Yehova Nakutudizisha Chakuzata Iwu Mudimu
1. Chumanyi chelañayi Yehova neyi yayinka antu mudimu wakuzata?
1 Yehova chayinkayi antu mudimu wakuzata, wayilejaña cheñi chakuwuzata. Chakutalilahu, chelili Yehova yamuleji Nowa kutuña watu, Nowa wadiña kanda yatuñeñahu dehi watu, ilaña Nzambi wamulejeli chakutuña. (Kutach. 6:14-16) Chelili Mosi kabiña wamwovu amwinki mudimu wakuya nakuhosha nawakulumpi awaIsarela niFwaro, Yehova wamulejeli nindi: “Ami nakekala nakanwa keyi, nakakuleja mwejima muwakahosha.” (Kwid. 4:12) Kutalisha hamudimu wetu wakushimwina nsañu yayiwahi, Yehova watudizishaña chakushimwina. Nakutudizisha chakuzata iwu mudimu kuhitila muShikola yaMudimu waTeokalatiki niKupompa kwaMudimu. Tunateli kuhetelamu ñahi?
2. Tunateli kuhetelamu ñahi muShikola yaMudimu waTeokalatiki?
2 Shikola yaMudimu waTeokalatiki: Loñeshenu nsañu yidi handandanda yakupompa henohu kanda muyi nakupompa. Chimwamona atudizi chinakuhoshawu iyi nsañu mumpanji jawu, mukwiluka chakutañisha chiwahi. (Yish. 27:17) Mwenda musenda mukanda wenu waIsukulu lya Butumikishi nawa wuzatishenuña. Neyi nkoñi washikola yatena nsañu yidumu neyi kadizi nahani dehi mpanji, fundenu yikuma yimunakukeña kuzatisha, nawa sonekenu tumazu twantesha kunsa yachipapilu. Hakwila nawu muhetelumu chikupu muniyi shikola mwatela kusonekesha. Komana mwasonekesha? Neyi ayinka mpanji loñeshenu chiwahi nawa zatishenu kufumba kwakuyifumbawu. Neyi mudi mumudimu wamwiha zatishenu nsañu yimwadiza.
3. Yumanyi yikutukwasha kuhetela muKupompa kwaMudimu?
3 Kupompa kwaMudimu: Tunateli kwanuka njila jakutulejawu hakupompa kweniku neyi tutañila chadimu nsañu nikuloñesha kuhoshahu. Neyi mwakula nakwihihisha, antu amavulu akwakulahu. Shenu kashinshi kuyimwenu yikumwekeshañawu, nawa zatishenu njila jimunamoni nenu jikuyikwasha chikupu mumudimu wakushimwina. Neyi muMudimu Wetu waWanta mudi yibaaba yatela kuyikwasha mumudimu wenu wakushimwina, yihembenu kulonda mwakayizatishi kumbidi.
4. Muloñadi chitwatela kuzatisha chiwahi yuma yatudizishañayi Nzambi?
4 Kufwana nyidimu yayinkeluwu aNowa naMosi, mudimu wetu wakushimwina nsañu yayiwahi mwahita iseki dejima wekala wakala. (Mat. 24:14) Tunateli kuzata chiwahi neyi tushindamena hadi Yehova, Nleji yetu Muneni nikuzatisha chiwahi yuma yejima yatudizishañayi.—Isa. 30:20.