Kukundeja Abaluka Nyichima
1 Munsañu yamuchidi wamuntu kudi kukankila kweneni kwakukundeja antu. Kulondela chakutalilahu chaMwanta wetu Yesu Kristu, ninetu twazataña nañovu kulonda ‘kukasakasa chachiwahi abaluka nyichima.’—Isa. 61:1.
2 Njila yakuKundejelamu: Hakwila nawu tukundeji antu, mudimu wetu wakushimwina watela kwikala wesekana chiwahi, ninhoshelu yakukolesha. Neyi tukehesha kuhosha hayuma yatama yamukaayi nintañishilu yakutwamba, dikwila nawu chalala chamuBayibolu nikuchiñeja kwakuwahi kwayikaninu yaNzambi yakundejaña yikwikala yatachi mukuhanjeka kwetu. Ichi hichinakulumbulula nawu hitwatela kuhosha kutalisha haAmagedonuku. Mudimu wetu wekala wakushimwina hayuma yejima yiyedi kushimuna “mwaka waYehova wunawahi niifuku daNzambi yetu dakutenda,” “[ni]kumuleja yena mukwakwila chatama ababali aleki mwatama mwelañayi.” Hela chochu, kusoñamisha kutalisha haAmagedoni nikulumbulula hayuma yikafumamu hanyima yakujilumuna hichinakulumbulula nawu mutu wansañu yayiwahi yaWanta waNzambi wubuli kutiyakanaku.—Isa. 61:2; Ezek. 3:18; Mat. 24:14.
3 Kwitala niKwitala: Kakavulu twawanaña antu aneña hamuloña wayikatu, kufwisha antu jawu akeñawu, chaambu hela kukala kwamali. Hamu neyi akwakwimbujola Kristu, ‘twatiyaña wushona’ nikutiyila luwi antu yitwawanaña mumudimu wakushimwina. (Luka 7:13; Rom. 12:15) Neyi tutaña nsona yimu hela jiyedi kutalisha hakukala kweniku, twatela ‘kunyakala kutiya,’ nikumwiteja muntu kuhosha yuma yinakutoñojokayi. (Yak. 1:19) Hanyima yakutiyilila, chikutukwashaku kumukundeja muntu.
4 Hampinji yitunakuhanjeka, tunateli kuhosha netu, “Inakukeña kuhanjeka nenu mazu akukolesha kufuma muBayibolu.” Twatela kutoñojoka chiwahi kulonda kubula kukaana mazu ejima atama anateli kuhosha muntu. Ilaña twatela kushindamena hakukolesha nikukundeja kuhitila mukuzatisha jiNsona jinateli kukolesha muchima wamuntu. Muniyi njila mwatela kuzatisha mukanda waUkupelulula Ukufuma Mu Malembo mafu 325-327 hamuntu wunakwila nawu “Ukukoselesha.” Hela munateli kumwinka mwiniitala kopi yaTrakiti yinakwila nawu Ukusansamusha ku Bapopomenwa nikuhituluka munsañu yinatenuwu yakukolesha.
5 Wanenuku njila jakuKundejelamu Antu: Komana mwelukahu antuñi nenu, akwenu akunyidimu, akushikola, hela chisaka, anakukeña kuyikundeja? Twatela kuzata nañovu kulonda kuyihempula kumatalawu nachikonkwanyi chakuyikundeja kuhitila mukuzatisha jiNsona. Neyi twiluka muloña wunakukeñelawu kuyikundeja, tunateli kuloñesha kwesekeja nakukala kuyakwetuwu. Muniyi njila amakwawu asonekaña nyikanda hela kuyitemeshela nshiña. Kukeña akwetu antu kukutuleñela kuyitiyila luwi nikuyikundeja kuhitila mukuzatisha jiNsona.—Luka 10:25-37.
6 Dimu, atwinka mudimu wakukundeja antu adilaña, aneña, nikuyileja hakuchiñeja kwakuwahi kudi kumbidi. Iku diku kukundeja kunakukeñawu antu mukaayi kejima. Kuhosha namuzañalu hayuma yayiwahi yatukanayi Nzambi kunateli kukundeja nikuchiñeja kudi antu ashinshika. Mpinji yejima twanukeña muloña wutwatelela kukasakasila chachiwahi abaluka nyichima.