Yilenuñaku Hambidi muMudimu Wenu waKushimwina
1 Tata yetu wamwiwulu watiyaña kuwaha neyi ambuñindi anakuyilaku hambidi lwakuspiritu. Ichi chabombelamu kuyilaku hambidi hamu neyi mukwakushimwina wansañu yayiwahi wapama. Pawulu wamukolesheli nkoñi Timotewu kutwalekahu kushaku muchima kulonda wuya hambidi windi wumwekani. (1 Tim. 4:13-15) Wejima wetu twatela kufwila kuwahisha ntañishilu yetu mumudimu wakushimwina, hela tudi akwakushimwina akuluka yitembi.
2 Imikenu Yikonkwanyi: Hakwila nawu tuyiluku hambidi twatela kwimika yikonkwanyi. Yikonkwanyinyi yitwatela kwimika? Twatela kufwila kwilukisha chakuzatisha mpoku yetu yakabali yakuspiritu, Bayibolu. (Efwes. 6:17) Hadaha kudi njila yimu yakushimwinamu yitunakukeña kuwahisha, chidi neyi kushimwina mumukwakwa, kushimwina hanshiña, hela kuzatila mwiluña dakulandishila. Hadaha tunateli kuzata nañovu kulonda kwikala nakufuntilaku kwakuvulu kwakuwahi. Chikokwanyi chikwawu chachiwahi chatela kwikala chakuwahisha wuswa wetu wakutachika nikulombola kudiza kwaBayibolu.
3 Wukwashu: Kupompa kwachipompelu, sweje-e kupompa kwaShikola yaMudimu waTeokalatiki niKupompa kwaMudimu, akuloñesha kulonda kutwikwasha kuyilaku hambidi neyi akwakukalakala. Chitwasweja kuzatisha ñovu nakuloñesha kupompa nikuwanika kukupompa nikuzatisha yuma yitwadizaña, twakatambwila nkisu yayivulu nankashi.—2 Kor. 9:6.
4 Twatela kudikwasha cheñi wumu namukwawu kuyilaku hambidi. (Yish. 27:17) Kutiyilila nakanañachima njila yazatishañawu antu yitwazataña nawu mumudimu wakushimwina kukutukwasha kuyilaku hambidi. Kubombelahu, nkoñi wetu wakudiza kwamukanda nateli kuloñesha kulonda atukwashi. Kwenoku kukooleka hakwikala napayiniya wakuluka yitembi hela mukwakushimwina mukwawu watela kutukwasha kulonda twikali ashikahu chikupu nikuwana muzañalu mumudimu wakushimwina! Komana mwizanvu detu dakudiza kwamukanda mudi mukwakushimwina wamuha? Hadaha tunateli kutachikilahu kumuleja netu tunakukeña kuzata nindi.
5 Mudimu walema wunakuzatewa makonu himudimu wawakwaKristu wakushimwina. Chitunakumulambula Yehova ‘mulambu wetu wakumuhameka,’ tunakukeña kumwinka namuchima wumu. (Heb. 13:15) Neyi tufwilaña kuyilaku hambidi mumudimu wetu wakushimwina, tukwikala akwakukalakala ‘akadi hakutiyila nsonyi, nakulumbulula mazu ansañu yalala mwayawu mwayawu.’—2 Tim. 2:15.