Ikalenu naYililu yakuSpiritu, Kulonda Mwikali naNkisu Yayivulu
1. Muloñadi chichalemena kushinshika hanzatilu yenu yakuspiritu?
1 Hampinji yimwekalili mwiniKristu, hadaha mwazatili nañovu hakwila mwikali nanzatilu yenu yayiwahi yakuspiritu yampinji yejima yabombelelimu kudiza Bayibolu, kupompa kwawiniKristu, mudimu wamwiha, nikulomba. Chuma chafuminimu nkisu jaYehova hakuzata kwenu nañovu, mwakulili lwakuspiritu. Chayinu mpinji, hadaha munahiti dehi yaaka yayivulu kufuma hayipapatishiluwu. Komana munakutwalekahu nayililu yenu yakuspiritu neyi hampinji yimwekalileña eniKristu?
2. Indi kutaña Bayibolu mpinji yejima kwatuheteshaña ñahi?
2 Shinshikenu haNzatilu Yenu: Komana mwekala nachaaku chakutaña chikunku Chezu daNzambi hefuku hefuku? Oyu nkisu kuvula yitwawanaña neyi tukutañaña izu daNzambi! (Yosh. 1:8; Mas. 1:2, 3) MuIsarela wakushankulu, mwanta wejima wateleli kutañaña mumukanda windi waNshimbi ‘mafuku ejima akuhanda kwindi.’ Nkiswinyi yafumineñamu? Mwanta wekalileña namuchima wakwovwahila nikumutiya Yehova woma kulonda kubula kuheñuka mwaya nshimbi Jindi. (Kuhit. 17:18-20) Anetu nawa makonu, kutañaña Bayibolu mpinji yejima kwatukwashañaku kwikala aloña nawa akadi muloña mudinu ituña datama. Cheñi kwatukwashañaku kwikala adiloñesha kukalakala mudimu wakushimwina.—Fwi. 2:15; 2 Tim. 3:17.
3. Nkiswinyi yitwatambwilaña mukuwanikaña kukupompa mpinji yejima?
3 Yesu wadiña nachaaku chakuyaña mushikola mwadiña nakuhanjekawu hajiNsona. (Luka 4:16) Chakubula nikujinoka chumichi chamukolesheli kumika yihuñu yadiña hambidi yindi. Ninetu nawa twakoleshewaña nakufumba kwakuspiritu kwatulejañawu hakupompa kwachipompelu ‘nikudikolesha wumu namukwawu’ kwakuwahi. (Rom. 1:12) Kupompa hamu nawamana kwetu kwatukwashañaku kumika kukala kwamunanu mafuku akukuminina. (Heb. 10:24, 25) Komana muchidi nachaaku chakuwanikaña kukupompa kwejima?
4. Indi kukalakala mumudimu wamwiha mulungu wudi wejima kwatukwashaña ñahi?
4 Nsañu yamuBayibolu yatulejaña nawu apostolu adiñi nakushimwina nsañu yayiwahi ‘hefuku hefuku mutembeli, kwitala nikwitala.’ (Yil. 5:42) Hela chakwila hitukutwesha kushimwina hefuku hefukuku, komana kwila twikala nachaaku chakushimwinaña mujinjila jikwawu jamudimu mulungu nimulunguku? Neyi twila mwenimu, twakekala ashikahu chikupu hakuzatisha Izu daNzambi, nawa twakekala nayakuhumañana yakukolesha hakulejaku amakwawu chalala chamuBayibolu.
5. Muloñadi chichalemena kulomba kudi Yehova mpinji yejima?
5 Kaprofwetu Danyeli amukiswilili hama hamuloña wakumukalakela Yehova “mafuku ejima” mukuhanda kwindi kwejima. Ichi chabombelelimu chaaku chakulombaña mpinji yejima kudi Yehova. (Dan. 6:10, 16, 20) Ninetu nawa, chitwenza kudi Yehova mukulomba kwakufuma kumuchima, wukutwinka spiritu yindi yajila. (Luka 11:9-13) Kubombelahu, Yehova wuketeja kuhitila mukukundama kwakwihi nanetu, natwiteji kudiluñisha wubwambu waweni nayena. (Mas. 25:14; Yak. 4:8) Yenoyu nkisu kutoha! Komana tuzatenu nañovu kulonda tutwalekihu nayililu yayiwahi yakuspiritu nakutambwila nkisu jajivulu kufuma kudi Yehova.