Atwinka Iheta
1 Kapostolu Pawulu walemesheli chikupu mudimu windi wakushimwina wamwinkeluwu kudi Nzambi nakuwutena nindi ‘iheta.’ (2 Kor. 4:7) Womikili makabi nikuyandishewa hakuzata iwu mudimu. Washimwinini chakubula kuzeya kudi muntu wejima wawanineñayi. Wendeli jinjila jajivulu jakala nawa jawubanji hamaseki nimukaluñalwiji. Tunateli kumwimbujola ñahi Pawulu nikumwekesha nawu mudimu wetu twawulemesha? (Rom. 11:13) Chumanyi chaleteshaña mudimu wetu kwikala iheta dabadika?
2 Iheta Dabadika Kulema: Maheta aheseki kakavulu aletaña chineñi nawa akumininamu hela netu akapinji kantesha hohu. Ilaña, mudimu wetu waletaña kukooleka kwahaya nyaka kudetu nikudi amakwawu. (1 Tim. 4:16) Wakwashaña antu ashinshika kumwiluka Yehova, nikuhimpa yuma yakeñekaña muchihandilu chawu, nakwikala nachikuhwelelu chalala chawumi wahaya nyaka. (Rom. 10:13-15) Kuhitila mukumona mudimu wetu neyi hichuma chalema wuseya, tukwikala nawumi wamuzañalu wukweti nkeñelu, nimaana amawahi, nichikuhwelelu chakumbidi chakutiyisha kuwaha.—1 Kor. 15:58.
3 Mwekeshenu Nenu Mwalemesha Iheta Denu: Kulema kwachuma chitwasweja kukeña kakavulu kwamwekenaña kuhitila mukudibonda muyuma yikwawu hakwila tuchiheti. Okukooleka kwakuzatisha mpinji yetu niñovu hakumuhameka Yehova! (Efwes. 5:16, 17) Njila yitwazatishilañamu mpinji yetu yatela kumwekeshaña nawu twalemesha chikupu yuma yakuspiritu kubadika yakumujimba. Chineli tukweti mudimu walema wutwatela kuzata, twatela kushimwina namukoyu nikwikala asoñama kulonda kushimwina nsañu yayiwahi mpinji yejima.
4 Maheta alema wuseya kakavulu hiyayiswekañaku ilaña ayimwekeshaña kulonda amakwawu amoneñaku. Neyi tumona mudimu wetu neyi iheta, wukwikala chuma chalema muchihandilu chetu. (Mat. 5:14-16) Hakwikala nanyichima yakusweja kuhameka lekenu mpinji yejima twimbujoleña kapostolu Pawulu nakuwanaku mpinji yakumwekesha netu mudimu wetu wakushimwina twawulemesha chikupu neyi iheta.