Imikenu Chikonkwanyi chaKulombola Kudiza kwaBayibolu
1 “Fumbulenu mesu mutali mumaha, chimwatookashana dehi to-o, ashika dehi hakumuna.” (Yow. 4:35) Mazu wenawa ahosheliyi Yesu Kristu anesakani nayuma yinakumonawu akwakukalakala awiniKristu makonu.
2 Antu ashinshika anakukeña kudiza jinjila jaYehova achidi kwoku. Chumichi chinelukewi kuhitila hachipimu chakadi kushikañahu dehi chalombweluwu kudiza kwaBayibolu 240,839 muZambia muchaaka chamudimu cha 2007, nawa atumbanji amaha 9,349 apapatisheweli. Neyi munakukeña chikupu kulombola kudiza kwaBayibolu, chumanyi chimwatela kwila?
3 Imikenu Chikonkwanyi: Chatachi, imikenu chikonkwanyi chakutachika nikulombola kudiza kwaBayibolu kwampinji yejima. Mwatela kuhemba chikonkwanyi chenu muyitoñojoka hampinji yimudi mumudimu wamwiha. Chineli mudimu watwinkawu hamu neyi eniKristu wabombelamu kutañisha nikushimwina, wejima wetu twatela kukeña njila jajivulu mumudimu wakudizisha Bayibolu.—Mat. 24:14; 28:19, 20.
4 Yikuma Yikwawu Yitwatela Kuhemba: Kulomba kwakufuma kumuchima hichuma chakeñekaña nankashi kudi akwakushimwina aWanta. Mpinji yikwawu twawanaña antu alombaña wukwashu wakukeña kwiluka hadi Nzambi. Tukweti kukooleka kwakweni kwakuzatishewa naYehova kulonda kuwana antu amuchidiwu nikuyidizisha.—Hag. 2:7; Yil. 10:1, 2.
5 Muhela wumu walombeli kutalisha hakudiza kwaBayibolu, chamanishiliyi washili hatooka makopi atirakiti yinakwila nawu Komana Munakukeña Kwilukilahu Nsañu Yayivulu yamuBayibolu? kumudimu. Mumbanda wumu wanoneluhu trakiti yimu nakuyitaña nawa watachikili kusoneka kulonda kwihula wukwashu, muhela wahosheli nindi nawa watachikili kulombola kudiza kwaBayibolu.
6 Amana kwetu akwakushimwina elukisha kutachika nikulombola kudiza kwaBayibolu, anateli kuyikwasha kulonda kutwesha chikonkwanyi chenu chakulombola kudiza kwaBayibolu. Lombenu kudi Nzambi hampinji yimunakukeña kwikala nakudiza kwaBayibolu, nawa zatishenu yitwa yejima yitukweti kulonda kushikija ichi chikonkwanyi. Hadaha katataka mwikali namuzañalu wakulombola kudiza kwaBayibolu.