatishaña. Munjila yoyimu, neyi tuzata mudimu waYehova kwesekeja nachakeñañayi, tukuzataña yuma yamaneni nawa tukushinda kukala kwasweja. Anukenu nenu kwosi wunateli kukañesha nkeñelu yindi kuzatikaku!—Rom. 8:31;1 Yow. 4:4.

20. Twatela kuya mumpaanda yaYesu nankeñelwinyi?

²⁰ Chamuchiyedi, Ilenu yuma nankeñelu yayiwahi. Chuma chitwafwilaña hikumulemesha Tata yetu wukweti kukeña Yehova. Antu adiñaku mumafuku aYesu alekeli mpaanda yaYesu muloña adiña nalwisu nawa akeñeleña yuma yakudizañalesha. (Yow. 6:25-27, 51, 60, 66; Fwi. 3:18, 19) Kwambukaku, ana amukeñeli Nzambi chakufuma hamuchima nawa akeñeli akwawu antu atwalekelihu kusenda mpaanda muchihandilu chawu sampu nichafwiliwu, nakuchiñeja kwakuyuula hamu naKristu mwiwulu. Tukatwalekahu kwikala namuzañalu neyi tutwalekahu kusenda mpaanda yaYesu namuchima wumu neyi chadiñawu.

21. Kwesekeja na Matewu 6:31-33, tunateli kukuhwelela netu Yehova wukutwililadi?

²¹ Chamuchisatu, twalekenuhu kukuhwelela. Twadihana nawa twazataña nañovu. Yesu watusoñamishili nindi akatukabishaña. Ilaña twatela kukuhwelela netu Yehova wukutwinka ñovu yakuumika kukala kwejima. Neyi tutwalekahu kuumika, tukwikala nañovu. (Yak. 1:2-4) Twatela kukuhwelela cheñi netu Yehova wukutwinka yuma yitwakeñaña, Yesu wukutulombolaña, nawa netu amanakwetu niahela akutukoleshaña. (Tañenu Matewu 6:31-33; Yow. 10:14; 1 Tes. 5:11) Yumanyi yikwawu yitukukeña?

22. Tunateli kuzañalala nayumanyi?

²² Ona mumbanda okiliwu kudi Yesu wahizumukili hadodina ifuku. Ilaña wadi kutwalekahu kuhizumuka neyi watwalekelihu kukwikala kambanji kaKristu. Munakutoñojoka nenu welilidi? Neyi watondelihu kwikala mumpaanda yaYesu, wadi kukalakela hamu naYesu mwiwulu. Yuma yejima yashiliyi hakwila nawu yamulondeli Kristu yikwesekana wanyi nankisu yadi kutambwilayi. Hela chakwila tukweti kuchiñeja kwakushakama mwiwulu hela hamaseki, twatela kuzañalala muloña twetejeli mutambi waYesu wakwila nawu: “Twayenu kudi ami!”