Chakeñekaña Kwikala Omika haKushimwina
1 Hayaaka yakubadika 30 kapostolu Pawulu wadiluñishili chikupu mudimu windi wakushimwina. Neyi chitwamonaña kukala hakuzata mudimu walema, Pawulu wamweni kukala namudimu windi wakushimwina. (2 Kor. 11:23-29) Hela chochu, Pawulu halekeli kushimwinaku. (2 Kor. 4:1) Dichi welukili nindi Yehova diyi wamwinkeleña ñovu yakumika kulonda yatwalekuhu kushimwina. Hamuloña wachakutalilahu chindi chakumika chikupu, Pawulu wahosheli nindi: “Ikalenu akwakuñimbujola ami, neyi chinelaña ami nawa nembujolaña Kristu.”—1 Kor 11:1.
2 Twatela Kuumika Kweseka Makonu: Ifuku nifuku, amana kwetu amavulu ayidiwulaña, ayikabishaña, hela kuyihela kudi yisaka yawu, akwawu mwazatilañawu, hela akwawu akashikola. (Mat. 10:35; Yow. 15:20) Hadaha ninenu dichayikwoñañawu. Hekwawu, munakukabakana nayikatu, hela kufwila kukañesha yuma yinateli kuyiluwañesha, nikweseka chikuhwelelu nikumika kwenu. Tunateli kwikala akola kuhitila mukushinshika hayakutalilahu yawambuña ashinshika akunyaka niyawakwetu akwaKristu amakonu amonahu dehi kukala nikukwishinda.—1 Pet. 5:9.
3 Tunateli kwikala nañovu yakutwalekahu kwikala akola mumudimu wakushimwina kuhitila ‘mukumanyeka chikupu yitwa yaNzambi yejima.’ (Efwes. 6:10-13, 15) Chekala chalema kulomba kulonda kumika. Nzambi watwinkaña spiritu yindi yajila kulonda tutweshi kumika kweseka. (2 Kor. 6:4-7) Hakwila nawu tushindi mukulwisha kwetu kwakuspiritu, twatela kutiyilila kuyuma yatulejañayi Nzambi kulonda kuhizumwisha spiritu yetu. (Mas. 119:24, 85-88) Neyi chochinateli kutaña mwana mapampa kakavulu mukanda wunamusonekeli tata yindi wukweti kukeña, kutaña Bayibolu mafuku ejima kwakoleshaña wubwambu wetu naYehova. Twekalaña nakashinshi kakushinda kweseka kuhitila mukudiza kwahalwetu mpinji yejima, kwatuleñelaña kwiteja maana aNzambi kutukwasha kufuukula mwamuwahi nikutukolesha kwikala ashinshika kudi Nzambi.—Yish. 2:10, 11.
4 Kuumika Kwaletaña Nkisu: Kufwana Pawulu, kutwalekahu nakuumika iku tunakukalakala mudimu wetu wakushimwina kwatiyishaña muchima waYehova kuwaha nawa kwaletaña nkisu hadetu nihadi antu amakwawu. (Yish. 27:11) Dichi tufwilenu kutwalekahu namudimu wetu wakushimwina, nakumwekesha netu chikuhwelelu chetu chakola chikupu nawa ‘chabadika kulema kwawuru wanoñaña, hela awesekaña nakesi.’—1 Pet. 1:6, 7.