Bayi Mujinooka Kulombola Kudiza kwaBayiboluku!
1. Munjilanyi ‘mutwayililaña antu mwamuwahi’?
1 Kuhitila mukuzata nañovu mumudimu wakushimwina nsañu yayiwahi yaWanta waNzambi, dikwila nawu antu amwiluña detu dakushimwina ‘hitwalekaña kuyilila mwamuwahiku.’ (Yish. 3:27) Mpinji yayiwahi yakumbidi yamuchiyulu chaNzambi diyi nsañu yayiwahi yakushimwina muchidi wamuntu. Hela chikwila mwalejaña chikupu antu kuchiñeja kwaWanta kuhitila mukushimwina kwamumpanji hela kuhana nyikanda, imikenu chikokwanyi chakulombola kudiza kwaBayibolu, neyi himunakwila mwenimuku.
2. Chumanyi chinateli kutukañesha kutachika kudiza kwaBayibolu?
2 Mpinji yikwawu, kukala kweneni kwakañeshaña kulombola kudiza kwaBayibolu kwashindamena hachitwatoñojokaña hakulombola kudiza kwaBayibolu. Amakwawu ajinookaña kulombola kudiza kwaBayibolu muloña atoñojokaña nawu hiyakutweshaku hela muloña wanyidimu yayivulu. Iji jinjila jinalondeluhu jinateli kuyikwasha kubula kujinooka kuzataku mudimu wakulombola kudiza kwaBayibolu.—Mat. 28:19; Yil. 20:20.
3. Muloñadi wutwekalila ashikahu kutañisha Bayibolu?
3 Kutoñojoka Nenu Himukutweshaku: Hadaha himwataña chikupu shikolaku hela munjila yikwawu munakutoñojoka nenu himukweti wuswa wakutwesha kulombola kudiza kwaBayiboluku. Ankalakali awiniKristu ashikahu amuyaaka nkulakaji yatachi adiña “akadi kwiluka nyikanda, hela kwiñila mumashikola amaana.” Chumanyi chayikwashili kudizisha amakwawu chalala? Muloña ‘adiñileña naYesu.’ (Yil. 4:13) Adizilili kudi Ntañishi Muneni, Yesu, ntañishilu yindi nijinjila jakutañishilamu ajisoneka muNyikanda kulonda tudiziluku. Hela chikwila himwataña nankashi shikola yakumujimbaku, munakudizishewa hadi Nzambi ninkeñelu yindi kudiza kwabadika shikola yidi yejima.—Isa. 50:4; 2 Kor. 3:5.
4. Chumanyi chitukudizila kuchakutalilahu chaAmosa?
4 Mpinji yikwawu Yehova wazatishili atuprofwetu kulonda kuhoshola anyanta aluwañesheleña hela amakwawu adiña hayifulu yahewulu. Chidi neyi Amosa, wadiña nachifulu chaheshina nawa wadizoza chikupu. Amosa wahosheli nindi: “Ami hinikaprofwetuku, hela mwana kakaprofwetuku; nikabiña kwami, nimukwakukunkula nyishikimi.” (Amosa 7:14) Hela chochu, Amosa halekeli kushimuna nsañu yawunsompeshi waYehova kudi kapristu Amaziya wadiña nakudifukula kudi mwaana kañombuku. (Amosa 7:16, 17) Mpinji yejima twatela kwiluka netu tunakukalakala mudimu waNzambi nawa wukutwileñela kushikahu kuzata mudimu watwinkayi kwila.—2 Tim. 3:17.
5. Muloñadi wutwatela kufwila kutachika kudiza kwaBayibolu hela chakwila tudi nanyidimu yayivulu?
5 Nyidimu Yayivulu: Hela chikwila mukweti nyidimu yayivulu, hadaha mwambulaku dehi mpinji yakuzataku mumudimu wakushimwina mafuku ejima. Kulombola kudiza kwaBayibolu kwekala hinjila yimu yaletaña muzañalu chikupu mumudimu wakushimwina. Hikukoleka kweneni chikupu hakumona Izu daYehova chidahimpaña chihandilu chamuntu. (Heb. 4:12) Yehova watiyaña kuwaha neyi tudihana kulonda kukwasha muntu ‘yeluki nsañu yalala chikupu.’ (1 Tim. 2:4) Añelu niwena azañalalaña neyi muntu yabalumuka mumuchima nakuleka yililu yakoñeleñayi nikukulilaku lwakuspiritu.—Luka 15:10.
6. Mudimwinyi walema wutukweti hakwila nkeñelu yaNzambi?
6 Nzambi “wakeña antu ejima nindi ahandi, eluki nsañu yalala chikupu.” (1 Tim. 2:4) Tukweti mudimu walema chikupu wakuzata kwesekeja nankeñelu yaNzambi, bayi tujinookaña kunlombola kudiza kwaBayiboluku!