Chuma Chatela Kukwasha Yisaka

1. Indi Sabata yamulungu nimulungu yakwashileña ñahi yisaka yawaIsarela?

¹ Kuhemba Sabata hichuma chachiwahi chaheniyi Yehova hakukwasha yisaka. A Isarela anookeleña kunyidimu yawu yazatileñawu mpinji yejima kulonda ekali nampinji yakutoñojoka hakuwaha kwaYehova niwulunda wawu nayena. Anvwali azatishileña iyi mpinji kulonda atañishi anyanawu Nshimbi chakashinshi. (Kuhit. 6:6, 7) Antu jaYehova adiña nampinji yakutoñojoka hawulunda wawu naYehova mulungu nimulungu haSabata.

2. Indi Sabata yatudizishaña chumanyi hadi Yehova?

² Kafwampi, makonu Yehova hakeñaña nindi yisaka yihembeña Sabataku. Hela chochu, ilu lushimbi lwatudizishaña chuma chimu hadi Nzambi yetu. Mpinji yejima wakeñaña nindi antu jindi ekali nawulunda wawuwahi nayena. (Isa. 48:17, 18) Kudifukula kwaChisaka kwamelela diyi njila yimu yamwekeshelañayi Yehova makonu nindi wakeña antu jindi.

3. Indi Kudifukula kwaChisaka kwamelela kukweti nkeñelwinyi?

³ Indi Kudifukula kwaChisaka kwaMelela Kukweti Nkeñelwinyi? MuJanuary muchaaka cha 2009, twatachikili kupompa ifuku dodimu Kupompa kwaMudimu, Kudiza kwaMukanda haChipompelu niShikola yaMudimu waTeokalatiki. Nkeñelu yaniku kuloñesha yadiña yakukwasha yisaka kukolesha wulunda wawu naYehova chisaka chejima kuhitila mukutanjika ifuku dadimena mulungu nimulungu nampinji yamelela kulonda ekaleña nakudifukula kwachisaka. Yisaka yejima ayikolesheli kutachika kudiza kwachisaka hefuku ditwapompeleña kudiza kwamukanda neyi chinatwesheki, nikuzatisha iyi mpinji hakudiza Bayibolu mumesu awunda nikudiza yuma yinesekani nakukaankila kwachisaka.

4. Komana chisaka chatela kuhanjeka ora yimu hohu? Lumbululenu.

⁴ Hakwila nawu tuyi nakupompa Kudiza kwaMukanda haChipompelu twadiña nampinji yakuvwala, kwenda niyuma yikwawu. Etu amavulu twazatishileña mpinji yakubadika haora yimu yitwapompeleña. Chineli ahimpa ndandanda yakupompa, ichi tukweti idi ifuku ditwatela kudifukula kudi Yehova neyi chisaka. Dichi hitwatela kuzatisha ora yimu hohu haKudifukula kwaChisaka kwamelelaku. Ilaña twatela kutoñojoka yuma yinakaankili nikuzeyazeya kwachisaka chetu nikutanjika mpinji kwesekeja nayumiyi.

5. Komana munateli kuzatisha mpinji yejima yimwatanjika kuhanjeka hohu nezanvu? Lumbululenu.

⁵ Komana Munateli Kuzatisha Mpinji Yejima Yimwatanjika Kuhanjeka Hohu Nezanvu? Neyi antu adisumbula niyisaka yikweti anyana ahanjekaña nsañu yamuNsona hamu adikoleshaña wumu namukwawu. (Rom. 1:12) Yisaka yanuñañanaña. Dichi, kuhanjeka nsañu yamuNsona dichuma chasweja kulema haKudifukula kwaChisaka kwamelela. Hela chochu, muntu wudi wejima wamuchisaka watela kwikala nampinji yakudiza nkawindi. Chakutalilahu, hanyima yakuhanjeka hamu nezanvu, chisaka chatela kushakama hamu ilaña muntu nimuntu wukutwalekahu kudiza nkawindi, hadaha wukumanisha kuloñesha kupompa hela kutaña jimagazini. Yisaka yikwawu yatondañahu kujima chisanji chanyivwimbimbi mpinji yejima yamelela.

