Chiyatwikwashaña Ntanjikilu yaKudiza kwaMukanda haChipompelu
1. Indi kupompa kwetu kutanu kwamulungu nimulungu kwatukwashaña ñahi?
1 Kupompa kwetu kutanu kwamumulungu nimulungu kukweti nkeñelu yashiyashana ninjila yakwilombwelañamu. Ilaña kupompa kwejima kwalema muloña kwatukwashaña ‘kuditoñojoka muntu himuntu, nikusañumuna kukeñañana nakwila nyidimu yayiwahi.’ (Heb. 10:24, 25) Yumanyi yikwawu yambukaku nawa yalema yekala muntanjikilu yaKudiza kwaMukanda haChipompelu?
2. Yumanyi yayiwahi yafumaña mukupompa nakadizanvu kanyanya hakudiza kwamukanda?
2 Yatukwashaña Kukulilaku lwakuSpiritu: Antu awanikaña kukupompa kwakudiza mukanda antesha nankashi kubadika awanikaña kukupompa kukwawu kwachipompelu. Ichi chatukwashañaku kwikala nawamabwambu anateli kutukwashaku lwakuspiritu. (Yish. 18:24) Komana munakweseka kwiluka antu ejima ekala hezanvu denu dakudiza kwamukanda, hekwawu kuhosha nawumu kulonda kuzata nindi mumudimu wakushimwina? Cheñi nawa ntanjikilu yakudiza kwamukanda yakwashañaku nkoñi wakudiza kwamukanda kwiluka chidi nshakaminu yamuntu wejima wahezanvu dindi nikumukolesha.—Yish. 27:23.
3. Indi ntanjikilu yakudiza kwamukanda yakwashaña ñahi antu kuhoshahu cheñi nikukwasha atudizi aBayibolu kuwanikaku?
3 Komana mwahosha dehi nakadizi wenu waBayibolu kuwanika kukudiza kwamukanda hamu nanenu? Akwakukeña kwakuwahi ajinookaña kwinza kukupompa kwetu kwamaneni hiyakutiya woma wakuwanika kukupompa kwanyanyaku, sweje-e kupompa kwamwitala. Wulunda wekalañahu wakwashañaku atwansi niamaha awanikaña kukupompa kuhoshahu. Cheneli izanvu dekalaña danyanya, twekalaña nakukooleka kwakuhoshahu kakavulu, muniyi njila twamuhamekaña Yehova.—Mas. 111:1.
4. Indi ntanjikilu yakudiza kwamukanda yawahila mujinjilanyi?
4 Kakavulu kudiza kwamukanda kwekalaña heluña didi kwakwihi nakwashakamaña akwakushimwina. Chineli iluña dakudiza kwamukanda hidinateli kwikala kwakwihi nakwashakamaña antu ejimaku, kuwanika kwiluña datulejawu kuya nakudizila mukanda kukuletesha kwenda yintampu yantesha kubadika yitwendaña hakuya kukupompa kukwawu kwachipompelu. Heluña ditwadizilaña mukanda tunateli kubulakenahu cheñi hakuya mumudimu wakushimwina.
5. Tunateli kutambwila ñahi wukwashu mumudimu wakushimwina kudi nkoñi wetu wakudiza kwamukanda?
5 Yatukwashañaku muMudimu waKushimwina: Nkoñi wakudiza kwamukanda washaña muchima wakukwasha muntu wejima kuzata chiwahi nikwikala namuzañalu wakushimwina mpinji yejima. Dichi, wafwilaña kuzata namuntu wejima wahezanvu, nikuhana wukwashu mumbadi yamboka-mboka yamudimu wakushimwina. Neyi mumona kukala mumbadi yimu yamudimu wakushimwina, chidi neyi kufuntila, mulejenu nkoñi wakudiza kwamukanda. Hadaha wukuleja mukwakushimwina wamwizanvu denu wakuluka yitembi kulonda muzati nindi. Neyi mushinshika ntañishilu yayiwahi yankoñi wakudiza kwamukanda hampinji yinakulombolayi kudiza kwamukanda chikuyikwashaku kulombola chiwahi hakudiza kwaBayibolu.—1 Kor. 4:17.
6. Muloñadi wutukukeñela kuhetelamu chikupu muntanjikilu yakudiza kwamukanda?
6 Ntanjikilu yaKudiza kwaMukanda haChipompelu yayiwahi nankashi. Iyi ntanjikilu yayiwahi yatwinkayi Yehova yatukwashañaku kwimana akola chikupu lwakuspiritu muyinu mpinji yakala yitunakushakamamu.—Mas. 26:12.