Ikalenu “naNyichima Yaluwi”
1. Chumanyi chinakukeñawu nankashi antu makonu?
1 Makonu antu amavulu nankashi akeñaña kuyitiyila luwi hama kubadika hakusambila. Muloña wakwila yuma yinasweji kutama mukaayi, chumichi chinaleteshi antu kuneña chikupu nikubula kwikala nakuchiñeja. Antu amavulu chikupu anakukeña kuyikwasha, chineli tudi akwaKristu twatela kuyakamena hama antuñi netu. (Mat. 22:39; Ŋal. 6:10) Tunateli kuyakamena munjilanyi?
2. Njilanyi yayiwahi yitwatela kumwekeshelamu luwi?
2 Mudimu Waluwi: Nzambi hohu diyi watela kukundeja antu. (2 Kor. 1:3, 4) Yehova watukonkomwenaña kumwimbujola kuhitila mukwikala “nanyichima yaluwi,” nawa watwinka mudimu wakuhempula antuñi netu nansañu yayiwahi yaWanta. (1 Pet. 3:8) Kuzata hakumina ñovu yetu muniwu mudimu diyi njila yitwatela kukundejelamu “abaluka nyichima,” muloña Wanta waNzambi dichuma chayinkaña antu anakuyanda kuchiñeja kwakweni. (Isa. 61:1) Muloña wakwila watiyilaña antu jindi luwi, Yehova keña yafumishuhu kutama kwejima nakuleta ituña dadiha daloña.—2 Pet. 3:13.
3. Tunateli kumona ñahi antu neyi chayimweneñayi Yesu?
3 Monenuña Antu Neyi Chayimweneñayi Yesu: Nihampinji yashimwinineñayi mazaza amaneni, Yesu hakuminineña dakumona nindi hizanvu dawantu hohuku. Wayimweneña nindi hiyantu akeñelaña wukwashu hakwila nawu ekali nawulunda wawuwahi naNzambi hamuntu hamuntu. Adiña neyi anyikoku akadi kabiña wakuyilombola. Yesu wayitiyilili luwi, nawa chumichi chamuletesheli kuyitañisha mumesu awunda. (Maku 6:34) Neyi tumonaña antu neyi chayimweneñayi Yesu chikutuleñela kuyitiyila luwi hamuntu hamuntu. Chumichi chikumwekenaña munhoshelu yetu nichitukumwekanaña hamesu. Tukulemesha hama mudimu wakushimwina nawa tukuhimpaña mazu etu kulonda tushimwini kwesekeja nayuma yinakwakamenayi muntu nimuntu.—1 Kor. 9:19-23.
4. Muloñadi wutwatelela kwikala naluwi?
4 Izaza deneni dawantu akunyunza yejima anakutiyilila nsañu yaWanta ninsañu yakukolesha yayishimwinañawu. Chitunakutwalekahu kwikala nanyichima yaluwi, tukumulemesha nikumuzañalesha Yehova Nzambi yetu wukweti luwi.—Kol. 3:12.