Komana Munakudiza Yuma Yayivulu Kudi Yehova?

1. Chumanyi chakeñañayi Yehova kutalisha hansañu yakudiza?

¹ Yehova, ‘Nleji Yetu Muneni,’ nakukeña nindi tudizi. (Isa. 30:20) Watachikili kudizisha hanyima yakuleña Mwanindi wawedi. (Yow. 8:28) Adama chadikañiliyi, Yehova halekeli kudizishaku, ilaña waheni nshimbi kudi antu abula kuwanina.—Isa. 48:17, 18; 2 Tim. 3:14, 15.

2. Mudimwinyi wakudizisha wunakuzatika makonu?

² Makonu, Yehova nakulombola mudimu weneni chikupu wakudizisha antu. Neyi chaprofweteliyi Isaya, antu amavulu mukaayi kejima anakuhwila ‘kumpidi yetala daYehova’ yachifwikija. (Isa. 2:2) Muloñadi chinakuhwililawu kuniyi mpidi? Kulonda ayileji njila jaNzambi, eñañi, ayidizishi kudi Yehova! (Isa. 2:3) Muchaaka chamudimu cha 2010, aYinsahu jaYehova azatili maora akubadika ha 1.6 biliyoni mumudimu wakushimwina nikudizisha antu chalala chamuBayibolu. Kubombelahu, mulungu nimulungu muyipompelu yakubadika ha 105,000 mukaayi kejima, antu jaNzambi ayidizishaña nshimbi jakuspiritu, nawa nduñu wamaana nikashinshi nakusoneka nyikanda yawakwaKristu yakubadika hamadimi 500 yakudizamu.

3. Anenu nawa munahetelumu mushikola yinakudizishayi Yehova antu jindi?

³ Hetelenumu Chikupu: Twahetelañamu nankashi mushikola yawunzambi! Tunadizi netu Nzambi wekala nejina nawa watwakamenaña. (Mas. 83:18; 1 Pet. 5:6, 7) Tuneluki ñakwilu yamalwihu alema itwadihulaña muchihandilu akwila nawu: Muloñadi antu chakabakenañawu nikufwa? Nateli kwikala ñahi namuzañalu waweni? Muloñadi chatuleñeleluwu? Yehova watwinka cheñi nshimbi jajiwahi jatukwashaña kwikala ‘akooleka munjila jetu.’—Yosh. 1:8.

4. Mashikolanyi itukweti akudizisha ambuña Nzambi, nawa muloñadi chitwatela kudizila yuma yayivulu kudi Yehova?

⁴ Kubombelahu, Yehova watanjika mashikola akudiza yuma yayivulu kulonda akwashi ambuñindi amavulu asweji kumukalakela. Mafu 4-6 anakushimuna mashikola atela kudizawu amana kwetu niahela. Hela chakwila nshakaminu yetu yikutukañesha kuhita munawa mashikola anashimuniwu, komana tunakusha muchima hakudiza yuma yinakutudizishayi Nzambi kwesekeja nachidi chihandilu chetu? Komana tunakukolesha atwansi, akanjikijañawu kudi antañishi jawu niantu amakwawu kufwila kutaña mashikola ahewulu akwituña, kulonda ekali nayikonkwanyi yakuspiritu chatela afwileña kutaña shikola yahewulu, yabadikawu kudi shikola yawuNzambi? Neyi tudiza yuma yayivulu yinakutudizishayi Yehova yikutukwasha kwikala nachihandilu chachiwahi makonu nawa tukekala nawumi wahaya nyaka kumbidi.—Mas. 119:105; Yow. 17:3.

Mashikola Itukweti Mukuloñesha kwaYehova

Shikola Yakudiza Kutaña niKusoneka

• Nkeñelu Yaniyi Shikola: Nkeñelu yaniyi shikola yakutañisha antu eluki kutaña nikusoneka kulonda chiyikwasheñaku kudiza Bayibolu nkawawu nikudizisha antu amakwawu chalala.

• Kuleha Kwampinji: Sampu aneluki kutaña nikusoneka.

• Iluña: Hetala daWanta.

• Atela Kwikala Muniyi Shikola: Akwakushimwina ejima niantu akweti mpwila yakudiza.

