Twamwekeshaña Nawu Twamukeña Nzambi Kuhitila muKushimwina
1. Indi kumukeña Nzambi kwamuletesheli Yesu kwiladi?
1 Kukeña kwamusañumwini Yesu kukalakala mudimu windi wakushimwina. Chuma chejima chazatiliyi Yesu mumudimu windi wakushimwina hiwunsahu walala wamwekeshaña nawu wamukeña Yehova. Yesu wahosheli nindi: “Ami nelaña mwanlejeli Tata, kulonda antu ampata yamunu mwishina akeluki nawu nakeña Tata.” (Yow. 14:31) Hakwikala akwakulondela mumahaji aYesu, anetu nawa tukweti kukooleka kwakumwekesha kukeña kutwamukeña Nzambi mumudimu wetu wakushimwina.—Mat. 22:37; Efwes. 5:1, 2.
2. Indi kukeña kutwamukeña Yehova kwakundama ñahi kumudimu wetu wakushimwina?
2 “Ijina Deyi Dijili”: Neyi twikala nampinji yakushimwina antu amakwawu hadi Yehova niWanta windi, twamwekeshaña kukeña kutwamukeña Nzambi, dikwila nawu tunakujilika ijina dindi. (Mas. 83:18; Ezek. 36:23; Mat. 6:9) Neyi chochadiñi mudimu waYesu wakushimwina, twatwalekañahu kumwekesha kukeña kutwakeña kujilika ijina daYehova ninkeñelu yindi kuzatika kuhitila mumudimu wetu wakushimwina.—Mat. 26:39.
3. Indi kukeña kutwamukeña Yehova kwatukwashaña kushinda kukala munjilanyi?
3 Kukeña Kwatusañumunaña Kushinda Ikañesha: Kukeña kutwamukeña Yehova kwabadika nyikoleku yejima. (1 Kor. 13:4, 7) Yesu wamweni yuma yayivulu yadi kumukañesha kukalakala mudimu windi wakushimwina. Hela chochu, chamweniyi ikañesha, kukeña kwindi kwasweja nimpwila yindi yakwila nkeñelu yaYehova yamukwashili kushinda. (Maku 3:21; 1 Pet. 2:18-23) Anetu nawa twamonaña kukala kwakuvulu. Dichi kukeña kutwamukeña Yehova kunateli kutukwasha kushinda. Neyi tulondela chikupu chakutalilahu chaKristu, tunateli kukuhwelela kuzata mudimu wetu wakushimwina chakadi ikañesha. Hela chakwila tunateli kumona ikañesha dachisaka, kukatakata, wushinakaji, hela kadiwu kawantu, yumiyi hiyinateli kutulekesha kumukeña Yehova kuhitila mukukalakala mudimu wetu wakushimwina chikupuku.
4. Indi kukeña kutwamukeña Yehova kwatwinka kukoolekanyi?
4 Kukeña kukweti ñovu, nawa twakooleka hakwikala nawuswa wakumukeña Nzambi namuchima wejima mumudimu wetu wakushimwina. (1 Kor. 13:13) Chitunakuswila kwakwihi nampinji yakujilika ijina daYehova haya nyaka, ‘kukeña kwetu kusweji kuvula.’—Fwi. 1:9; Mat. 22:36-38.