“Chejeji Chenu Chitoñekaña”
1. Kukoolekanyi kutukweti kwakulejaku amakwawu?
1 Kufuma kubudidi kushika tuhu nikumelela lubanji lwachejeji lwaleñelaña kumuhameka Yehova Nzambi. Hela chochu, Yesu wayilejeli atumbanji twindi kwikala nachejeji chambukaku, “chejeji chawumi.” (Yow. 8:12) Kwikala nanichi chejeji chakuspiritu hikukooleka kwakweni nawa kwakeñekaña kuzata nañovu. Yesu washimwini nindi: “Chejeji chenu chitoñekaña kumesu awantu,” kulonda amakwawu ahetelumu. (Mat. 5:16) Chineli tunakushakama mukanu kaayi kadi mumwidima wakuspiritu twatela kulejaku amakwawu ichi chejeji nawa chinakukeñeka kuzata nañovu chikupu. Hanu dinu, tunateli kutoñeka ñahi chejeji chetu neyi Kristu?
2. Indi Yesu wamwekesheli ñahi kulema kwakushimwina chejeji chansañu yalala?
2 Kuhitila Mukushimwina: Yesu wazatishili mpinji yindi, ñovu, nimaheta hakwila nawu yatoñeki chejeji chansañu yalala kumatala awantu, hadi antu amavulu, hajimpidi, nikwejima kwawanineñayi antu. Welukili kulema kwakuleja antu chejeji chalala chakuspiritu. (Yow. 12:46) Hakwila nawu yashimwini antu amavulu, Yesu wayikwashili atumbanji twindi kwikala “chejeji champata yamunu mwishina.” (Mat. 5:14) Atoñekeleña chejeji kuhitila mukwilila antuñinawu yuma yayiwahi nikuyileja nsañu yalala yakuspiritu.
3. Tunateli kumwekesha ñahi netu twalemesha chikupu nsañu yalala yachejeji?
3 Antu jaNzambi alemesha mudimu ‘wakwenda neyi akwachejeji,’ nawa ashimwinaña kwejima kunateli kuwanawu antu. (Efwes. 5:8) Kutaña Bayibolu hela nyikanda yikwawu yawakwaKristu heluña hanateli kuyimonawu kudi antu hampinji yimudi kumudimu hela kushikola kukuleñela muhanjeki nawantu nsañu yamuNsona. Muhela wakansi wumu watachikili kudizisha antu Bayibolu nawa wahanini nyikanda 12 kudi akwawu akashikola.
4. Muloñadi ‘kutoñeka chejeji chetu’ chikwakeñekelaña kwikala nayililu yayiwahi?
4 Kuhitila muNyidimu Yayiwahi: Kutoñeka chejeji chetu kwamwekenaña cheñi muyililu yetu yitwelaña mafuku ejima. (Efwes. 5:9) Yililu yawakwaKristu ayimonaña chikupu kudi amakwawu kumudimu, hashikola, nikumaluña amakwawu nawa yaleñelaña twikali nakukooleka kwakushimwina nsañu yalala yamuBayibolu. (1 Pet. 2:12) Chakutalilahu, yililu yayiwahi yakansi wayaaka yitanu yaletesheli ntañishi yindi kutemeshela anvwali jindi nshiña. Wahosheli nindi, “Kanda nimoneñahu dehi kansi wudi neyi iwu weluka chikupu yuma yayiwahi niyatamaku!” Eñañi, mudimu wetu wakushimwina niyililu yetu yayiwahi yakokolaña antu ‘kuchejeji chawumi’ nawa yamulemeshaña Nzambi yetu.