Kushimwina Kwatukoleshaña kuSpiritu
1. Twahetelañamu ñahi mumudimu wakushimwina?
1 Kushimwina mpinji yejima kwakoleshaña wulunda wetu naYehova nikutuletela muzañalu chikupu. Chuma chacheni chitwayilaña nakushimwina hikumuzañalesha Yehova. Hela chochu, hamuloña wakwovwahila nshimbi ‘yakushimwina mazu,’ Yehova watukiswilaña nawa twahetelañamu munjila jajivulu. (2 Tim. 4:2; Isa. 48:17, 18) Indi kushimwina kunateli kutukolesha nikutuletela muzañalu munjilanyi?
2. Indi mudimu wakushimwina watukoleshaña munjilanyi?
2 Twakoleshewaña Nawa Atukiswilaña: Kushimwina kwatukoleshaña kusha maana hankisu jaWanta waNzambi kubadika hakukala kwamakonu. (2 Kor. 4:18) Kulumbulula ntañishilu yamuBayibolu kwakoleshaña chikuhwelelu chetu muyikaninu yaYehova nikusakilila nsañu yalala. (Isa. 65:13, 14) Hampinji yitunakukwasha amakwawu kwikala nawulunda naYehova kulonda ‘abuli kwikala ampata yamunu mwishina,’ anetu nawa twakoleshaña kufuukulahu kwetu kwakubula kwikala ampata yamunu mwishina.—Yow. 17:14, 16; Rom. 12:2.
3. Indi mudimu wetu wakushimwina watukwashaña ñahi kwikala nayililu yawakwaKristu?
3 Kukalakala mumudimu wakushimwina kwatukwashaña kwikala nayililu yawakwaKristu. Chakutalilahu, kufwila ‘kwikala wesekana nawantu ejima muyuma yejima’ kwatukwashaña kwikala adizoza chikupu. (1 Kor. 9:19-23) Hampinji yitunakuhosha nawantu ‘akabakana, anapalañani neyi nyikoku yakadi kabiña,’ tunateli kudiza kwikala nawushona. (Mat. 9:36) Twadizaña chakuumika neyi tutatakena ikabisha hela kadiwu. Twekalaña namuzañalu chikupu kuhitila mukudihana kulonda kukwasha antu amakwawu.—Yil. 20:35.
4. Mwatiyaña ñahi hakuzata mudimu wakushimwina?
4 Twekala nankisu hamuloña wakumuhameka Muntu wutwatelela kudifukulaku. Mudimu wakushimwina watukoleshaña. Waletaña nkisu chikupu kudantu adikitaña nankashi ‘hakushimuna chikupu nsañu yayiwahi.’—Yil. 20:24.