6. Munateli kuhanjeka ñahi?

⁶ Munateli Kuhanjeka Ñahi? Bayi neyi kuhanjeka kwatela kwikala kwamalwihu niñakwilu hohu mpinji yejimaku. Hakwila adiluñisheña Kudifukula kwaChisaka kwamelela nawa kwakuhizumwisha, yisaka yayivulu yatanjika ndandanda yadifwana nakupompa kwetu kwamukachi kamulungu. Nsañu yahanjekañawu ayambulaña muyibalu yayivulu nawa ayidizaña munjila jashiyashana. Chakutalilahu, anateli kutañila hamu Bayibolu, kuloñeshela kupompa hamu, nikuhituluka muyuma yakuhosha mumudimu wakushimwina. Hefu 6 hadi njila jikwawu.

7. Indi anvwali atela kulombola munjilanyi?

⁷ Indi Anvwali Atela Kulombola Munjilanyi? Chisaka chenu chikudiza chachiwahi neyi mudizaña mumesu awunda. Munateli kudizila hanji mpinji yikwawu neyi kunachi chiwahi. Mwatela kunooka hakapinji kantesha neyi chinatwesheki. Yisaka yikwawu yadyaña tuyisakola nikunwa yimpwita hanyima yakudiza. Hela chakwila anvwali atela kutondolwela kuzuwila hela kubabesha anyana mpinji yaKudifukula kwaChisaka kwamelela, anateli kuzatisha mpinji yikwawu kulonda ahanjeki hachaaku hela kukala kunelukuwu. Hela chochu, chikuwaha neyi muhanjeka namwana hansañu yakala nkawindi mpinji yikwawu munowu mulungu kulonda mubuli kumutiyisha nsonyi hadi akwawu anyana. Kudifukula kwaChisaka kwamelela hikwatela kwikala kwakutiyisha wuudi hela kuneñeshaku, ilaña kwatela kwikala kwakuzañalesha muloña twadifukulaña kudi Nzambi wamuzañalu.—1 Tim. 1:11.

8, 9. Indi nyitu yayisaka yinateli kuloñesha ñahi?

⁸ Mutu waChisaka Watela Kuloñesha Ñahi? Chisaka chinateli kuhetelamu neyi mutu wachisaka yaloñeshela chadimu Kudifukula kwaChisaka kwamelela kwamulungu nimulungu kuhitila mukutonda nsañu yatela kuhanjekawu nichatela kudizawu chachiwahi. (Yish. 21:5) Iyala watela kumwihula iñodindi nsañu yatela kudizawu. (Yish. 15:22) Nyitu yayisaka, mpinji jikwawu kwila mwihula anyanenu nsañu yimwatela kudiza nehi? Neyi muyihula mukwiluka yuma yalema yinakutoñojokawu anyanenu.

⁹ Nyilungu yikwawu yayivulu mutu wachisaka hatela kuzatisha mpinji yeneni nakuloñeshaku. Chakadi nikujina chisaka chikudiluñisha kudiza yuma yadizañawu mulungu nimulungu, nawa mutu wachisaka hatela kuloñesha nsañu yayiha mpinji yejimaku. Chikuwaha neyi mutu wachisaka wukuloñeshaña mpinji yejima yakumanishawu kudiza henohu wuchidi kwanuka yuma yakuspiritu yinakaankili chisaka chindi. Nyitu yayisaka yikwawu yasonekaña ndandanda yayihi nakuyisha hatooka chidi neyi hafuliji kulonda muntu wudi wejima muchisaka yayimoni swayi. Chumichi chaleteshaña chisaka kushaku maana nikwikala nampinji yakuloñesha neyi chinatwesheki.

