Yinkenu Atudizi Enu ‘Wumi Wenu’
1. Chumanyi chakeñekaña hakukwasha atudizi aBayibolu?
1 Kwakeñekaña yuma yayivulu hakwila nawu tukwashi kadizi waBayibolu kudihana kubadika hakumudizisha Bayibolu mpinji yejima. Kapostolu Pawulu wafwanishili wulunda wadiñiyi nawu nawantu atañishileñayi nawulunda wekalaña hakachi kamama yawantu nanyanindi. Anetu nawa twatiyaña kuwaha kuyinka atudizi etu “wumi wetwetu aweni” kulonda tuyikwashi kukula kuspiritu.—1 Tesa. 2:7-9.
2. Muloñadi wutukumushila kadizi muchima, nawa tunateli kwila ñahi mwenimu?
2 Shenu Muchima Kudi Atudizi: Kadizi waBayibolu chatachikayi kuzatisha nsañu yinakudizayi, chinleji chindi chikumuleja kuleka kudikunda nawantu abulaña kwovwahila nshimbi jamuBayibolu. (1 Pet. 4:4) Chisaka chindi chinateli kumuhela. (Mat. 10:34-36) Tunateli kumukwasha kulonda yabuleña kudimona neyi wamukunkulwayi kuhitila mukumusha muchima chikupu. Mishonali wumu wakuluka yitembi wahosheli nindi: “Bayi munyakala kufuma hetala dakadizi wenu neyi munamanishi dehi kudizaku. Neyi chinatwesheki, shakamenu muhanjeki nindi kapinji kantesha.” Ikalenu asoñama kulonda mumukwashi kadizi wenu. Chakutalilahu, neyi wakata, kwila mumutemeshela nshiña hela kumwendela nehi? Komana kwila mushakama nakadizi wenu kukupompa kulonda mumukwashuku kulela mwana, neyi chinatwesheki nehi?
3. Tunateli kumukwasha ñahi kadizi wetu hakwila nawu chipompelu chimukoleshi?
3 Wukwashu Kufuma kuChipompelu: Neyi munakushimwina nawa munakuzatila kwakwihi netala dakadizi wenu, kwila muhitilaku chantesha kulonda yamwiluki mukwenu imunakuzata nindi nehi? Neyi chinatwesheki, munateli kuzataña nawakwakushimwina ashiyashana, kushilahu niaeluda. Neyi munatachiki kudiza namuntu, mukoleshenu kadizi wenu waBayibolu kuya nakupompa Hetala daWanta. Chumichi chikumukolesha kudikunda nawantu amuchipompelu akekala chisaka chindi chakuspiritu.—Maku 10:29, 30; Heb. 10:24, 25.
4. Tunateli kwikala nankiswinyi neyi tudikitaña nañovu?
4 Nvwali wakwashaña anyanindi kuspiritu chakadi kuzeya wadiluñishaña neyi anyana akakela kudi Yehova nikwenda mwaya nsañu yalala. (3 Yow. 4) Tunateli kudiluñisha munjila yoyimu hampinji yitunakuhana wumi wetu kulonda tukwashi atudizi etu aBayibolu.