Chikasha Chalwihu

◼ Neyi anakudisumbula anakukeña kuzatisha Itala daWanta hachawija chawu, yumanyi yatela kuhanjekahu nawaeluda?

Yawija yaloñeshañawu kwesekeja nanshimbi yamuBayibolu yaletaña kalemesha kudi Yehova. Sweje-e kutalisha kuyawija yekalilaña Hetala daWanta, chineli antu amuchituñilu amonaña nawu maprogiramu yitwahaninaña Hetala daWanta emenañaku kuloñesha kwetu. Hakwila “yuma yejima ayili chakutela nakuloña,” chikuwaha neyi aeluda amuchipompelu akuhanjeka namana kwetu nimuhela anakudisumbula hayuma yinakundami kuchawija chawu neyi anakukeña kuzatisha Itala daWanta.—1 Kor. 14:40.

Anakudisumbula neyi anakukeña kuzatisha Itala daWanta hachawija chawu atela kwihula kuhitila mukusonekela komiti yamudimu yachipompelu apompelaña munodu Itala daWanta. Atela kuhanañahu dehi mukanda nikushimuna ifuku nimpinji yanakukeñawu kuzatisha Itala daWanta. Atela kwiluka nawu aeluda hiyanateli kuhimpa ndandanda yakupompa kulonda kwikala nachawijaku. Kubombelahu, nsumbuki nansumbuli atela kwikala nachakutalilahu chachiwahi, alondelaña kufumba kwamuBayibolu ninshimbi yaNzambi yaloña.

Hakwila nawu chawija chawu chileti kalemesha kudi Nzambi yetu wabadika, anakudisumbula atela kuhanjeka hantanjikilu yachawija chawu nakomiti yamudimu henohu kanda amanishi kuloñesha yuma yejima. Hela chakwila aeluda hiyakuleja anakudisumbula yuma yatela kwilawuku, ilaña neyi kudi yuma yabula kutelela yinakufuukulawu, atela kwovwahila munakuhosha aeluda. Atela kuvumisha hohu tumina tunatonduwu muTumina twaWanta hela twekala mumukanda wetu watumina. Cheñi neyi anakukeña kuhimpa ntanjikilu yayitwamu hela kusha yuma yakuwahisha nachu Mwitala daWanta chiña ayiteja. Neyi kudi kukwata nyevulu hela vidiyo, yumiyi hiyinateli kuluwañesha kulema kwanichi chidikaku. Aeluda atela kuyiteja kuhituluka muyuma yinaloñeshuwu Hetala daWanta neyi hiyikuluwañesha ntanjikilu yakupompaku. Kaadi yakutambika nachu antu kuchawija hiyatela kuyilamika haboduku. Hela chochu, aeluda anateli kubidika mukwihihisha haKupompa kwaMudimu kutalisha hachawija chikekala Hetala daWanta.

Hela chakwila hichakeñekaña nawu ejima anakushinjikija anakudisumbula atela kwikala apapatishewaku, chinateli kwikala chaluwa neyi anakushinjikija anakudisumbula akweti yililu yabula kwitejewa chikupu nanshimbi jamuBayibolu hela kuyijinooka kudi anenzi kuchawija. Neyi hadi eluda atondawu, diyi watela kwimenaku chawija. Aeluda ekala antañishi elukisha Izu daNzambi, dichi eluka chikupu chakuzatisha nshimbi yamuNsona yinateli kuzatika hanichi chawija chalema.—1 Tim. 3:2.

Chineli chawija chinateli kuwahisha hela kutamisha ijina daeluda wukemenaku chawija, niyena atela kumulejelañahu dehi yuma yejima yinakundami kuchidika. Eluda wakahanjeka naanakudisumbula kulonda kuyihula hayililu yawu kufuma hadihwiluwu; anakudisumbula atela kwikala akasunuka nikushimuna walala. Neyi wejima wawu adiñahu dehi mumaluwi, kwesekeja naNsona nimunshimbi atela kwikala akasunuka kudisumbula. (Mat. 19:9) Ichi chikubombelamu kumuleja eluda chipapilu chinakumwekesha nawu adiseña dehi.

Neyi anakudisumbula ahanjeka chiwahi nikuzatila hamu nawaeluda, chawija chikuleta muzañalu kudi antu ejima.—Yish. 15:22; Heb. 13:17.