Imbujolenu Kristu muMudimu Wenu Wakushimwina
1 Yesu watushila chakutalilahu chakulondela mumudimu wetu wakushimwina. Kukeña kwindi kwakweni kwakeñeliyi Nzambi niantu wakwimwekesheli mapampa kakavulu nawa munjila jajivulu. Watañishili antu adizoza chalala nawa wakoñeli nyidimu yakumwekesha kukeña kwalala kulonda kukwasha antu adiña nakukabishawu nikuyimwesha ihuñu.—Mat. 9:35.
2 Chakutalilahu chaYesu niNtañishilu: Yesu haheñukili kuhitila mukudibomba munsañu jamatuña nachiyulu hela kuzata nyidimu yakukwasha antu kulonda kuwahisha nshakaminu yawantuku. Cheñi nawa hafwililuhu yuma yidi yejima yamwekeneña kuwaha kumukañesha hela kuluwañesha mudimu windi wasweja kulemaku. (Luka 8:1) Washindameneni hakushimwina nsañu yayiwahi yaWanta waNzambi neyi diwu hohu wukamanisha chikupu makabi amuchidi wamuntu. Yesu wadiña namudimu walema nankashi ilaña mpinji yakuzata iwu mudimu yadiña yantesha. Chelili antu amuKaperinawu amukeñi Yesu nawu yashakami kuna, walejeli atumbanji twindi nindi: ‘Tuyenu kwacheñi . . . nishimwini nikwenoku nawa; muloña dichi chinenjilili.’—Maku 1:38.
3 Hanyima yakudizisha atumbanji twindi, Yesu wayitemesheli nakuyileja iyi nshimbi yatelela nindi: ‘Kashimwinenu nenu, Wanta wamwiwulu wudi kwakwihi.’ (Mat. 10:7) Wayilejeli atumbanji twindi nindi atela kulemesha yuma yaWanta muchihandilu chawu. (Mat. 6:33) Mazu aYesu akukumishaku ahosheliyi nawatumbanji twindi henohu kanda yakandami mwiwulu amwekesheli chikupu mudimu wadiña hambidi yawu. Wahosheli nindi: “Yenu mwakelishi atumbanji munyuza yejima.”—Mat. 28:19.
4 Kulema kwaWanta: Mutu wampanji yahosheleñayi Yesu wadiña waWanta waNzambi, nawa wakonkomweneni atumbanji twindi kulondela chakutalilahu chindi. Nyidimu yawantu hiyikutwesha kumanisha kukala kwamuchidi wamuntuku. (Yere. 10:23) Chiña Wanta waNzambi hohu diwu wukajilika ijina daNzambi nikuleta kuwunda kwahaya nyaka kudi muchidi wamuntu. (Mat. 6:9, 10) Kutañisha chalala chaWanta kudi antu ‘anakushikoka nakudila nayishimashima yejima yinakukoñawu’ kukuyikwasha kwikala namuzañalu, nawumi wawuwahi chakatataka nikushindamena chikupu hachikuhwelelu chalala chakumbidi.—Ezek. 9:4.
5 Yesu nakutwalekahu kukalakala mudimu wakushimwina nsañu yayiwahi yaWanta waNzambi, nawa natukani nindi wukutukwashaña. (Mat. 28:20) Mudimu wetu wakushimwina wesekanaña ñahi nachakutalilahu chatushililiyi Yesu? (1 Pet. 2:21) Munanu mafuku akukuminina akala, tuzatenu yuma yejima nañovu jetu jejima nakukakela chikupu kuchakutalilahu chatushililiyi Yesu mumudimu wakushimwina!