Enu Atwansi—Munjilanyi muMukuzatishila Wumi Wenu?
1 Kansi wamumbanda wumu wahosheli nindi: “Inakukeña yuma yayiwahi nankashi muwumi wami.” Chakubula kujinoka ninenu munakukeña yuma yoyimu. Hanu dinu munateli kuwana ñahi yuma “yayiwahi” muwumi wenu? Hadaha mwatiyaña chiyahoshaña hayikunzulemba, amabwambu jenu, hela antañishi, nawu yuma yayiwahi yafumaña mukuheta mali amavulu nikuzata mudimu walema—kwikala namaheta amavulu.
2 Hela chochu, Bayibolu yababeshaña atwansi nawu, kufwila maheta “hikukabila tuhu mpepela.” (Mukwa. 4:4) Muloña atwansi amakwawu anakuheta nikutiyakana mpuhu. Atwansi anakuheta nikutiyakana mpuhu kakavulu chayineñeshaña chikupu. Kansi wakuBritain watañili shikola yakwikala namudimu walema wahosheli nindi: “kwikala namaheta kudi neyi chikasha chakadi yuma. Neyi wushinshika yuma yafumañamu, kwosi chafumañamu.” Eña, mpinji yikwawu mudimu waletaña maheta nikutiyakana. Ilaña hiwatela kuyihetesha ‘lwakuspirituku.’ (Mat. 5:3) Cheñi nawa, 1 Yowanu 2:17 yatufumbaña nawu “mpata yamunu mwishina yikuhita.” Hela neyi wukwikala namaheta mukanu kaayi, akampinji kantesha hohu.
3 Kushikahu Kwikala Chinsahu chaYehova: Chatachi, mwatela kwikala nampwila yakukeña kumukalakela Nzambi—nawa iyi mpwila hiyadinjilaña yayenuku, hela chakwila anvwali jenu hiyeniKristu. Mwatela kwikala nawubwambu naYehova. Kansi wamumbanda wahosheli nindi: “Kulomba kukuyikwasha kwikala nawubwambu naYehova.”—Mas. 62:8; Yak. 4:8.
4 Aroma 12:2 yahoshaña hachuma chikwawu chimwatela kwila. Yahoshaña nawu: “Kulonda mushinshiki mwaya muchima waNzambi, diwu wawuwahi, watiyishaña kuwaha, walala chikupu.” Komana mwajinokahu dehi hayuma yikwawu yinayidizishiwu? Tiyililenu kukonkomwena kwaBayibolu, nawa ‘shinshikenu’ nenu yumiyi yalala. Nawa sandujolenu enu aweni. Tañenu Bayibolu ninyikanda yashindamena haBayibolu. Kudiza hadi Nzambi hikwakeñekaña kuzatisha hohu yitoñojoka yetu hakwiluka walalaku. Ikalenu nampinji yakutoñojoka hayuma yimunakutaña kulonda yitentami mumuchima wenu wachifwikija. Ichi chikuswejesha kukeña kwenu kumwamukeña Yehova.—Mas. 1:2, 3.
5 Kulondelahu, esekenu kulejaku akwenu akashikola hakuhanjeka yuma yimunakudiza. Njila yamuchiyedi yidi yakushimwina kwitala nikwitala. Mpinji yikwawu munateli kuwana mukwenu mukashikola hampinji yimunakushimwina, nawa chinateli kuyitiyisha woma hakutachika. Ilaña Bayibolu yatukoleshaña kubula ‘kutiya nsonyi yansañu yayiwahi.’ (Aro. 1:16) Muloña munakutwala nsañu yawumi nikuchiñeja. Muloñadi wumukutiyila nsonyi?
6 Neyi anvwali jenu hiyeniKristu, mwatela mwayahu dehi nawu mumudimu wakushimwina. Komana kudihu yuma yimwatela kwila kubadika kwimana hohu nakutalila anvwali jenu chiyanakuhosha hela kuhana hohu magazini nimatilakiti? Komana mwatela kushimwina hachisu nkawenu, kuzatisha Bayibolu nakuleja mwiniitala? Neyi himukutweshaku, ilenu anvwali jenu hela antu amuchipompelu apama kulonda ayikwashiku. Ikalenu nachikonkwanyi chakushikahu kwikala mukwakushimwina nsañu yayiwahi wapapatishewa.