• Chakusonekesha: Aeluda muchipompelu diwu aloñeshaña awa mashikola kwesekeja nawantu adi muchipompelu abula kwiluka kutaña nikusoneka, nawa alejaña ejima anakukeña kudiza kulonda ayeña nakudiza.

Shikola yaMudimu waTeokalatiki

• Nkeñelu Yaniyi Shikola: Iyi shikola yakudizisha akwakushimwina kulonda ekali akwakushimwina niantañishi ansañu yayiwahi akuluka yitembi.

• Kuleha Kwampinji: Mpinji yejima.

• Iluña: Hetala daWanta.

• Anyi Atela Kusonekesha: Akwakushimwina ejima. Cheñi, niantu amakwawu apompaña mpinji yejima, etejaña yuma yatañishaña Bayibolu, nawa anahimpi chihandilu chawu hamuloña wakulondela nshimbi jawakwaKristu.

• Chakusonekesha: Mwatela kuhosha nankoñi waShikola yaMudimu waTeokalatiki.

Mashikola Akudiza Idimi Dakwituña Dacheñi

• Nkeñelu Yaniyi Shikola: Yakukwasha akwakushimwina kulonda eluki chakushimwina nsañu yayiwahi mwidimi dakwituña dacheñi.

• Kuleha Kwampinji: Tukweji tuwana hela tutanu. Kakavulu awa mashikola ekalañaku Hamposu nantentemena hadi ora yimu hela jiyedi.

• Iluña: Kakavulu, ekalilaña Hetala daWanta didi kwakwihi.

• Anyi Atela Kusonekesha: Akwakushimwina adi nañimenu yayiwahi anakukeña kushimwina mwidimi dakwituña dacheñi.

• Chakusonekesha: Kasanji kamutayi dikaloñeshaña awa mashikola kwesekeja nakuvula kwawantu afuma kumatuña acheñi.

Kutuña Matala aWanta

• Nkeñelu yaKutuña Matala aWanta: Iwu mudimu wekala wakutuña nikutuñulula Matala aWanta. Iyi bayi neyi hishikolaku, ilaña antu adihanaña kuzata iwu mudimu ayidizishaña nyidimu yashiyashana kulonda azateñaku nyidimu yakutuña.

• Kuleha Kwampinji: Chikushindamena hadi muntu yomweni wunadihani.

• Iluña: Kwejima kudi mazanvu Akutuña Matala aWanta. Ankoñi amakwawu anateli kuyitwala kuya nakuzatila kumaluña akwakulehi kunamwekani wubanji nakukwashana mumudimu wakutuña.

• Yuma Yakeñekaña: Amana kwetu niahela atela kwikala apapatishewa nawa anetejuwu kudi izanvu dawaeluda. Chili eluka nyidimu hela hiyelukaku.

• Chakusonekesha: Mwatela kusoneka fomu yaKingdom Hall Volunteer Worker Questionnaire yahanañawu kudi aeluda hachipompelu chenu.

Shikola Yamudimu Wawupayiniya

• Nkeñelu Yaniyi Shikola: Iyi shikola yekala yakukwasha apayiniya ‘kukalakala mudimu wawu awumanishi chikupu.’—2 Tim. 4:5.

• Kuleha Kwampinji: Nyilungu yiyedi.

• Iluña: Kasanji kamutayi dikasakulaña iluña; kakavulu yekalilaña kwakwihi Netala daWanta.

• Yuma Yakeñekaña: Mana kwetu hela muhela wunazati mudimu wawupayiniya wampinji yejima hadi chaaka chimu.

• Chakusonekesha: Apayiniya ayisonekeshaña nikuyileja kudi nkoñi wañinza.

Shikola Yawantu Anatachiki Mudimu wahaBeteli

• Nkeñelu Yaniyi Shikola: Iyi shikola ayiloñesha kulonda akwashi ankoñi amaha atweshi kukalakala chiwahi mudimu wawu haBeteli.

• Kuleha Kwampinji: Ora yimu mumulungu hadi nyilungu 16.

• Iluña: Yekalaña haBeteli.

• Yuma Yakeñekaña: Watela kwikala mana kwetu hela muhela wamuchisaka chaBeteli hela muntu wunadihani kuzatila haBeteli hadi mpinji yeneni (chaaka chimu hela kubadikahu).