10. Indi ana ashakamaña nkawawu anateli kuzatisha ñahi mpinji yaKudifukula kwaChisaka kwamelela?

¹⁰ Indi Neyi Nashakamaña Nkawami? Ana ashakamaña nkawawu anateli kuzatisha iyi mpinji yaKudifukula kwaChisaka kwamelela kulonda adizi nkawawu. Yuma yimwatela kusoneka handandanda yenu yidi neyi kutaña Bayibolu, kuloñesha kupompa, nikutaña Kaposhi Kakutalila niAwake! Akwakushimwina amakwawu abombelañahu kudiza kwahalwawu. Mpinji yikwawu, anateli kutambika mukwakushimwina mukwawu hela chisaka kulonda adikoleshi kuhitila mukuhanjeka mpanji yamuNsona.

11, 12. Nkiswinyi yafumaña hakwikala naKudifukula kwaChisaka kwamelela mpinji yejima?

¹¹ Nkiswinyi Yafumaña Hakwikala Nakudifukula kwaChisaka Kwamelela Mpinji Yejima? Antu adihanaña namuchima wumu mukudifukula kwalala akundamaña kwakwihi naYehova. Kubombelahu yisaka yadifukulaña hamu yakoleshaña mpanda yawu. Antu ayedi adisumbula asonekeli hankisu yadiluñishañawu nawu: “Chineli tudi apayiniya nawa hitukweti anyanaku, twatalilaña chikupu ifuku daKudifukula kwaChisaka. Twadikunda chikupu nawa twakundamaña kwakwihi naTata yetu wamwiwulu. Neyi kunachi dehi hefuku ditwatoñola kudizila hamu twadihulaña netu: ‘Wuneluki chuma chitukwila namelela? Tukwikala naKudifukula kwaChisaka!’”

¹² Ntanjikilu yakudifukula kwachisaka kwamelela yakwashaña cheñi yisaka yikweti nyidimu yayivulu. Mama yawantu mujiki wukweti anyana awamayala ayedi nawa payiniya wampinji yejima wasonekeli nindi: “Kunyima chatukalilileña kudizila hamu nachisaka. Hitwadizileña mpinji yejimaku muloña nazeyeleña. Nakañenyeña kwiluka chakutanjika yuma. Dichi nasoneki kulonda niyisakilili nankashi hantanjikilu yaKudifukula kwaChisaka kwamelela. Ichi dinu twadizaña nachisaka mpinji yejima nawa tunakuhetelamu.”

13. Chumanyi chikuletesha chisaka chenu kuhetelamu chikupu muniyi ntanjikilu?

¹³ Neyi chochu chadiña Sabata, Kudifukula kwaChisaka kwamelela hichawaana chatwinkayi Tata yetu wamwiwulu chinateli kukwasha yisaka. (Yak. 1:17) Yisaka yawaIsarela yaheteleleñamu chikupu kuspiritu kwesekeja nachazatishileñawu ifuku daSabata. Chochimu, yisaka yetu yinateli kuhetelamu chikupu kwesekeja nachitwazatishaña ifuku datwinkawu nawu hifuku dakudifukula kwachisaka kwamelela. (2 Kor. 9:6; Ŋal. 6:7, 8; Kol. 3:23, 24) Neyi muzatishaña chiwahi iyi ntanjikilu, chisaka chenu chinateli kuhosha neyi chahosheliyi ñimbi yamasamu nindi: “Ilaña ami kwami chachiwahi kukundama kwakwihi naNzambi; namwila dehi Mwanta Yehova nami dimu mwami mwakubatamina.”—Mas. 73:28.

[Mazu ekoku adi hefu 5]

Kudifukula kwaChisaka kwamelela hikwatela kwikala kwakutiyisha wuudi hela kuneñeshaku, ilaña kwatela kwikala kwakuzañalesha muloña twadifukulaña kudi Nzambi wamuzañalu

[Chikasha chidi hefu 6]

HEMBENU

Njila Jikwawu Jimwatela Kuzatisha haKudifukula kwaChisaka kwaMelela

Bayibolu:

• Tañilenu hamu chibalu chakutaña Bayibolu mulungu nimulungu. Nsañu yikwawu yamuBayibolu ayisoneka munjila yatela kutañawu antu amavulu, muntu wumu nateli kutaña hadi mukwakushimuna, amakwawu anateli kutaña mazu awantu amakwawu asonekawu muBayibolu.

