Komana Inakuzata Chikupu muMudimu Wakushimwina?
1. Indi mukwaKristu washinshika nateli kwakama yumanyi?
1 Mwadihulahu dehi lwihu lwamuchidiwu? Hadaha himunakukalakala mumudimu wakushimwina neyi chimwazatileñaku muloña wakukula, kukatakata, indi kwinji nyidimu yakwakamena chisaka yinakuyifuntisha hanyima. Muhela wumu wukweti anyana asatu wasonekeli nindi mpinji yikwawu wadifwishaña namuloña, muloña mpinji niñovu yakeñekaña hakwila nawu yakameni chisaka chindi yamuleñelaña kuzata mpinji yantesha mumudimu wakushimwina. Chumanyi chikutukwasha kumona yuma munjila yayiwahi?
2. Yumanyi yakeñañayi Yehova kudi etu?
2 Yuma Yakeñañayi Yehova Kudi Etu: Chakadi kujina wejima wetu twakeñaña kuzata chikupu mumudimu wakushimwina. Ilaña hekala chaambu cheneni hakachi kachuma chitwafwilaña kwila nachuma chituneli. Neyi tunakufwila kuzata chikupu chinakumwekesha nawu hitwelaña yuma mumushikilaku. Twatela kwanuka netu Yehova weluka kuzeyazeya kwetu nawa hakeñaña nindi tuzateña yuma yabadika muñovu jetuku. (Mas. 103:13, 14) Yumanyi yakeñañayi kudi etu? Wakeñaña nindi tumukalakeli namuchima wejima, kumuzatila chikupu.—Kol. 3:23.
3. Tunateli kushinshika ñahi chitwazataña mumudimu wakushimwina?
3 Yumanyi yikutukwasha kwiluka chuma chitwatela kuzata? Tunateli kumulomba Yehova kulonda yatukwashi kudishinshika chiwahi. (Mas. 26:2) Mukwetu mukwaKristu wapama, wutwakuhwelela nawa watwiluka chiwahi wukutuleja chakubula kuhita mumbadi nindi twatela kuzataña nañovu wukutukwasha. (Yish. 27:9) Anukenu nenu chineli yuma yahimpikaña, chachiwahi neyi tukushinshikaña chihandilu chetu mpinji yejima.—Efwes. 5:10.
4. Twatela kumona ñahi yanukishu yamuBayibolu yatwanukishañawu kutalisha hamudimu wakushimwina?
4 Chitwatela Kumona Yanukishu: Antu atalaña akwakutemuka kakavulu abilelaña nakukolesha anakutemuka. Afwilaña kukolesha akwakutemuka, bayi kuyizeyeshaku. Chochimu, kukolesha kwamuBayibolu niyanukishu yatwanukishañawu hakupompa niyekala munyikanda yetu yakwila nawu ‘tushimwini izu chakadi kulaba’ yatukwashaña, nawa hichaya mukwila nawu hitwazatañaku. (2 Tim. 4:2) Twatela kukuhwelela netu neyi tufwila kuzata nañovu, Yehova wamba kanuka chiwahi ‘kukeña ninyidimu yetu.’—Heb. 6:10.