“Ilenuña Mwenimu Muñanakanaña Nachu”
Kwanakana Kufwa kwaYesu kwaKekalaku haApril 2
1. Muloñadi ifuku daApril 2, 2007 chidinekalili dalema?
1 HaApril 2, 2007, yihita yawantu mwahita kaayi kejima yakapompa nakwanakana mulambu wakufwa kwaYesu. Yesu wafwili muloña wadiña nakwimenaku wanta waTata yindi wamwiwulu, nakuhana wunsahu kutalisha hamakudi ahosheliyi Satana Diyabolu akwila nindi antu amukalakelaña Nzambi muloña wayuma yayinkayi. (Yoba 2:1-5) Kudya kwaMwanta kwaMelela kwatwanukishaña cheñi nawu kuhitila mukufwa neyi muntu wawanina, wakadi nshindi, Yesu ‘wahanini wumi windi neyi ifutu danyiloña kulonda kukuula nachu antu amavulu.’ (Mat. 20:28) Dihafumini Yesu kuleja atumbanji twindi nindi: “Ilenuña mwenimu muñanakanaña nachu.” (Luka 22:19) Komana kuhameka ichi chawaana chaNzambi chalema kunayileñeshi enu kutachika kudiloñesha kulonda mwakanakani iku kukeña kwasweja kuwaha?—Yowanu 3:16.
2. Tunateli kushaku ñahi muchima kuChanukishu?
2 Shenuku Muchima: Kuhitila mukushinshika yuma yejima yamwekeni mumafuku akukumishaku akuhanda kwaYesu hamaseki, tunateli kushaku muchima wakwanakana ichi Chanukishu. (Ezera 7:10) Hakwila chitukwashuku kwila mwenimu, ndandanda yakutaña kwaBayibolu kwadimena yatela kuwanika mumukanda waUkubebeta Amalembo—2007 niKalenda ya 2007. Iyi ndandanda yinatanjikuwu yakutaña Bayibolu yinesakani namafuku mwamwekeneneña yuma kutalisha kukufwa kwaYesu kwesekeja nakalenda yitwazatishaña makonu. Mafuku nimpinji yatenawu munsañu yamuBayibolu ashindamena hakalenda yawaYudeya, kwesekeja nachiyachindileña mafuku kufuma kukuhuma kwetañwa nakushika kukuhuma kwetañwa dikwawu. Iyi njila yakuchindilamu mafuku ayizatishaña nawa ayisonekaña handandanda yaChanukishu yakutaña Bayibolu. Kuhituluka muniku kutaña kwaBayibolu nikulomba nakutoñojoka hakukeña kwaNzambi kwasweja kukatukwasha kuhetelamu chikupu mukwanakana Chanukishu.
3. Tunateli kukwasha ñahi akwakukeña kwakuwahi niazeya kuhetelamu muChanukishu?
3 Lejenu Amakwawu Akawanikiku: Chamukachi chaMudimu Wetu waWanta waFebruary chahosheli hakampeni yadimena yakutambika antu kunichi chidika chalema. Komana munadiloñeshi kulonda kuzataku chikupu munaka kampeni? Komana munasoneki dehi majina awantu yimwakatambika, nawa munatachiki dehi kutiyañana nawu? Loñeshenu kulonda mwakanyakali kushika namelela haChanukishu mwakatambwila antu yimwatambikili niakwakukeña kwakuwahi. Munateli kushakama nawu hamu, nakumona kwila nenu adi naBayibolu nikamina. Yilumbululenu kudi amakwawu amuchipompelu. Hanyima yakupompa fwilenu kwakula malwihu akwetuwu. Yilejenu cheñi akawaniki kumpanji yadimena yawantu amavulu yakahanawu haApril 15. Sweje-e aeluda akakeña kwiluka chikupu nawu ana adiña nakwinza kukupompa kwachipompelu ilaña anazeyi niwena akutambula chipapilu chakutambika nachu antu kuChanukishu nikumpanji yadimena.
4. Tunateli kukwasha ñahi antu kutwalekahu kukulilaku lwakuspritu hanyima yakwanakana Chanukishu?
4 Kwashenu aKwakukeña Kwakuwahi Amaha niAzeya Kukulilaku: Nhoshi wampanji yaChanukishu wakalumbulula nindi twadizishaña antu Bayibolu chawaana hamatala nikukolesha akwakukeña kwakuwahi amaha kutwalekahu kudiza hadi Yehova. Munateli kuzatisha mazu anhoshi kulonda kukwasha nachu antu yimwatambikili kudiza yuma yayivulu hadi Yehova. Neyi chakatataka hiyanakudiza Bayiboluku, mwatela kuyendela mukunyakala hanyima yaChanukishu nakuyileja ntanjikilu yawaana yakudiza kwaBayibolu kwahetala. Hakwila akuliluku lwakuspiritu, anakukeña cheñi kuwanika kukupompa kwachipompelu. (Heb. 10:24, 25) Hakwila mukoñi mwenimu, yikoleshenu atachiki kupompa mpinji yejima. Aeluda atela kuloñesha kulonda kwendela eniKristu azeya enjili kuChanukishu nakuyikwasha kutoñojoka chikupu hansañu yadiña mumpanji. Ichi chikuyikwasha kutachika cheñi nyidimu yawu yamuchipompelu.
5. Indi kwanakana Chanukishu kwatela kutuhetesha ñahi?
5 Chidika chakwanakana Chanukishu chatwinkaña kukooleka kwakutoñojoka chikupu hayuma yatukoñelawu kudi Yehova niYesu. Kutoñojoka kwamuchidiwu kwatuleñelaña kumukeña Yehova niYesu chikupu nawa kwahimpaña yililu yetu. (2 Kor. 5:14, 15; 1 Yow. 4:11) Ayinu diyi mpinji yakutachika kudiloñesha etu aweni niakwakukeña kwakuwahi kulonda twakawaniki kuchidika chalema hampinji ‘yitwatiyakeshaña kufwa kwaMwanta.’—1 Kor. 11:26.