7 Hampinji yachipapatishu, mwekalaña Chinsahu chaYehova. (Isa. 43:10) Ichi chatela kuyikwashaku chikupu kwiluka chimwatela kuzatisha wumi wenu. Mukudihana mwabombela ‘kudibonda.’ (Mat. 16:24) Munateli kudiwula yikonkwanyi niyuma yimwafwilaña kwila ‘nakusambila kukeña wanta waNzambi.’ (Mat. 6:33) Kudihana nichipapatishu dikwenzununaña kukooleka kwakuvulu kwakwila mwenimu. Tutalenu hakukooleka kukwawu.
8 Kukooleka kwaKumuzatila Nzambi Mpinji Yejima: Kuzataku wupayiniya nikwena hikukooleka. Mukwakushimwina payiniya himwiniKristu wapapatishewa wukweti chakutalilahu chachiwahi wunafuukuluhu kuzata maora 70 hakakweji mukushimwina nsañu yayiwahi. Kuzataña mpinji yeneni mumudimu wamwiha kukuyikwasha kwiluka chakushimwina nikutañisha. Apayiniya amavulu adi namuzañalu wakukwasha atudizi awu aBayibolu kwikala aYinsahu apapatishewa. Mudimwinyi wakwituña watela kuzañalesha chikupu nikutiyisha kuwaha?
9 Shikola yaKudiza Mudimu waWunkoñi ayitachikili kulonda kudizisha aeluda niankoñi akuzatila ajiki ashikahu. Iku kudiza kweneni kwanyilungu 8 kwashindamenaña hanyidimu yawaeluda niankoñi akuzatila, nsañu yamukuloñesha, nichakuhosha kudi antu amavulu. Amakwawu ayitemeshaña kuya nakuzatila kumatuña awu. Amakwawu niwena ayilejaña kuya nakuzatila kumatuña acheñi.
10 Mudimu wahaBeteli wabombelamu kuzata neyi mukwakudihana hamutayi wawaYinsahu jaYehova. Amuchisaka chaBeteli amakwawu azataña mudimu wakusoneka nyikanda yashindamena haBayibolu. Amakwawu azataña nyidimu yakwashaña kusoneka nyikanda yashindamena haBayibolu, yidi neyi kuwahisha matala niyuma yakuzatisha hela kwakamena yuma yakumujimba yawakwachisaka chaBeteli. Nyidimu yejima hikukooleka kwanyidimu yajila yaYehova. Cheñi nawa, akaBeteli ekala namuzañalu wakwiluka nawu nyidimu yejima yakoñañawu, yakwashaña ana kwawu amavulu mukaayi kejima.
11 Mukalakelenu Yehova naMuchima Wejima: Kumukalakela Yehova diyi njila yayiwahi nankashi yakuzatishilamu wumi wenu. Komana kwila mutoñojoka hakwimika chikonkwanyi chakumuzatila Nzambi mpinji yejima nehi? Hanjekenu hamudimu wampinji yejima nawanvwali jenu, nawaeluda ahachipompelu chenu, ninkoñi wañinza yenu. Neyi munakukeña kuya kuBeteli, hela kuShikola yaKudiza Mudimu waWunkoñi, wanikenu kukubulakana kwekalañaku hakupompa kwañinza nikwankambi kwawantu ashikahu anakwihula.
12 Eña, bayi neyi ejima atela kushikahu hela kutwesha kuzata mudimu wampinji yejimaku. Mpinji yikwawu yikatu, kubula mali, ninyidimu yamuchisaka yakañeshaña muntu kuzata nañovu. Hela chochu, eniKristu ejima adihana atela kutiyilila lushimbi lwamuBayibolu lwakwila nawu: “Keñaku Yehova Nzambi yeyi namuchima weyi wejima, nawumi weyi wejima, namaaneyi ejima.” (Mat. 22:37) Yehova wakeñaña nindi mumuzatili kushika hakumina ñovu yenu. Kwesekeja nachidi chihandilu chenu, wumi wenu watela kushindamena hakumukalakela Yehova. Imikenu yikonkwanyi yalala yakumukalakela Nzambi. Eña, ‘anukenu Nleñi yenu mumafuku awukwenzi wenu’—nawa akayikiswila haya nyaka neyi mwila mwenimu.