‘Londelenu muMahaji Indi Chikupu’
1. Tunateli kwikala ñahi ayinsahu ashikahu?
1 Yesu hadizili ntañishilu yansakililu yawaYudeyaku, ilaña wadiña mukwakushimwina wabadika munsañu yanyaka. Hela chochu, nsañu yamudimu waYesu ayisoneka kulonda tudiziluku. Hakwila nawu twikali ayinsahu ashikahu, twatela ‘kulondela mumahaji indi chikupu.’—1 Pet. 2:21.
2. Chumanyi chikutukwasha kukeña antu neyi chayikeñeliyi Yesu?
2 Mwekeshenu Nenu Mwakeña Antu: Kukeña kwayikeñeliyi antu kwamuleñeleli Yesu kuyishimwina. (Maku 6:30-34) Antu amavulu amwiluña detu mutwashimwinaña ‘anakufunyisha’ nawa anakukeña nsañu yalala chikupu. (Rom. 8:22) Neyi tutoñojoka chikupu hakukala kuyakwetuwu nichayikeñayi Yehova chikutusañumuna kutwalekahu kushimwina. (2 Pet. 3:9) Kubombelahu, antu anateli kutiyilila kunsañu yetu neyi eluka nawu twayakamenaña chikupu.
3. Yesu washimwinineña antu mpinjinyi?
3 Shimwinenu Mpinji Yidi Yejima: Yesu wadiña nakushimwina antu nsañu yayiwahi mpinji yejima. (Mat. 4:23; 9:9; Yow. 4:7-10) Chochimu, tunakufwila kwikala adiloñesha kushimwina nsañu yalala hampinji yitunakuzata nyidimu yetu yitwazataña mafuku ejima. Amakwawu asendaña Bayibolu ninyikanda kulonda atweshi kushimwina kumudimu, hashikola, halwendu, hampinji yakulanda hela kudi kwejima.
4. Tunateli kwilisha ñahi Wanta kwikala mutu wetu wansañu yitunakushimwina?
4 Twamijenuku Kushimwina Wanta: Nsañu yayiwahi yaWanta diyadiña mutu wansañu washimwinineñayi Yesu. (Luka 4:43) Hela chakwila nsañu yitunakushimwina hiyinateli kuhosha haWanta hohenohuku, twashañaku maana kulonda kumukwasha mwiniitala yeluki Wanta chiwunakukeñekela. Nihampinji yitunakushimuna hayuma yatama yidi mukaayi yinakumwekesha nawu tudi mumafuku akukuminina, chuma chalema ‘chitwashimwinaña hinsañu yayiwahi yayuma yakuluñisha.’—Rom. 10:15.
5. Hakwila nawu tuzati chiwahi mudimu wetu wakushimwina, Bayibolu yatela kuzatisha mudimwinyi?
5 Shindamenenu Hezu daNzambi: Yesu wazatishileña jiNsona mpinji yejima mumudimu windi wakushimwina kulonda kuhakwilaku ntañishilu yindi. Hadiña nakutañisha yuma yakumuchima winduku. (Yow. 7:16, 18) Wadiña nakudiza Izu daNzambi nikudizatisha kulonda kudikiña nachu kukulukuka kwaSatana. (Mat. 4:1-4) Hakwila nawu tudizisheña amakwawu chiwahi, twatela kutañaña Bayibolu mafuku ejima nikuzatisha nsañu yitunakudiza. (Rom. 2:21) Neyi tunakwakula lwihu mumudimu wakushimwina, twatela kulumbulula chahosha Bayibolu hansañu yitunakuhoshahu nikutaña muBayibolu neyi chinatwesheki. Tunakukeña mwiniitala yeluki nindi hitunakuhosha nsañu yahamuchima wetuku, ilaña nsañu yitunakuhosha yinashindameni chikupu hamazu aNzambi.
6. Chumanyi chelileñayi Yesu hakwila nawu yashiki hanyichima yawantiyilili jindi?
6 Tañishenuña naKushika haMuchima: “Hikudi muntu wahoshahu dehi neyi iwuku.” (Yow. 7:46) Awa diwu mazu ahosheli atulama kutalisha hadi Yesu hampinji yayihwiluwu kudi akulumpi jawatupristu nawaFwarisi muloña wabulililuwu kumukwata Yesu. Chatela yashimuneña hohu yikuma, Yesu watañishileña munjila yakushika hanyichima yawantu adizishileñayi. (Luka 24:32) Wadiña nakuzatisha yakutalilahu yamwekeneña muchihandilu chawantu, kulonda yayikwashi kutiyishisha nsañu yindi. (Mat. 13:34) Yesu haswejeleña kuyileja antiyilili jindi nsañu yayivuluku. (Yow. 16:12) Wadiña nakutañisha nsañu yakufuma kudi Yehova bayi yahamuchima winduku. Kufwana Yesu, tunatweshi kwikala antañishi amawahi neyi tusha ‘maana akuhemba yuma yitwatañishaña.’—1 Tim. 4:16.
7. Muloñadi Yesu chatwalekeluhu namudimu wakushimwina?
7 Twalekenuhu Kushimwina Hela Anakuyidiwula niKuyikañesha: Hela chakwila Yesu wakoñeli nyidimu yañovu, antu amavulu hiyamutiyilililuku. (Luka 10:13) Niamuchisaka chaYesu yomweni atoñojokeli nawu “naandali.” (Maku 3:21) Hela chochu, Yesu watwalekeluhu. Watwalekeluhu kwikala nayililu yayiwahi muloña welukili chikupu nindi wadiña nansañu yalala yinateli kufumisha antu muwunduñu. (Yow. 8:32) Nawukwashu waYehova, anetu nawa tunakufwila kutwalekahu chakubula kuzeya.—2 Kor. 4:1.
8, 9. Tunateli kumwimbujola ñahi Yesu hakudihana hamuloña wansañu yayiwahi?
8 Dihanenu Kulonda Muzati Chikupu: Yesu washiyili maheta akumujimba kunyuma nakudihana mumudimu wakushimwina. (Mat. 8:20) Washimwineña chakubula kuzeya, mpinji yikwawu nimelela. (Maku 6:35, 36) Yesu welukili nindi wadiña nampinji yantesha yakumanisha mudimu. Chineli ‘mpinji yinashaluku yinakehi dehi,’ anetu nawa twatela kuhana mpinji yetu, niñovu, nimaheta hakumwimbujola Yesu.—1 Kor. 7:29-31.
9 AkwaKristu amuyaaka nkulakaji yakusambila adiña akwakushimwina ashikahu muloña adizililili kudi Yesu. (Yil. 4:13) Ninetu nawa tunatweshi kuzata chikupu mudimu wetu wakushimwina nikuwumanisha neyi tumwimbujola Mukwakushimwina muneni.—2 Tim. 4:5.