Kulomba niKutoñojoka Chikupu Kwalema Kudi Akwakukalakala Adikita
1. Yumanyi yamukwashili Yesu kubula kuheñuka kumudimu windi wenjililiyi?
1 Nampinji yamelela Yesu wokili antu nikufumisha andemoni. Chikwachili atumbanji twindi chamuwaninuwu, ahosheli nawu: “Antu ejima adi nakukukeñakeña,” amukolesheli nawu yatwalekuhu kuzata nyidimu yindi yañovu. Ilaña, Yesu haheñukili nakuleka kuzata mudimu windi walema wakushimwina nsañu yayiwahiku. Wayakwili nindi: “Tuyenu kunyikala yacheñi yidi kwakwihi, nishimuni nikwenoku nawa; muloña dichi chinenjilili.” Chumanyi chamukwashili Yesu kusha muchima hamudimu windi? Muloña wahindukileña hankunku yakucha nakulomba nikutoñojoka. (Maku 1:32-39) Kulomba nikutoñojoka chikupu kunateli kutukwasha ñahi ninetu kwikala akwakushimwina adikita?
2. Yumanyi yitwatela kutoñojokahu chikupu yatela kutukwasha kwikala adikita mumudimu wakushimwina?
2 Yumanyi Yitwatela Kutoñojokahu Chikupu? Yesu welukili nindi antu “akabakeni, apalañeni neyi nyikoku yakadi kabiña.” (Mat. 9:36) Ninetu, twatela kwiluka netu antu anakukeña kutiya chikupu nsañu yayiwahi. Twatela kutoñojoka netu mpinji yinakehi dehi. (1 Kor. 7:29) Twatela kutoñojoka hanyidimu yaYehova niyililu yindi, hakukooleka kutukweti kwakwikala aYinsahu jaYehova, niheheta dakuspiritu ditukweti ditunadizi Mwizu daNzambi dinabuli kwilukawu antu adi mwiluña mutwashimwinaña.—Mas. 77:11-13; Isa. 43:10-12; Mat. 13:52.
3. Mpinjinyi yitwatela kutoñojoka chikupu?
3 Mpinjinyi Yimwatela Kutoñojokahu Chikupu? Antu amakwawu ahindukaña kumacha nakutoñojoka, neyi chelileñayi Yesu. Amakwawu asakula mpinji yamelela henohu kanda akaami nawu diyi mpinji yayiwahi yakutoñojoka chikupu. (Kutach. 24:63) Hela tudi nanyidimu yayivulu, twatela kuwana mpinji yakutoñojoka chikupu. Antu amakwawu atoñojokaña neyi adi halwendu munyotoka. Amakwawu niwena azatishaña mpinji yachayili neyi adi nkawawu. Antu amavulu eluka nawu kutoñojoka chikupu henohu kanda ayi nakushimwina, hela tuhu hakapinji kantesha, kwayikwashaña kushimwina neyena chikupu nawa chakadi woma.
4. Muloñadi chitwatela kwikala nampinji yakutoñojoka chikupu?
4 Kulomba nikutoñojoka chikupu kukutukwasha kwikala nampwila yayeni yakumukalakela Yehova, kukolesha wuspiritu wetu, nikwikala namuchima wakutwalekahu kushimwina. Kutoñojoka chikupu kwamukwashili Yesu, Nkoñi Muneni waNzambi, ninetu nawa kunateli kutukwasha.