• Chakusonekesha: Amamembala amuchisaka chaBeteli ahitaña muniyi shikola chakadi kuyisonekesha.

Shikola Yamudimu waWanta

• Nkeñelu Yaniyi Shikola: Yakudizisha aeluda niankoñi akuzatila kulonda alomboleña chiwahi nikuzata nyidimu yamukuloñesha. (Yil. 20:28) Iyi shikola yekalañaku chimwahita yaaka yantesha kwesekeja nakufuukula Kwezaza Dalombolaña.

• Kuleha Kwampinji: Muyaaka yamakonu, aeluda adizaña hadi ifuku dimu nachikunku, ankoñi akuzatila adizaña ifuku dimu.

• Iluña: Kakavulu yekalilaña Hetala daWanta didi kwakwihi hela Hetala Deneni Dakupompela.

• Yuma Yakeñekaña: Chiña wudi eluda hela nkoñi wakuzatila.

• Chakusonekesha: Aeluda niankoñi akuzatila ayitambikaña kudi nkoñi wañinza.

Shikola yawaEluda amuChipompelua

• Nkeñelu Yaniyi Shikola: Yakukwasha aeluda kulonda akameneña nyidimu yawu muchipompelu.

• Kuleha Kwampinji: Mafuku atanu.

• Iluña: Kasanji kamutayi dikakeñaña iluña; kakavulu yekalilaña Hetala daWanta didi kwakwihi hela Hetala Deneni Dakupompela.

• Yuma Yakeñekaña: Aeluda hohu diwu atela kuya kuniyi shikola.

• Chakusonekesha: Aeluda ayitambikaña kudi kasanji kamutayi.

Shikola Yawankoñi Endaña niAñodijawub

• Nkeñelu Yaniyi Shikola: Yakukwasha ankoñi endaña niankoñi ankambi kulonda akwasheña chikupu yipompelu nawa ‘azateña nañovu nakushimuna nikuleja mazu aNzambi’ nikubiña antu ayinkawu kuhemba.—1 Tim. 5:17; 1 Pet. 5:2, 3.

• Kuleha Kwampinji: Tukweji tuyedi.

• Iluña: Kasanji kamutayi dikatondaña iluña.

• Yuma Yakeñekaña: Chiña wudi nkoñi wañinza ninkoñi wankambi.

• Chakusonekesha: Ankoñi endaña niañodi jawu ayitambikaña kudi kasanji kamutayi.

Shikola Yakudiza Bayibolu Yawamana Kwetu Ajikic

• Nkeñelu Yaniyi Shikola: Yakudizisha aeluda niankoñi akuzatila ajiki kulonda azateña nyidimu yikwawu yamuchipompelu. Awa amana kwetu amavulu chakumishawu shikola ayitemeshaña kudi kukaankila kwawakwakushimwina mwituña dawu. Amana kwetu antesha ayitemeshaña kuya nakuzatila kwituña dacheñi neyi eteja.

• Kuleha Kwampinji: Tukweji tuyedi.

• Iluña: Kasanji kamutayi dikatondaña iluña; kakavulu yekalilaña Hetala Deneni daKupompelamu hela Hetala daWanta.

• Yuma Yakeñekaña: Amana kwetu adi nayaaka yakusemuka hakachi ka 23 ni 62 nawa akola kunyijimba anakukeña kukalakela amana kwawu nikutwala nsañu yaWanta hambidi kumaluña kudi kukaankila. (Maku 10:29, 30) Chiña anakalakali hadi yaaka yiyedi hawueluda niwunkoñi wakuzatila.

• Chakusonekesha: Neyi mwituña denu mwekala iyi shikola, hakupompa kwañinza hekalaña mitiñi yawana kwetu anakukeña kuya kuniyi shikola. Haniyi mitiñi dihashimunañawu nsañu yikwawu.

Shikola Yakudiza Bayibolu YawakwaKristu Adisumbulad

• Nkeñelu Yaniyi Shikola: Yakudizisha chikupu adisumbula kulonda ayizatishi kudi Yehova nikuloñesha kwindi. Adisumbula amavulu neyi anamanishi shikola ayitemeshaña kumaluña kudi kukaankila mwituña dawu. Ilaña amakwawu ayitemeshaña kwituña dacheñi neyi aneteji.