• Hemenu chimwenu chansañu yamuBayibolu yimunatañi.

• Yinkenu antu ejima amuchisaka tupetulu twamuBayibolu tumunatondi kulonda akatañili chadimu nawa asoneki malwihu ayedi hela lumu lunakuhosha hansañu yinatañuwu. Kuhiñahu sandujolenu hamu malwihu awantu ejima.

• Mulungu nimulungu loñeshenu chipapilu hadi vasi yamuBayibolu nawa esekenu kuyihembela kumutu nikuyilumbulula. Hembenu yipapilu yeniyi nawa hitulukenuñamu mulungu nimulungu kulonda mwiluki jinsona jimunakwanuka.

• Tiyililenu mazu amuBayibolu akukwata chakukwata nawa londelenuña muBayibolu.

Kupompa:

• Loñeshelenu hamu mbadi yikwawu yimukataña hakupompa.

• Hitulukenu mutumina twaWanta tumwakemba mulungu wunakwinza.

• Neyi kudi muntu wukweti mpanji muShikola yaMudimu waTeokalatiki hela chimwenu muKupompa kwaMudimu, hanjekenu mwiluki chimwatela kuhana hela hitulukenumu iku chisaka chinakutiyilila.

Kukaankila kwaChisaka:

• Tañenu nsañu yidi mumukanda waYoung People Ask hela Learn From the Great Teacher.

• Hanjekenu hayuma yinakumwekesha chimwatela kumanisha kukala kunateli kumwekana hashikola.

• Himpashanenu yibalu nawanyana. Anyana akusandujola nsañu kuhiñahu akuhanjeka nawanvwali jawu.

Kushimwina:

• Hitulukenu kulonda muloñeshi nsañu yimwatela kushimwina kunsa yamulungu.

• Hanjekenu yikonkwanyi yayiwahi yimwatela kwimika muchisaka kulonda mwakazatuku chikupu mumudimu wakushimwina muchilaaka chaChanukishu hela hamafuku akunooka.

• Yinkenu antu ejima amuchisaka jiminiti jantesha kulonda asandujoli chakwakula malwihu ashiyashana atela kuyihulawu mumudimu wakushimwina nawa hitulukenumu.

Njila jikwawu:

• Tañilenu hamu chibaaba chamumagazini yakatataka.

• Lejenu antu ejima amuchisaka atañili chadimu chibaaba chamumagazini yakatataka chayitiyisha kuwaha, kuhiñahu yilenu ashimuni yuma yatañawu.

• Mpinji yikwawu tambikenu mukwakushimwina hela antu adisumbula kulonda mudizi nawu Kudifukula kwaChisaka kwamelela, nawa munateli nikuyihujola.

• Talenu vidiyo yetu yimu nawa hanjekenuhu.

• Hanjekenu hamu chibaaba chamuAwake! chidi namutu wunakwila nawu “Young People Ask” hela “For Family Review.”

• Hanjekenu hamu chibaaba chamuKaposhi Kakutalila chidi namutu wunakwila nawu “Dizishenu Anyanenu” hela “Chibaaba Chawatwansi.”

• Tañenu nikuhanjeka chibalu chamuYearbook yakatataka hela mukanda wawuha wutwatambwili hakupompa kwankambi kunafumuhu.

• Hanyima yakupompa kupompa kwankambi hela kupompa kwanyanya, hitulukenu muyikuma.

• Shinshikenu yileñaleña yaYehova nawa hanjekenu yuma yitwadizilañaku hadi Yehova.

• Zatilenu hamu hayuma yidi neyi chakutalilahu, mapu, hela chati.