‘Shakamenu muKukeña kwaNzambi’
1. Indi mukanda ‘waShakamenu muKukeña kwaNzambi’ awusonekelelidi?
1 Tunakutalila chikupu kudiza mukanda wunakwila nawu ‘Shakamenu muKukeña kwaNzambi’ haKudiza Bayibolu haChipompelu kutachika mulungu waNovember 5. Mukanda wasonekeli Izaza Dalombolaña kudi ejima amukeña Yehova wamanini namazu akwila nawu: “Dichi tunakuhweleli chikupu netu wunu mukanda wukuyikwashaku kutwalekahu kuzatisha chalala muchihandilu chenu nawa chikuyikwasha kushakama ‘mukukeña kwaNzambi, nakutalila . . . wumi wahaya nyaka.’—Yuda 21.”
2. Indi iwu mukanda wukutukwasha muyumanyi yamuchihandilu?
2 Yuma Yitukadiza Muniwu Mukanda: Indi yishina yamuBayibolu yazatikaña ñahi muyuma yidi neyi amabwambu, yisela, kulemesha anlomboli, yililu yetu, maluwi, nhoshelu niyaaku? Yinleji yetu yamuchima yikendela hamu nanshimbi yaloña yamwekeshawu Mwiizu daNzambi. (Mas. 19:7, 8) Neyi twilukisha nankashi chatoñojokañayi Yehova, tukufwilaña kumuzañalesha nawa chumichi chikutuleñela kumwovwahila muyuma yejima.—Yish. 27:11; 1 Yow. 5:3.
3. Muloñadi chitwatela kuzata nañovu kulonda twakuleñahu mpinji yejima yitunakudiza?
3 Shenuku Muchima Kulonda Mukakuleñahu: Neyi himukuloñesha, imikenu chikonkwanyi chakumuhameka Nzambi mukachi kawantu jindi anapompi. (Heb. 13:15) Chipompelu chejima chikadizilaña hamu iwu mukanda wakudizamu. Chineli tukadizaña nsañu yantesha, chumichi chikatukwashaña kuloñesha chiwahi chikupu nawa hitukatiyaña woma wakwakulahuku. Mazu etu akuloñesha chiwahi nawa antesha akusañumuna akwetu kukeñañana nakwila nyidimu yayiwahi nawa akuleñela kudiluñisha hakudiza nsañu. (Heb. 10:24) Nawa tukuzañalala chikupu neyi hitukuhosha hayuma yitwakuhwelela.
4. Muloñadi chichalemena kwovwahila nshimbi jaYehova?
4 Hefuku dakukumishaku kwikala hamaseki nampinji yawufuku, Yesu walumbulwili nindi chalema kwovwahila nshimbi jaYehova hakwila nawu tutwalekuhu kushakama mukukeña kwaNzambi. (Yow. 15:10) Nawukwashu wamukanda ‘waKukeña kwaNzambi,’ tukufwila nankashi kuzatisha yishina yamuBayibolu muchihandilu chetu chamafuku ejima ‘nikushakama mukukeña kwaNzambi.’—Yuda 21.