• Kuleha Kwampinji: Tukweji tuyedi.

• Iluña: Mashikola akutachikilahu antesha anakwikalila hamutayi haWatchtower Educational Center muPatterson, New York, U.S.A. Kufumahu, iyi shikola yakekalaña kumaluña akatonda kasanji kamutayi, chidi neyi Hetala Deneni daKupompelamu hela Hetala daWanta.

• Yuma Yakeñekaña: Adisumbula adi nayaaka yakusemuka hakachi ka 25 ni 50 nawa akola kunyijimba akweti nshakaminu yikuyiteja kushakama kudi kwejima kudi kukaankila nawa akweti muchima wakwila nawu: “Yamonu, ntemeshami.” (Isa. 6:8) Cheñi, chiña anashakami mumaluwi hadi yaaka yiyedi nawa anashikiji dehi yaaka yiyedi mumudimu wampinji yejima chakadi kuleka.

• Chakusonekesha: Neyi mwituña denu mwekala iyi shikola, hakupompa kwefuku dadimena hekalaña mitiñi yawana kwetu anakukeña kuya kuniyi shikola. Haniyi mitiñi dihashimunañawu nsañu yikwawu.

Shikola yaWatchtower Yakudiza Bayibolu yaGiliyadi

• Nkeñelu Yaniyi Shikola: Yakudizisha apayiniya niankoñi amakwawu adi mumudimu wampinji yejima kulonda atachiki mudimu wawumishonali.

• Kuleha Kwampinji: Tukweji tutanu.

• Iluña: Hamutayi, haWatchtower Educational Center, Patterson, New York, U.S.A.

• Yuma Yakeñekaña: Adisumbula adi nayaaka yisatu kufuma hayipapatishiluwu nawa adi nayaaka yakusemuka hakachi ka 21 ni 38 neyi anakusonekesha katachi. Chiña eluka kuhosha Engilishi, anashakami mumaluwi hadi yiyedi nawa chayinu mpinji adi mumudimu wampinji yejima nawa anazati hadi yaaka yiyedi chakadi kuleka. Anakukeña kuya kuniyi shikola atela kwikala akola kumujimba. Apayiniya anakuzatila mwituña dacheñi (kushilahu niamakwawu adi muwumishonali); ankoñi endaña; amamembala amuchisaka chaBeteli; amana kwetu ahitahu dehi muShikola yaKudiza Mudimu wawuNkoñi, muShikola Yakudiza Bayibolu Yawamana Kwetu Ajiki nimuShikola Yakudiza Bayibolu YawakwaKristu Adisumbula anateli kusonekesha neyi chakwila anawanishi yuma yakeñekaña.

• Chakusonekesha: Munyitayi yikwawu yatondawu, kwekalaña kuhumañana hakupompa kwankambi kwawamana kwetu niahela anakukeña kuya kuniyi shikola. Nsañu jikwawu jinakundami kuniyi shikola ayishimunaña haniyi mitiñi. Neyi kwosi mitiñi hakupompa kwankambi mwituña denu ilaña munakukeña nenu musonekeshi, mwatela kusonekela kasanji kamutayi wenu kulonda ayileji mwakwilila.

Shikola Yawamamembala Amukometi Yamutayi niAñodijawu

• Nkeñelu Yaniyi Shikola: Yakwashaña amana kwetu ekala muMakometi Anyitayi kulonda azateña chiwahi mudimu wawu wakuhemba jiBeteli, nikusha maana kunsañu jamudimu jakundama kuyipompelu, nikutala jiñinza nijinkambi nikwiluka mujakumina, kushilahu nikubalumuna nyikanda, kupulinta nikutemesha nyikanda kuyipompelu nikutala madipatimenti ashiyashana.—Luka 12:48b.

• Kuleha Kwampinji: Tukweji tuyedi.

• Iluña: Hamutayi, haWatchtower Educational Center, Patterson, New York, U.S.A.

• Yuma Yakeñekaña: Mana kwetu watela kwikala membala Wamukometi yaMutayi hela Wamukometi Yetuña hela diwu mudimu wukutachikayi.

• Chakusonekesha: Amana kwetu niañodi jawu ayitambikaña kudi Izaza Dalombolaña.

[Tumazu twaheshina]