Komana Munateli Kukalakala Chikupu muMudimu Wenu?
1. Chumanyi chinaleteshi mudimu wakushimwina wikali wakunyakashana, nawa muloñadi?
1 Hakumona neyi antu amavulu ashili maana kunsañu yayiwahi yaWanta, Yesu walejeli atumbanji twindi ‘kulomba kudi Mwanta wakumuna kulonda yatemeshi akwakukalakala kumudimu windi wakumuna.’ (Mat. 9:37, 38) Chineli tudi dehi mumafuku akukumishaku achilaaka chakumuna, twatela kunyakashana kukalakala mudimu wetu. Chumichi chinayi mukwila nawu twatela kulomba nakutoñojoka chitwatela kukalakala chikupu mumudimu wakushimwina.—Yow. 14:13, 14.
2. Indi antu amakwawu eteja ñahi mutambi wakutemesha akwakukalakala amavulu mwiha?
2 Chakukalakala Chikupu muMudimu: Amavulu amona neyi chaswayi kutachika kuzata wupayiniya hamuloña wakuyikwasha kudi Yehova. (Mas. 26:2, 3; Fwi. 4:6) Antu amakwawu azatili nañovu kulonda akalakali neyi apayiniya akukwasha hadi kakweji kamu hela twatuvulu muchaaka. Ichi chaletesheli kukalakala chikupu mumudimu wawu wakushimwina. Muzañalu wadiluñishiluwu hakukalakala neyi apayiniya akukwasha waletesheli amavulu kufuukulahu kwikala apayiniya ampinji yejima.—Yil. 20:35.
3. Neyi mwakalakalahu dehi wupayiniya, chumanyi chimwatela kutoñojokahu?
3 Komana Munateli Kutachika Cheñi Mudimu wawuPayiniya?: Neyi mwakalakalahu dehi wuPayiniya, chakadi nikujina muchidi kwanuka yuma yimwadiluñishili muniwu mudimu. Komana mwatoñojokahu dehi nakulomba kulonda mutachiki cheñi wupayiniya? Yuma yayiletesheli muleki mudimu wawupayiniya hiyinateli kuyikañesha cheñuku. Hadaha chaswayi kutachika cheñi mudimu wawupayiniya.—1 Yow. 5:14, 15.
4. Wejima wetu tukweti kukoolekanyi?
4 Mudimu wakumuna wunakuzatika chachiwahi nawa keña wumani. (Yow. 4:35, 36) Dichi wejima wetu tushinshikenu nyidimu yetu yakatataka twiluki neyi tunateli kuhimpa nyidimu yetu yitwelaña kulonda tukalakaleña chikupu mumudimu wakushimwina. Neyi chakwila hitukutwesha kukalakala chikupu mumudimu wetuku, komana kwila tuwana jinjila mutwatela kukalakala chachiwahi nehi? (Maku 12:41-44) Antu anakuzatishawu kudi Yehova chayinu mpinji muniwu mudimu wadimena akweti kukooleka kwakweni.—Mas. 110:3.