‘Bayi Wutiya Womaku’
1. Kukalanyi kudi neyi kwamweniyi Yeremiya kutwatela kumona?
1 Yeremiya, chamwinkeluwu mudimu wawukaprofwetu, watoñojokeleña nindi wukutwesha wanyi. Ilaña Yehova wamukonkomweneni nindi, “bayi wakayitiyaña womaku,” nawa wamukolesheli kulonda yakalakali mudimu wamwinkeluwu. (Yere. 1:6-10) Makonu, nsonyi hela woma wunateli kutukañesha kuzata mumudimu wakushimwina. Kutiya woma wakutoñojoka chatela kwakulawu antu hela chatela kutumonawu kunateli kutukañesha kushimwina mpinji yikwawu. Tunateli kumanisha ñahi woma wamuchidiwu, nawa nkiswinyi yitwatela kutambwila?
2. Indi kuloñeshela chadimu kukutukwashaña ñahi kubula kutiya woma mumudimu wakushimwina?
2 Loñeshelenu Chadimu: Kudiloñeshela chadimu chachiwahi kunateli kumanisha woma wutukweti. Chakutalilahu, neyi tuhituluka chadimu muyuma yakañeshaña kuhanjeka, tukutwesha kwakula malwihu awantu avulaña kukaana. (Yish. 15:28) Komana kwila muzatisha mpinji yakuhituluka muyuma yimwadizili hakuDifukula kwaChisaka kulonda mukatweshi kushinda kukala kwambo-mboka hashikola nimumudimu wamwiha nehi?—1 Pet. 3:15.
3. Indi kumukuhwelela Yehova kwatukwashaña ñahi kubula kutiya woma?
3 Mukuhwelelenu Yehova: Twatela kushindamena hadi Nzambi hakwila nawu tubuleña kutiya woma. Yehova watukana nindi wukutukwashaña. (Isa. 41:10-13) Iku hikukiñewa kwabadika nankashi kutukweti. Kubombelahu, Yesu watukana nindi hela neyi kumwekana kukala mukukasumwisha, spiritu yajila yaNzambi yikutukwasha kushimwina munjila yayiwahi. (Maku 13:11) Dichi, mpinji yejima twatela kulombaña spiritu yaYehova yajila.—Luka 11:13.
4. Nkiswinyi yafumaña mukutwalekahu kushimwina hela chakwila tunakumona kukala?
4 Nkisu Yafumañamu: Chitukutwalekañahu mumudimu wakushimwina hela chakwila twamonaña kukala, chatukoleshaña kushinda kukala kutukamona kumbidi. Woma wamanaña nawa twekalaña ahamuka, nawa yililu yeniyi diyamwekeshaña antu enzala naspiritu yajila. (Yil. 4:31) Kubombelahu, Yehova chikutukwashañayi kulonda tubuleña kutiya woma, chikuhwelelu chetu chikukolelaku nawa tukusweja kukuhwelela muñovu yindi yawamwinu. (Isa. 33:2) Nawa cheñi tukwikalaña amuzañalu hakwiluka netu tunakuzañalesha Tata yetu wamwiwulu. (1 Pet. 4:13, 14) Dichi, bayi tutiyaña woma wakushimwina nsañu yaWantaku, mpinji yejima tukukuhwelelaña netu Yehova wukutukwasha.